၅.၉.၇။ နိသဳဒနသိက္ခာပိုဒ်
531) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလမၞုံပိုဉ်ကျာ်တြဲ ကဵုအနုညာတ်ကဵုအခေါၚ် သၞာနိသဳဒိုန် ကုခမဳဂမၠိုၚ်ရ။ ခမဳဆဗ္ဗဂ္ဂဳဂမၠိုၚ် “တဳလမၞုံပိုဉ်ကျာ်တြဲ ဂပ်ဝ်ကဵုအခေါၚ်သၞာနိသဳဒိုန်တုဲရ” ရဴဝွံ ပကၚ်ရၚ်လဝ် သၞာနိသဳဒိုန်ဂမၠိုၚ် ဟွံမွဲကဵုဗၞတ်ဗ္ၜတ်အိုတ်ရ၊ လကဲစှေ်ဒၟံၚ်နူဂတကီု နူကြဴကီု ဒဒက်တဴဇံၚ်ဂတဵုဂမၠိုၚ်အိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ပကၚ်ရၚ်လဝ် သၞာနိသဳဒိုန်ဂမၠိုၚ် မဟွံမွဲကဵုဗၞတ်ဗ္ၜတ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် ပကၚ်ရၚ်လဝ် သၞာနိသဳဒိုန်ဂမၠိုၚ် မဟွံမွဲကဵုဗၞတ်ဗ္ၜတ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် ပကၚ်ရၚ်လဝ် သၞာနိသဳဒိုန်ဂမၠိုၚ် မဟွံမွဲဗၞတ်ဗ္ၜတ်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ဂမၠိုၚ်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ခမဳမၞုံပၟိက်ကဵုကၠောန်ခၞံ သၞာနိသဳဒိုန်ဂှ် သ္ဒးကၠောန်ခၞံ သၞာနိသဳဒိုန်မစိုပ်သကီုကေုာံဗၞတ်ဗ္ၜတ်ရ၊ ပ္ဍဲသၞာနိသဳဒိုန်ဂှ် ကြက်သ္ဂးဂတဝွံတုန် ဗၞတ်ဗ္ၜတ်ရောၚ်၊ နဍစၞေန်တဲကျာ ဇမၠိၚ်ၜါဍ အနာံမွဲဍဘာ်ရောၚ်၊ ကုခမဳမကဵုကလိလောန်အာ လတူဗၞတ်ဗ္ၜတ်ဂှ် ဒးအာပတ်ပဲါစိုတ် မၞုံကဵုပွမဒးကုတ်ကၠေံရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
532) ပ္ဍဲအခိၚ်ဂှ် တဳလပိုဉ်ဥဒါယဳ မၞုံကဵုဇကုကာယမဇၞော်ရ၊ တဳလပိုဉ်ဥဒါယဳဂှ် လးသၞာနိသဳဒိုန် နူဂတတဳလမၞုံပိုဉ်ကျာ်တြဲတုဲ သီုမဒးတံၚ်ပၠးပတိတ်နူပွဳပွူဂှ် ဂဇအ်တဴရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ “ယွံဥဒါယဳ တၠအဲ မုဟိုတ် တံၚ်ပၠးဒၟံၚ်သၞာနိသဳဒိုန် နူပွဳပွူရော? သၟဟ်ညံၚ်ရဴသၟာစၞာံကိုပ်ကၠာရောၚ်” ရဴဝွံ သ္ဂးကဵုတဳလပိုဉ်ဥဒါယဳရ။ ယွံတဳလမၞုံပိုဉ် ဟိုတ်နူတဳလမၞုံပိုဉ်ကျာ်တြဲ ကဵုလဝ်အခေါၚ် သၞာနိသဳဒိုန်ဍောတ်လောန်ရောၚ် ရဴဝွံ (ဂရၚ်ပတီရ)။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲ “ယွံခမဳတအ် ပ္ဍဲသၞာနိသဳဒိုန်ဂှ် ကဵုအခေါၚ် တသာဲမွဲဍရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ 533) “ခမဳမၞုံပၟိက်အောန် ခၞံသၞာနိသဳဒိုန်ဂှ် သ္ဒးကၠောန်ခၞံ သၞနိသဳဒိုန်မစိုန်သကီုကေုာံဗၞတ်ဗ္ၜတ်ရ၊ ပ္ဍဲသၞာနိသဳဒိုန်ဂှ် ကြက်သ္ဂးဂတဝွံတုန် ဗၞတ်ဗ္ၜတ်ရောၚ်၊ နဍစၞေန်တဲကျာ် ဇမၠိုၚ်ၜါဍ အနာံမွဲဍဘာ် တသာဲတုန် မွဲဍရောၚ်၊ ကုခမဳမကဵုကလိလောန်အာ လတူဗၞတ်ဗ္ၜတ်ဂှ် ဒးအာပတ်ပဲါစိုတ် မၞုံကဵုပွမဒးကုတ်ကၠေံရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
