၆.၂.၁။ ပွံက်ဒုတိယပါဋိဒေသနိက်သိက္ခာပိုဒ်
559) ပ္ဍဲအရာ ခမဳဂမၠိုၚ်ဟေၚ် ဂပ်ဝ်ဘိက်နိမန်လဝ်ဂမၠိုၚ်ဒှ်တုဲ ကဵုပိုဉ်ပ္ဍဲသ္ၚိဒကာဂမၠိုၚ်အိုတ်ရ မ္ဂးဂှ် ဒကာမ္ဂးဂှ် ဂကူသၟိၚ် ဂကူဗဗၞး ဂကူညးဗၞိက် ဂကူညးဒိုက်ဂတ် ရဴဝွံ နွံပန်ဂကူအိုတ်ရ။ ဂပ်ဝ်ဘိက်နိမန်လဝ်ဂမၠိုၚ်ဒှ်တုဲ ကဵုပိုဉ်အိုတ်ရ မ္ဂးဂှ် ဂပ်ဝ်နိမန်လဝ်ကဵုပိုဉ် ပၞောဝ်ကဵုဘောဇိုန်ဂမၠိုၚ်မသုန်သာ် နကဵုဘောဇိုန်မွဲမွဲသာ်တုဲ ကဵုပိုဉ်အိုတ်ရ။ ခမဳဗြဴ မ္ဂးဂှ် ဗြဴမဒှ်ပယျၚ် ပ္ဍဲသၚ်ၜါလပါ်ရောၚ်။ မစဳရေၚ် မ္ဂးဂှ် ဗွဲမဗဗွဲကဵုဒှ်မိတ်သဟာဲပြဘိုဂ်စသုၚ်မွဲစွံ ဗွဲဗဗွဲကဵုဒှ်ညးဥပဇ္ၛာယ်တုပ်သၟဟ် ဗွဲဗဗွဲကဵုဒှ်ညးအ္စာတုပ်သၟဟ် ပွမဟီုသ္ဂး ရဴဝွံ ‘ပ္ဍဲဗဗေၚ်ဝွံ ဩဝ်စုတ်ကဵုသွၜဲအိုတ်ညိ၊ ပ္ဍဲဗဗေၚ်ဝွံ ဩဝ်စုတ်ကဵုပိဏ္ဍပါတ်အိုတ်ညိ’ ဂှ် စဳရေၚ်မ္ဂးရ။ ခမဳဂမၠိုၚ်ဂှ် မ္ဂးဂှ် ခမဳဃောမကဵုပိုဉ်ဂမၠိုၚ်။ ခမဳဗြဴဂှ် မ္ဂးဂှ် ‘ယွံခမဳဗြဴ ဗၞတ်ခမဳဂမၠိုၚ် ကဵုဒၟံၚ်ပိုဉ်ဂှ် ဩဝ်စ္ဍးပဲါတိတ်ညိကၠာ’ ရဴဝွံ ဒးဗက်ဗ္ဒဴကၠေံ ခမဳဗြဴဂှ်ရ၊ ခမဳမွဲဇကုလေဝ် ဟွံဗက်ဗ္ဒဴထောံခမဳဗြဴဂှ်တုဲ “ကြက်သ္ၚာဲရ ကြက်ပြဘိုဂ်ရ” ရဴဝွံ ဒုၚ်ဂိုၚ်ကေတ်မ္ဂး၊ ဒးအာပတ်ဒုက္ကဋ်ရ၊ ဇၟာပ်မၚိတ်ဖျေံ ဇၟာပ်မၚိတ်ဖျေံ ဒးအာပတ်ပဋိဒေသနိက်ရ။ ပ္ဍဲခမဳဗြဴဂှ် မၞုံကဵုစၟတ်သမ္တီ ခမဳဗြဴဒှ်တုဲ ဟွံဆေဝ်ဒဝ်ကၠေံမစဳရေၚ်ဒၟံၚ်ဂှ်မ္ဂး၊ ဒးအာပတ်ပါဋိဒေသနိက်ရ။ ပ္ဍဲခမဳဗြဴဂှ် မၞုံကဵုသၠေဟ်ပၟာဒှ်တုဲ ဟွံဆေဝ်ဒဝ်ကၠေံမစဳရေၚ်ဒၟံၚ်ဂှ်မ္ဂး၊ ဒးအာပတ်ပါဋိဒေသနိက်ရ။ ပ္ဍဲခမဳဗြဴဂှ် မၞုံကဵုစၟတ်သမ္တီ ဟွံသေၚ်ကဵုခမဳဗြဴဒှ်တုဲ ဟွံဆေဝ်ဒဝ်ကၠေံမစဳရေၚ်ဒၟံၚ်ဂှ်မ္ဂး၊ ဒးအာပတ်ပါဋိဒေသနိက်ရ။
