၆.၁.၁။ ပွံက်ပဥမပါဋိသေနဳယသိက္ခာပိုဒ်
554) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ် ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ဍေံဟွံသေၚ်ကဵုကဠောမသ မ္ဂးဂှ် နူလပါ်မိအံက်ကီု နူလပါ်မအံက်ကီု စဵုကဵုစိုပ်လ္ၚဝ်အပါဇၞော်အပါနက်ထပှ်ဒတောဝ်ဂှ် ဟွံဆက်စပ်ရ။ ခမဳဗြဴ မ္ဂးဂှ် ဗြဴမဒှ်ပယျၚ် ပ္ဍဲသၚ်ၜါလပါ်ရောၚ်။ အပ္ဍဲကွာန် မ္ဂးဂှ် တရဴသဗာန်ဍာန်ဇၞော် တရဴဟွံခၠၚ်သာတ် (ဟွံကၠိုဟ်အာကၠိုဟ်ကၠုၚ်) တရဴသွာၚ် သ္ၚိရောၚ်။ စၞစ မ္ဂးဂှ် ပဲါကၠေံဘောဇိုန်ဂမၠိုၚ်မသုန်သာ် ယာမကာလိက သတ္တဟကာလိက ယာဝဇဳဝိကတုဲ သှေ်ဂှ် စၞစမ္ဂးရ။ ဘောဇိုန် မ္ဂးဂှ် ပုၚ် ကွာၚ်ဒလောမ် ကွာၚ်ဝိုဟ် ကဖျုန် ရဴဝွံ ဘောဇိုန်ဂမၠိုၚ်နွံမသုန်သာ်အိုတ်ရ။ ကြက်သ္ၚာဲရ ကြက်ပြဘိုဂ်ရ ရဴဝွံ ဒုၚ်ဂိုၚ်ကေတ်မ္ဂး၊ ဒးအာပတ်ဒုက္ကဋ်ရ၊ ဇၟာပ်မၚိတ်ဖျေံ ဇၟာပ်မၚိတ်ဖျေံ ဒးအာပတ်ပါဋိဒေသနိက်ရ။
555) ပ္ဍဲခမဳဗြဴ ဟွံသေၚ်ကဵုကဠောမသဂှ် မၞံကဵုစၟတ်သမ္တီ ဟွံသေၚ်ကဵုကဠောမသဒှ်တုဲ နကဵုတဲဇကု ဒုၚ်ဂိုၚ်ကေတ်စၞစကီု ဘောဇိုန်ကီု နူတဲခမဳဗြဴဟွံသေၚ်ကဵုကဠော မလုပ်ကၠုၚ် အပ္ဍဲကွာန်တုဲ သ္ၚာဲလေဝ်သ္ၚာဲမ္ဂး၊ စလေဝ်စမ္ဂး ဒးအာပတ်ပါဋိဒေသနိက်ရ။ ပ္ဍဲခမဳဗြဴ ဟွံသေၚ်ကဵုကဠောမသဂှ် မၞုံကဵုသၠေဟ်ပၟာဒှ်တုဲ နကဵုတဲဇကု ဒုၚ်ဂိုၚ်ကေတ်စၞစကီု ဘောဇိုန်ကီု နူတဲခမဳဗြဴ ဟွံသေၚ်ကဵုကဠော မလုပ်ကၠုၚ်အပ္ဍဲကွာန်တုဲ သ္ၚာဲလေဝ်သ္ၚာဲမ္ဂး၊ စလေဝ်စမ္ဂး၊ ဒးအာပတ်ပါဋိဒေသနိက်ရ။ ပ္ဍဲခမဳဗြဴ ဟွံသေၚ်ကဵုကဠောမသဂှ် မၞုံကဵုစၟတ်သမ္တီကဠောမသဒှ်တုဲ နကဵုတဲဇကု ဒုၚ်ဂိုၚ်ကေတ်စၞစကီု ဘောဇိုန်ကီု နူတဲခမဳဗြဴဟွံသေၚ်ကဵုကဠော မလုပ်ကၠုၚ်အပ္ဍဲကွာန်တုဲ သ္ၚာဲလေဝ်သ္ၚာဲမ္ဂး စလေဝ်စမ္ဂး၊ ဒးအာပတ်ပါဋိဒေသနိက်ရ။
တၞဟ်နဖဵုအာဟာရ ဒုၚ်ဂိုၚ်ကေတ် ယာမကာလိက သတ္တာဟကာလိက ယာဝဇဳဝိကမ္ဂး၊ ဒးအာပတ်ဒုက္ကဋ်ရ။ ဇၟာပ်မၚိတ်ဖျေံ ဇၟာပ်မၚိတ်ဖျေံ ဒးအာပတ်ဒုက္ကဋ်ရ။ ကြက်သ္ၚာဲရ ကြက်ပြဘိုဂ်ရ ရဴဝွံ ဒုၚ်ဂိုၚ်ကေတ်စၞစကီု ဘောဇိုန်ကီု နူတဲခမဳဗြဴ မဒှ်ပယျၚ်ပ္ဍဲသၚ်မွဲလပါ်မ္ဂး၊ ဒးအာပတ်ဒုက္ကဋ်ရ။ ဇၟာပ်ၚိတ်ဖျေံ ဇၟာပ်ၚိတ်ဖျေံ ဒးအာပတ်ဒုက္ကဋ်ရ။ ပ္ဍဲခမဳဗြဴ ကဠောမသဂှ် မၞုံကဵုစၟတ်သမ္တီ ဟွံသေၚ်ကဵုကဠောမသမ္ဂး၊ ဒးအာပတ်ဒုက္ကဋ် ပ္ဍဲခမဳကဠောမသဂှ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲခမဳဗြဴကဠောမသဂှ် မၞုံကဵုစၟတ်သမ္တီ ကဠောမသမ္ဂး၊ ဟွံဒးအာပတ်ရ။
556) ပ္ဍဲခမဳဗြဴ မဒှ်ကဠောမသ ဟွံဒးအာပတ်ပတ်ရ၊ ဖအောဝ်ကဵုကဵုလေဝ် ဟွံကဵုမ္ဂး၊ ဖျေံစွံလဝ် ပ္ဍဲဇရေၚ်တုဲ ကဵုမ္ဂး၊ ကဵုပ္ဍဲအပ္ဍဲအာရှာမ် ဘာခမဳဗြဴ ဌာန်ဒၟံၚ်တဳဂမၠိုၚ် ဇြပ်ကဵုပိုဉ်မ္ဂး၊ ရၚ်တၠုၚ်ပတိတ်နူကွာန်တုဲ ကဵုမ္ဂး၊ “ဟိုတ်နွံမ္ဂး ဩဝ်သ္ပပြဘိုဂ်ညိ” ရဴဝွံ ကဵုတဴ ယာမကာလိက သတ္တဟကာလိက ယာဝဇဳဝိကမ္ဂး၊ ပ္ဍဲသိက္ခမာန် ကေုာံသာမဏဳဗြဴဂမၠိုၚ် ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ပဌမပါဋိဒေသနိက်သိက္ခာပိုဒ် တုဲရ။
