၆.၂။ ဒုတိယပါဋိဒေသနိက်သိက္ခာပိုဒ်
557) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞဲါကဵုစၞ ကုယန်လမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ် ခမဳဂမၠိုၚ် ဂပ်ဝ်ဘိက်နိမန်ဂမၠိုၚ်ဒှ်တုဲ ကဵုပိုဉ်ပ္ဍဲသ္ၚိ ဒကာဂမၠိုၚ်အိုတ်ရ။ ခမဳဗြဴဆဗ္ဗဂ္ဂဳဂမၠိုၚ် သွက်ခမဳဆဗ္ဗဂ္ဂဳဂမၠိုၚ် “ပ္ဍဲဗဗေၚ်ဝွံ ဩဝ်စုတ်ကဵုသွၜဲ အိုတ်ညိ၊ ပ္ဍဲဗဗေၚ်ဝွံ ဩဝ်စုတ်ကဵုပိဏ္ဍပါတ်အိုတ်ညိ” ရဴဝွံ သီုမစဳရေၚ်တဴဂှ် တန်တဴဒၟံၚ်အိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ဟွံဆေဝ်ဒဝ်ကၠေံ ခမဳဗြဴဂမၠိုၚ်မစဳရေၚ်ဒၟံၚ်ဂမၠိုၚ်အိုတ်ရော? ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ်ဟွံဆေဝ်ဒဝ်ကၠေံ ခမဳဗြဴဂမၠိုၚ် မစဳရေၚ်ဒၟံၚ်ဂမၠိုၚ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွဴကျာ်မၞုံပိုန် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် ဟွံဆေဝ်ဒဝ်ကၠေံ ခမဳဗြဴဂမၠိုၚ် မစဳရေၚ်ဒၟံၚ်ဂမၠိုၚ်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
558) “ခမဳဂမၠိုၚ်ဟေၚ် ဂပ်ဝ်ဘိက်နိမန်လဝ်ဂမၠိုၚ်ဒှ်တုဲ ကဵုပိုဉ်ပ္ဍဲသ္ၚိဒကာဂမၠိုၚ်အိုတ်ရ၊ ပ္ဍဲအရာကဵုပိုဉ်ဂှ် ခမဳဗြဴဂမၠိုၚ် ‘ပ္ဍဲဗဗေၚ်ဝွံ ဩဝ်စုတ်ကဵုသွၜဲညိ၊ ပ္ဍဲဗဗေၚ်ဝွံ ဩဝ်စုတ်ကဵုပိဏ္ဍပါတ်ညိ’ ရဴဝွံ မၞုံသဘဴမစဳရေၚ်တဴဒှ်တုဲ တန်တဴဒၟံၚ်မ္ဂး၊ ခမဳဂမၠိုၚ်ဂှ် ‘ယွံဒေံဗြဴ ဗၞတ်ခမဳဂမၠိုၚ် ကဵုဒၟံၚ်ပိုဉ်ဂှ် ဩဝ်စ္ဍးပဲါတိတ်ညိကၠာ’ ရဴဝွံ ဒးဗက်ဗ္ဒဴကၠေံ ခမဳဗြဴဂှ်ရ၊ ‘ယွံဒေံဗြဴ ဗၞတ်ခမဳဂမၠိုၚ် ကဵုဒၟံၚ်ပိုဉ်ဂှ် ဩဝ်စ္ဍးပဲါတိတ်ညိကၠာ’ ရဴဝွံ တၞဟ်နဒးဗက်ဗ္ဒဴကၠေံ ခမဳဗြဴဂှ် ခမဳမွဲဇကုလေဝ် ဟွံဟီုသ္ဂးမ္ဂး၊ ခမဳဂမၠိုၚ်ဂှ် ‘ယွံကောန်တၠတအ် ပိုဲညးဂမၠိုၚ် အာစိုပ်အာပတ်ပါဋိဒေသနိက် မဂပ်ဝ်ဂရိုဟ် မဟွံဗဗွဲသပ္ပါယ်တုဲအိုတ်ရ၊ ဟီုလၟိၚ်ဒေသနာ အာပတ်ပါဋိဒေသနိက်ဂမၠိုၚ်ဂှ်အိုတ်ရ’ ရဴဝွံ သ္ဒးဟီုလၟိၚ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
