၅.၉.၉.၁။ ပွံက်ဝဿိကသာဋိကသိက္ခာပိုဒ်

544) သ္ၚာသၞုက်ဗြဲ မ္ဂးဂှ် သ္ၚာမခၞံလဝ် တၞဟ်နဖဵုဂိတုဲဗြဲပန်ဂိတုရောၚ်။ ခမဳမၞုံပၟိက်ကဵုကၠောန်ခၞံ မ္ဂးဂှ် ကၠောန်ခၞံကီု ကဵုကၠောန်ခၞံကီု ဂပ်ဝ်ဒးကၠောန်ခၞံ သ္ၚာသၞုက်ဗြဲမစိုန်သကီုကေုာံဗၞတ်ဗ္ၜတ်ရ။ ပ္ဍဲသ္ၚာသၞုက်ဗြဲဂှ် ကြက်သ္ဂးဂတဝွံတုန် ဗၞတ်ဗ္ၜတ်ရောၚ်၊ နဍစၞေန်တဲကျာ် ဇမၠိၚ်တြဴဍ အနာံၜါဍဘာ်ဂမၠိုၚ်ရောၚ်၊ ကဵုကလိလောန်အာ လတူဗၞတ်ဗ္ၜတ်ဂှ်တုဲ ခၞံလေဝ်ကၠောန်ခၞံမ္ဂး၊ ဖအောဝ်လေဝ်ဖအောဝ်ကဵုကၠောန်ခၞံမ္ဂး၊ ဇၟာပ်ဇၟာပ်ပယောဂ ဒးအာပတ်ဒုက္ကဋ်ရ၊ ဟိုတ်ပွမကလိဂွံ ကုတ်ကၠေံ (မလောန်လတူဗၞတ်ဗ္ၜတ်) ဂှ်တုဲ သ္ဒးဒေသနာ အာပတ်ပဲါစိုတ်ရ။

545) သ္ၚာသၞုက်ဗြဲ အလဵုဇကု ခၞံလဝ်ဟွံစိုပ်ဒတုဲဏီဂှ် အလဵုဇကု ကဵုစိုပ်ဒတုဲမ္ဂး၊ ဒးအာပတ်ပဲါစိုတ်ရ။ သ္ၚာသၞုက်ဗြဲ အလဵုဇကု ခၞံလဝ်ဟွံစိုပ်ဒတုဲဏီဂှ် ကဵုညးသအာၚ်ဂမၠိုၚ်စိုပ်ဒတုဲမ္ဂး၊ ဒးအာပတ်ပဲါစိုတ်ရ။ သ္ၚာသၞုက်ဗြဲ ညးသအာၚ်ဂမၠိုၚ် ခၞံလဝ်ဟွံစိုပ်ဒတုဲဏီဂှ် အလဵုဇကု ကဵုစိုပ်ဒတုဲမ္ဂး၊ ဒးအာပတ်ပဲါစိုတ်ရ။ သ္ၚာသၞုက်ဗြဲ ညးသအာၚ်ဂမၠိုၚ် ခၞံလဝ်ဟွံစိုပ်ဒတုဲဏီဂှ် ကဵုညးသအာၚ်ဂမၠိုၚ် စိုပ်ဒတုဲမ္ဂး၊ ဒးအာပတ်ပဲါစိုတ်ရ။ တၞဟ်နသွက်ညးသအာၚ် ခၞံလေဝ်ကၠောန်ခၞံမ္ဂး၊ ဖအောဝ်လေဝ် ဖအောဝ်ကဵုကၠောန်ခၞံမ္ဂး၊ ဒးအာပတ်ဒုက္ကဋ်ရ၊ ကလိဂွံသ္ၚာသၞုက်ဗြဲ ညးသအာၚ်ခၞံလဝ်တုဲ ပြဘိုဂ်သုၚ်စောဲမ္ဂး၊ ဒးအာပတ်ဒုက္ကဋ်ရ။

546) ကၠောန်ခၞံသ္ၚာသၞုက်ဗြဲ မစိုန်သကီုကေုာံဗၞတ်ဗ္ၜတ်မ္ဂး၊ ကၠောန်ခၞံသ္ၚာသၞုက်ဗြဲယုတ်ဒေက် သၟဝ်ဗၞတ်ဗ္ၜတ်မ္ဂး၊ ကလိဂွံသ္ၚာသၞုက်ဗြဲ မလောန်လတူဗၞတ်ဗ္ၜတ် ညးသအာၚ်ခၞံလဝ်တုဲဂှ် ကုတ်ကၠေံတုဲ ပြဘိုဂ်သုၚ်စောဲမ္ဂး၊ ကၠောန်ခၞံ သၠဖ္ဍာန်ကီု သၞာလးတိကီု ယာတ်သၞိက်ကီု ဖုန်ကီု ဂၞဳကီုမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဝဿိကသာဋိကသိက္ခာပိုဒ် နဝမတုဲရ။