၆.၇.၁၀.၁။ ပွံက်ကဏ္ဋကသိက္ခာပိုဒ်
430) သာမဏဳ မ္ဂးဂှ် သ္ဂးတဴထပိုဲဟေၚ်ရ။ ရဴဝွံ ဟီုသ္ဂးရ မ္ဂးဂှ် ဓရ်ဂမၠိုၚ် တဳလမၞုံပိုဉ်ကျာ်တြဲ မတွံလဝ်ရဴဝွံမ္ဂး လေပ်သ္ပကဵုအန္တရာယ် (ၛာန်မဂ်ဖိုလ်) အိုတ်ဂှ် အတိုၚ်တွံလဝ်ဂှ် အဲတီကေတ်ရ၊ ဓရ်ဂမၠိုၚ်ဂှ် တၞဟ်နသ္ပကဵုအန္တရာယ် (ၛာန်မဂ်ဖိုလ်) ကုညးသိပ်ဂၠိပ်ဂှ် ဟွံသၟဟ်အစောံရ” ရဴဝွံ (ဟီုသ္ဂးမ္ဂး)။ သာမဏီဂှ် မ္ဂးဂှ် သာမဏဳမၞုံအလေံဟီုသ္ဂးရဴဝွံ။ ခမဳဂမၠိုၚ် မ္ဂးဂှ် ခမဳသအာၚ်ဂမၠိုၚ်။ ယြဴခမဳဂမၠိုၚ် ညာတ်အိုတ်ရ၊ ယြဴခမဳဂမၠိုၚ် မိၚ်အိုတ်ရ၊ ခမဳဂမၠိုၚ်ဂှ် “ယွံကောန်တၠသာမဏဳ လ္ပဟီုရဴဝွံညိ၊ လ္ပစောတ်စောဲ တဳလမၞုံပိုဉ်ကျာ်တြဲညိ၊ ပွမစောတ်စောဲ တဳလမၞုံပိုဉ်ကျာ်တြဲဂှ် ဟွံဆာဲသန်ရ၊ တဳလမၞုံပိုဉ်ကျာ်တြဲ ဟွံတွံရဴဝွံရ၊ ယွံကောန်တၠသာမဏဳ နကဵုဟိုတ်မဂၠိုၚ်ဂၠၚ် တဳလမၞုံပိုဉ်ကျာ်တြဲဂှ် ဓရ်မလေပ်သ္ပကဵုအန္တရာယ် (ၛာန်မဂ်ဖိုလ်) ဂမၠိုၚ်ဂှ် လေပ်သ္ပကဵုအန္တရာယ် (ၛာန်မဂ်ဖိုလ်) အိုတ်ရ ရဴဝွံ တွံလဝ်ရ၊ ဓရ်ဂမၠိုၚ်ဂှ်သၟဟ်အစောံ တၞဟ်နသ္ပကဵုအန္တရာယ် (ၛာန်မဂ်ဖိုလ်) ကုညးသိပ်ဂၠိပ်ဟေၚ်ရ” ရဴဝွံ သ္ဒးဟီုဒၠောံဗတောန်ရ။ မရနုက်ကဵုၜါဝါလေဝ် သ္ဒးဟီုဒၠောံဗတောန်ရ၊ မရနုက်ကဵုပိဝါလေဝ် သ္ဒးဟီုဒၠောံဗတောန်ရ။ ယဝ်သၠးကၠေံကွေတ်ဂှ်မ္ဂး ပွမသၠကၠေံဂှ် ခိုဟ်သန်ရ၊ ယဝ်ဟွံသၠးကၠေံမ္ဂး၊ ခမဳဂမၠိုၚ် ‘ယွံကောန်တၠသာမဏဳ သ္ပတမ်နူတ္ၚဲဝွံတုဲ တဳလမၞုံပိုဉ်ကျာ်တြဲဂှ် အ္စာရ ရဴဝွံလေဝ် တၠအဲလ္ပစၞောန်ထ္ၜးရ၊ သာမဏဳဂမၠိုၚ် မသအာၚ်နူတၠအဲဂှ် လုကဴၜါဗ္တံပိဗ္တံ ပွမတိတ်မွဲစွံ ကေုာံခမဳဂမၠိုၚ်လေဝ် ကလိဂွံအိုတ်ရ၊ တုပ်သၟဟ်သာ်ဂှ် ပွမတိက်မွဲစွံလေဝ် ဟွံမွဲကုတၠအဲရ၊ ဟာဲသာမဏဳ မဟဂပ်ဝ်သ္ဍိုက်မၠိုက် ဩဝ်ဗှေ်စ္ဍးအာထောံညိ၊ ဩဝ်ဗှေ်အာလေၚ်ထောံညိ’ ရဴဝွံ သ္ဒးဟီုကဵုသာမဏဳရ။ ယြဴ မ္ဂးဂှ် ယြဴဍေံမၞုံမၞုဴသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳဂ။ တီရ မ္ဂးဂှ် အလဵုဇကုလေဝ် တီရ၊ ညးသအာၚ်ဂမၠိုၚ်လေဝ် ဟီုလဴကဵုကုခမဳဂှ်အိုတ်ရ၊ သာမဏဳဂှ်လေဝ် ဟီုလဴစရ။ သာမဏဳမပလီုပလာ်ပြာမ်ထောံတုဲ မ္ဂးတုဲ သာမဏဳမပလီုပလာ်ပြာမ်ထောံတုဲ ရဴဝွံ။ သာမဏဳ မ္ဂးဂှ် သ္ဂးတဴထပိုဲဟေၚ်ရ။ လှေံလှန်လေဝ် လှေံလှန် မ္ဂးဂှ် ကြက်ကဵုဗဗေၚ်ကီု သ္ၚာကီု ပွမဗတောန်ပါဠိကီု ပွမဗတောန်အဋ္ဌကထာကီု ကုသာမဏဳဂှ်ဏောဝ် ရဴဝွံ လှေံလှန်မ္ဂး ဒးအာပတ်ပါဲစိုတ်ရ။ ကၠောန်ၜိုတ်လေဝ် ကဵုကၠောန်ၜိုတ် မ္ဂးဂှ် သာယျေန်တဴ ခၞိက်ကြကောတ်ကီု တိကမၠောန် ဆုဒကကီု ဍာ်လာၚ်မုက် သာမဏဳဂှ်ကီုမ္ဂး ဒးအာပတ်ပါဲစိုတ်ရ။ ပ္ဍဲအရာပြဘိုဂ်မွဲစွံ မ္ဂးဂှ် ပြဘိုဂ်မ္ဂးဂှ် ‘အာမိသသမ္ဘောဂ’ ပွမပြဘိုဂ်ဂြပ်ပစ္စယ် ‘ဓမ္မသမ္ဘောဂ’ ပွမပြဘိုဂ်ဓရ် ရဴဝွံ ပွမပြဘိုဂ်နွံဂကူရ။ ‘အာမိသသမ္ဘောဂ’ ပွမပြဘိုဂ်ဂြပ်ပစ္စယ်မ္ဂးဂှ် ကဵုအာမိသမပ္တံပိဏ္ဏ္ဍပါတ်မ္ဂး၊ ဒုၚ်ဂိုၚ်ကေတ်မ္ဂး၊ ဒးအာပတ်ပါဲစိုတ်ရ။ ‘ဓမ္မသမ္ဘောဂ’ ပွမပြဘိုဂ်ဓရ်မ္ဂးဂှ် ဗတောန်လေဝ်ဗတောန်ကဵုမ္ဂး၊ ဖအောဝ်လေဝ်ဖအောဝ်ကဵုဗတောန်မ္ဂး၊ ဗတောန်လေဝ်ဗတောန်ကဵု နပိုဒ်မ္ဂး၊ ဖအောဝ်လေဝ်ဖအောဝ်ကဵုဗတောန်မ္ဂး၊ ဇၟာပ်ပိုဒ် ဇၟာပ်ပိုဒ် ဒးအာပတ်ပါဲစိုတ်ရ။ ဗတောန်လေဝ်ဗတောန်ကဵု နအက္ခရ်မ္ဂး၊ ဖအောဝ်လေဝ်ဖအောဝ်ကဵုဗတောန်မ္ဂး ဇၟာပ်အက္ခရ် ဇၟာပ်အက္ခရ် ဒးအာပတ်ပါဲစိုတ်ရ။ မွဲစွံလေဝ်တိက်မ္ဂး မ္ဂးဂှ် ပ္ဍဲဘာမၞုံကဵုစၟဳမွဲဓဝ် သာမဏီမပလီုပလာ်ပြာမ်ထောံတုဲဂှ် တိက်ဒၟံက်နေဝ် ခမဳတိက်မ္ဂး၊ ဒးအာပတ်ပါဲစိုတ်ရ။ ခမဳတိက်ဒၟံၚ်နေဝ် သာမဏဳမပလီုပလာ်ပြာမ်ထောံတုဲဂှ် တိက်မ္ဂး၊ ဒးအာပတ်ပါဲစိုတ်ရ။ သီုညးၜါဇကု တိက်အိုတ်မ္ဂး ဒးအာပတ်ပါဲစိုတ်ရ။ ဒၠိုက်ကတဵုတုဲ ဂၠိုၚ်ဂၠိုၚ်ကဵုဝါ တိက်အိုတ်မ္ဂး ဒးအာပတ်ပါဲစိုတ်ရ။
431) ပ္ဍဲသာမဏဳမပလီုပလာ်ပြာမ်ထောံတုဲ မၞုံကဵုစၟတ်သမ္တီသာမဏဳမပလီုပလာ်ပြာမ်ထောံတုဲဒှ်တုဲ လှေံလှန်လေဝ် လှေံလှန်မ္ဂး၊ ကၠောန်ၜိုတ်လေဝ် ကဵုကၠောန်ၜိုတ်မ္ဂး၊ မွဲစွံလေဝ်ပြဘိုဂ်မ္ဂး၊ မွဲစွံလေဝ် တိက်မ္ဂး၊ ဒးအာပတ်ပါဲစိုတ်ရ။ ပ္ဍဲသာမဏဳမပလီုပလာ်ပြာမ်ထောံတုဲ မၞုဴကဵုသၠေဟ်ပၟာဒှ်တုဲ လှေံလှန်လေဝ် လှေံလှန်မ္ဂး၊ ကၠောန်ၜိုတ်လေဝ် ကဵုကၠောန်ၜိုတ်မ္ဂး၊ မွဲစွံလေဝ် ပြဘိုဂ်မ္ဂး၊ မွဲစွံလေဝ် တိက်မ္ဂး၊ ဒးအာပတ်ဒုက္ကဋ်ရ။ ပ္ဍဲသာမဏဳမပလီုပလာ်ပြာမ်ထောံတုဲ မၞုံကဵုစၟတ်သမ္တီသာမဏဳ မပလီုပလာ်ပြာမ်ထောံတုဲဟွံသေၚ်ဒှ်တုဲ လှေံလှန်လေဝ် လှေံလှန်မ္ဂး၊ ကၠောန်ၜိုတ်လေဝ် ကဵုကၠောန်ၜိုတ်မ္ဂး၊ မွဲစွံလေဝ်ပြဘိုဂ်မ္ဂး၊ မွဲစွံလေဝ် တိက်မ္ဂး ဒးအာပတ်ဒုက္ကဋ်။ ပ္ဍဲသာမဏဳမပလီုပလာ်ပြာမ်ထောံတုဲ မၞုံကဵုစၟတ်သမ္တီသာမဏဳ မပလီုပလာ်ပြာမ်ထောံတုဲမ္ဂး၊ ဒးအာပတ်ဒုက္ကဋ်ရ။ ပ္ဍဲသာမဏဳမပလီုပလာ်ပြာမ်ထောံတုဲ မၞုံကဵုသၠေဟ်ပၟာမ္ဂး ဒးအာပတ်ဒုက္ကဋ်ရ။ ပ္ဍဲသာမဏဳမပလီုပလာ်ပြာမ်ထောံတုဲ မၞုံကဵုစၟတ်သမ္တီသာမဏဳ မပလီုပလာပြာမ်ထောံတုဲမ္ဂး ဟွံဒးအာပတ်ရ။
432) သာမဏဳမပလီုပလာ်ပြာမ်ထောံတုဲဟွံသေၚ် ရဴဝွံ တီမ္ဂး၊ သၠးကၠေံကွေတ်မိစ္ဆာဂှ်တုဲရ ရဴဝွံ တီမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ကဏ္ဍကသိက္ခာပိုဒ် ဒသမတုဲရ။ သပ္ပါဏကဝဂ် သတ္တမတုဲရ။
