၆.၅.၁၀.၁။ ပွံက်စဳဝရအပနိဓာနသိက္ခာပိုဒ်
379) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ခမဳ မ္ဂးဂှ် ဒဒက်တဴခမဳမွဲသအာၚ်။ ဗဗေၚ် မ္ဂးဂှ် ဗဗေၚ်ပသဲ ဗဗေၚ်တိ ရဴဝွံ ဗဗေၚ်နွံၜါဂကူရ။ သ္ၚာ မ္ဂးဂှ် ပၞောဝ်သ္ၚာဂမၠိုၚ်တြဴဂတှေ် ဗွဲတွဵုမယုတ် သ္ၚာမွဲမွဲဂတှေ် မရုမ်ဂပ်ကဵုဝိကပ္ပနရ။ သၞာနိသဳဒိုန် မ္ဂးဂှ် သ္ဂးတဴသၞာမၞုံကဵုတသာဲရောၚ်။ ဒကိုအ်တၞိၚ် မ္ဂးဂှ် ဒကိုအ် (ဍေၚ်) မၞုံကဵုတၞိၚ် ဒကိုအ်ဟွံမွဲကဵုတၞိၚ်ရောၚ်။ ပၞုက်ကၠေံ မ္ဂးဂှ် အလဵုဇကု ပၞုက်ကၠေံမ္ဂး၊ ဒးအာပတ်ပဲါစိုတ်ရ။ ဖအောဝ်ကဵုပၞုက်ကၠေံ မ္ဂးဂှ် ဖအောဝ်ကဵုညးသအာၚ်မ္ဂး၊ ဒးအာပတ်ပဲါစိုတ်ရ။ သီုကဵုဖအောဝ် စကာမွဲအလန်ဂှ် ပၞုက်ကၠေံ ဗွဲမဂၠိုၚ်ကဵုအလန်မ္ဂး၊ ဒးအာပတ်ပဲါစိုတ်ရ။ ဗွဲတွဵုမယုတ် မမိက်ဂြိုၚ်ဝေၚ်ဒှ်တုဲလေဝ် မ္ဂးဂှ် မိက်ဝေၚ်ဂြိုၚ်ကတိုၚ်ကမှ်ဒှ်တုဲ။
380) ပ္ဍဲခမဳ မၞုံကဵုစၟတ်သမ္တီခမဳဒှ်တုဲ ဗဗေၚ် သ္ၚာ သၞာနိသဳဒိုန် ဒကိုအ် (ဍေၚ်) တၞိၚ် ဇုက်ကာယဗန် (မမိက်ကဵုမွဲမွဲ) ဂှ် ဗွဲတွဵုမယုတ် မမိက်ဂြိုၚ်ဝေၚ်ဒှ်တုဲလေဝ် ပၞုက်လေဝ်ပၞုက်ကၠေံမ္ဂး၊ ဖအောဝ်လေဝ်ဖအောဝ်ကဵုပၞုက်ကၠေံမ္ဂး ဒးအာပတ်ပဲါစိုတ်ရ။ ပ္ဍဲခမဳ မၞုံကဵုသၠေဟ်ပၟာဒှ်တုဲ ။ ပ ။ ပ္ဍဲခမဳ မၞုံကဵုစၟတ်သမ္တီ ခမဳဟွံသေၚ်ဒှ်တုဲ ဗဗေၚ် သ္ၚာ သၞာနိသိဒိုန် ဒကိုအ် (ဍေၚ်) တၞိၚ် ဇုက်ကာယဗန် (မမိက်ကဵုမွဲမွဲ) ဂှ် ဗွဲတွဵုမယုတ် မမိက်ဂြိုၚ်ဝေၚ်ဒှ်တုဲလေဝ် ပၞုက်လေဝ်ပၞုက်ကၠေံမ္ဂး၊ ဖအောဝ်လေဝ်ဖအောဝ်ကဵုပၞုက်ကၠေံမ္ဂး၊ ဒးအာပတ်ပဲါစိုတ်ရ။ ပရိက္ခရာအရပ်စပ်မွဲသအာၚ်ဂှ် ဗွဲတွဵုမယုတ် မမိက်ဂြိုၚ်ဝေၚ်ဒှ်တုဲလေဝ် ပၞုက်လေဝ်ပၞုက်ကၠေံမ္ဂး၊ ဖအောဝ်လေဝ်ဖအောဝ်ကဵုပၞုက်ကၠေံမ္ဂး၊ ဒးအာပတ်ဒုက္ကဋ်ရ။ ဗဗေၚ်ကဵုဒှ် သ္ၚာကဵုဒှ် ပရိက္ခရာသအာၚ်ကဵုဒှ် (ဂြပ်) ညးဟွံသေၚ်ကဵုခမဳဂှ် ဗွဲတွဵုမယုတ် မမိက်ဂြိုၚ်ဝေၚ်ဒှ်တုဲလေဝ် ပၞုက်လေဝ်ပၞုက်ကၠေံမ္ဂး၊ ဖအောဝ်လေဝ်ဖအောဝ်ကဵုပၞုက်ကၠေံမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံကဵုခမဳ မၞုံကဵုစၟတ်သမ္တီခမဳမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵု ခမဳမၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုစၟတ်သမ္တီ ညးဟွံသေၚ်ကဵုခမဳမ္ဂး၊ ဒးအာပတ်ဒုက္ကဋ်ရ။
381) သီုဟွံမွဲသဘဴမမိက်ဂြိုၚ်ဝေၚ်ဂှ် သီဂိုၚ်ဒေပ်လဝ်မ္ဂး၊ စွံလဝ်ဗွဲဟွံဒးရးဂှ် သီုဂိုၚ်ဒေပ်လဝ်မ္ဂး၊ “တွံကဵုဓရ်တုဲမှ ကြက်ကဵုရ” ရဴဝွံ စွံစိုတ်တုဲ သီဂိုၚ်ဒေပ်လဝ်မ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ စဳဝရအပနိဓာနသိက္ခာပိုဒ် ဒသမတုဲရ။ သုရာပနဝဂ် ဆဋ္ဌတုဲရ။
