၅.၉.၅.၁။ ပွံက်ပဥ္စပဳဌသိက္ခာပိုဒ်
523) တၟိ မ္ဂးဂှ် သ္ပဟိုတ်ကဵုကၠောန်ခၞံတုဲ သ္ဂးရ။ ဇံၚ် မ္ဂးဂှ် ဇံၚ်မၞုံကဵုၝောံမပြိုက်စုတ်လဝ်ပ္ဍဲဇိုၚ် ဇံၚ်မၞုံကဵုၝောံကေုာံဇိုၚ်မွဲဗ္စပ်ဓဝ် ဇံၚ်မၞုံကဵုဇိုၚ်မတ္ၚံက်ညံၚ်ရဴၚာၚ်ဂတာမ် ဇံၚ်မၞုံကဵုဇိုၚ်မပြိုက်လဝ်ပ္ဍဲၝောံ ရဴဝွံ ဇံၚ်မၞုံပန်ဂကူဂမၠိုၚ်ရ။ ဂတဵု မ္ဂးဂှ် ခတဵုဒလာဲမၞုံကဵုၝောံမပြိုက်စုတ်လဝ်ပ္ဍဲဇိုၚ် ခတဵုဒလာဲမၞုံကဵုၝောံကေုာံဇိုၚ်မွဲဗ္စပ်ဓဝ် ခတဵုဒလာဲမၞုံကဵုဇိုၚ်မတ္ၚံက်ညံၚ်ရဴၚာၚ်ဂတာမ် ခတဵုဒလာဲမၞုံကဵုဇိုၚ်မပြိုက်လဝ် ပ္ဍဲၝောံ ရဴဝွံ ခတဵုဒလာဲမၞုံပန်ဂကူဂမၠိုၚ်ရ။ ခမဳမမိက်ကဵုခၞံ မ္ဂးဂှ် ခမဳမခၞံကီု ခမဳမကဵုခၞံကီု။ ဝေၚ်ကၠေံသၟဝ်ၝောံဇံၚ်တုဲ ဒးကဵုကၠောန်ခၞံဇံၚ်ဂတဵု မၞုံကဵုဇိုၚ်လပုဟ် နဍစၞေန်တဲကျာ်ရ မ္ဂးဂှ် ပဲါကၠေံသၟတ်ၝောံဇံၚ်တုဲ။ ကဵုကလိလောန်ဇိုၚ်လတူဒ္စာံလပုဟ်တုဲ ခၞံလေဝ်ကၠောန်ခၞံမ္ဂး၊ ဖအောဝ်လေဝ်ဖအောဝ်ကဵုကၠောန်ခၞံမ္ဂး၊ ဇၟာပ်ဇၟာပ်ပယောဂ ဒးအာပတ်ဒုက္ကဋ်ရ၊ ဟိုတ်ပွမကလိဂွံ ကုတ်ကၠေံဇိုၚ်ဇံၚ်ဂတဵုဂှ်တုဲ သ္ဒးဒေသနာ အာပတ်ပဲါစိုတ်ရ။
524) ဇံၚ်ဂတဵု အလဵုဇကု ခၞံလဝ်ဟွံစိုပ်ဒတုဲဏီဂှ် အလဵုဇကု ကဵုစိုပ်ဒတုဲမ္ဂး၊ ဒးအာပတ်ပဲါစိုတ်ရ။ ဇံၚ်ဂတဵု အလဵုဇကု ခၞံလဝ်ဟွံစိုပ်ဒတုဲဏီဂှ် ကဵုညးသအာၚ်ဂမၠိုၚ် စိုပ်ဒတုဲမ္ဂး၊ ဒးအာပတ်ပဲါစိုတ်ရ။ ဇံၚ်ဂတဵု ညးသအာၚ်ဂမၠိုၚ် ခၞံလဝ်ဟွံစိုပ်ဒတုဲဏီဂှ် အလဵုဇကု ကဵုစိုပ်ဒတုဲမ္ဂး၊ ဒးအာပတ်ပဲါစိုတ်ရ။ ဇံၚ်ဂတဵု ညးသအာၚ်ဂမၠိုၚ် ခၞံလဝ်ဟွံစိုပ်ဒတုဲဏီဂှ် ကဵုညးသအာၚ်ဂမၠိုၚ် စိုပ်ဒတုဲမ္ဂး၊ ဒးအာပတ်ပဲါစိုတ်ရ။ တၞဟ်နသွက်ညးသအၚ် ခၞံလေဝ်ကၠောန်ခၞံမ္ဂး၊ ဖအောဝ်လေဝ်ဖအောဝ်ကဵုကၠောန်ခၞံမ္ဂး၊ ဒးအာပတ်ဒုက္ကဋ်ရ၊ ကလိဂွံဇံၚ်ဂတဵု ညးသအာၚ်ခၞံလဝ်တုဲ ပြဘိုဂ်သုၚ်စောဲမ္ဂး၊ ဒးအာပတ်ဒုက္ကဋ်ရ။
525) ကၠောန်ခၞံဇံၚ်ဂတဵု မၞုံကဵုဗၞတ်ဗ္ၜတ်မ္ဂး၊ ကၠောန်ခၞံဇံၚ်ဂတဵု ယုတ်ဒေက်သၟဝ်ဗၞတ်ဗ္ၜတ်မ္ဂး၊ ကလိဂွံဇံၚ်ဂတဵု မလောန်လတူဗၞတ်ဗ္ၜတ် ညးသအာၚ်ခၞံလဝ်တုဲဂှ် ပြဘိုဂ်သုၚ်စောဲမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ပဉ္စပဳဌသိက္ခာပိုဒ် ပဉ္စမတုဲရ။