560) ပ္ဍဲခမဳဗြဴဂှ် မၞုံကဵုစၟတ်သမ္တီ ခမဳဗြဴဒှ်တုဲ ဟွံဆေဝ်ဒဝ်ကၠေံမစဳရေၚ်ဒၟံၚ်ဂှ်မ္ဂး၊ ဒးအာပတ်ပါဋိဒေသနိက်ရ။ ပ္ဍဲခမဳဗြဴဂှ် မၞုံကဵုသၠေဟ်ပၟာဒှ်တုဲ ဟွံဆေဝ်ဒဝ်ကၠေံမစဳရေၚ်ဒၟံၚ်ဂှ်မ္ဂး၊ ဒးအာပတ်ပါဋိဒေသနိက်ရ။ ပ္ဍဲခမဳဗြဴဂှ် မၞုံကဵုစၟတ်သမ္တီ ဟွံသေၚ်ကဵုခမဳဗြဴဒှ်တုဲ ဟွံဆေဝ်ဒဝ်ကၠေံမစဳရေၚ်ဒၟံၚ်ဂှ်မ္ဂး၊ ဒးအာပတ်ပါဋိဒေသနိက်ရ။ ဟွံဆေဝ်ဒဝ်ကၠေံ ခမဳဗြဴ မဒှ်ပယျၚ်ပ္ဍဲ (ဘိက္ခုနဳ) သၚ်မွဲလပါ် မစဳရေၚ်ဒၟံၚ်ဂှ်မ္ဂး ဒးအာပတ်ဒုက္ကဋ်ရ၊ ပ္ဍဲဗြဴမဟွံသေၚ်ကဵုခမဳဗြဴဂှ် မၞုံကဵုစၟတ်သမ္တီခမဳဗြဴမ္ဂး၊ ဒးအာပတ်ဒုက္ကဋ်ရ။ ပ္ဍဲဗြဴမဟွံသေၚ်ကဵုခမဳဗြဴဂှ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲဗြဴမဟွံသေၚ်ကဵုခမဳဗြဴဂှ် မၞုံကဵုစၟတ်သမ္တီ ဟွံသေၚ်ကဵုခဳဗြဴမ္ဂး၊ ဟွံဒးအာပတ်ရ။
561) ပိဏ္ဍပါတ်ဇကုဂှ် ဖအောဝ်ကဵု (ညးသအာၚ်) ကဵုတုဲ အလဵုဇကုဟွံကဵုမ္ဂး၊ ပိဏ္ဍပါတ်ညးသအာၚ်ဂမၠိုၚ်ဂှ် အလဵုဇကုဟေၚ်ကဵုတုဲ ဟွံဖအောဝ်ကဵုညးသအာၚ်ကဵုမ္ဂး၊ ကဵုတဴဝတ္ထုမဟဂွံကဵုဏီမ္ဂး၊ စုတ်ကဵု ပ္ဍဲဗဗေၚ် မဟဂွံစုတ်ဏီမ္ဂး၊ ဖအောဝ်ကဵုကဵုကုခမဳဂမၠိုၚ်ညဳညဳမ္ဂး၊ သိက္ခမာန်စဳရေၚ်မ္ဂး၊ သာမဏဳဗြဴစဳရေၚ်မ္ဂး၊ ဟွံဒးအာပတ်ရ၊ ပ္ဍဲအရာဂမၠိုၚ်အိုဿီု မသအာၚ်နူဘောဇိုန်မသုန်သာ်ဂှ် ဟွံဒးအာပတ်ရ၊ ကုခမဳ ကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဒုတိယပါဋိဒေသနိက်သိက္ခာပိုဒ်တုဲရ။
