၅.၉.၈.၁။ ပွံက်ကဏ္ဍုပ္ပဋိစ္ဆာဒိသိက္ခာပိုဒ်

539) သ္ၚာဂြောပ်စောက် မ္ဂးဂှ် သ္ၚာမခၞံလဝ် တၞဟ်နဂြောပ်ယဲသၞော် ယဲခ္ဍတ်ဗြိုအ်မာ ယဲဍာ်သရဇွောဝ် ယဲခဴစိၚ်ဂမၠိုၚ် မၞုံပ္ဍဲသၟဝ်ပံၚ်ကဠုတ် လတူဗၞဳအဝဏ်တၚ်က္ၜံၚ် ယြဴခမဳမွဲရောၚ်။ ခမဳမၞုံပၟိက်ကဵုကၠောန်ခၞံ မ္ဂးဂှ် ကၠောန်ခၞံကီု ကဵုကၠောန်ခၞံကီု ဂပ်ဝ်ဒးကၠောန်ခၞံ သ္ၚာဂြောပ်စောက် မစိုန်သကီုကေုာံဗၞတ်ဗ္ၜတ်ရ။ ပ္ဍဲသ္ၚာဂြောပ်စောက်ဂှ် ကြက်သ္ဂးဂတဝွံတုန် ဗၞတ်ဗ္ၜတ်ရောၚ်၊ နဍစၞေန်တဲကျာ် ဇမၠိၚ်ပန်ဍ အနာံၜါဍဂမၠိုၚ်ရောၚ်၊ ကဵုကလိလောန်အာ လတူဗၞတ်ဗ္ၜတ်ဂှ်တုဲ ခၞံလေဝ်ကၠောန်ခၞံမ္ဂး၊ ဖအောဝ်လေဝ်ဖအောဝ်ကဵုကၠောန်ခၞံမ္ဂး၊ ဇၟာပ်ဇၟာပ်ပယောဂ ဒးအာပတ်ဒုက္ကဋ်ရ၊ ဟိုတ်ပွမကလိဂွံ ကုတ်ကၠေံ (မလောန်လတူဗၞတ်ဗ္ၜတ်) ဂှ်တုဲ သ္ဒးဒေသနာ အာပတ်ပဲါစိုတ်ရ။

540) သ္ၚာဂြောပ်စောက် အလဵုဇကု ခၞံလဝ်ဟွံစိုပ်ဒတုဲဏီဂှ် အလဵုဇကု ကဵုစိုပ်ဒတုဲမ္ဂး၊ ဒးအာပတ်ပဲါစိုတ်ရ။ သ္ၚာဂြောပ်စောက် အလဵုဇကု ခၞံလဝ်ဟွံစိုပ်ဒတုဲဏီဂှ် ကဵုညးသအာၚ်ဂမၠိုၚ် စိုပ်ဒတုဲမ္ဂး၊ ဒးအာပတ်ပဲါစိုတ်ရ။ သ္ၚာဂြောပ်စောက် ညးသအာၚ်ဂမၠိုၚ် ခၞံလဝ်ဟွံစိုပ်ဒတုဲဏီဂှ် အလဵုဇကု ကဵုစိုပ်ဒတုဲမ္ဂး၊ ဒးအာပတ်ပဲါစိုတ်ရ။ သ္ၚဂြောပ်စောက် ညးသအာၚ်ဂမၠိုၚ်ခၞံလဝ် ဟွံစိုပ်ဒတုဲဏီဂှ် ကဵုညးသအာၚ်ဂမၠိုၚ် စိုပ်ဒတုဲမ္ဂး၊ ဒးအာပတ်ပဲါစိုတ်ရ။ တၞဟ်နသွက်ညးသအာၚ် ခၞံလေဝ်ကၠောန်ခၞံမ္ဂး၊ ဖအောဝ်လေဝ်ဖအောဝ်ကဵုကၠောန်ခၞံမ္ဂး၊ ဒးအာပတ်ဒုက္ကဋ်ရ၊ ကလိဂွံသ္ၚာဂြောပ်စောက် ညးသအာၚ်ခၞံလဝ်တုဲ ပြဘိုဂ်သုၚ်စောဲမ္ဂး၊ ဒးအာပတ်ဒုက္ကဋ်ရ။

541) ကၠောန်ခၞံသ္ၚာဂြောပ်စောက် မစိုန်သကီုကေုာံဗၞတ်ဗ္ၜတ်မ္ဂး၊ ကၠောန်ခၞံသ္ၚာဂြောပ်စောက် ယုတ်ဒေက်သၟဝ်ဗၞတ်ဗ္ၜတ်မ္ဂး၊ ကလိဂွံသ္ၚာဂြောပ်စောက် မလောန်လတူဗၞတ်ဗ္ၜတ် ညးသအာၚ်ခၞံလဝ်တုဲဂှ် ကုတ်ကၠေံတုဲ ပြဘိုဂ်သုၚ်စောဲမ္ဂး၊ ကၠောန်ခၞံ သၠဖ္ဍာန်ကီု သၞာလးတိကီု ယတ်သၞိက်ကီု ဖုန်ကီု ဂၞဳကီုမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ကဏ္ဍုပ္ပဋိစ္ဆာဒိသိက္ခာပိုဒ် အဋ္ဌမတုဲရ။