၅.၉.၅။ ပဥ္စပဳဌသိက္ခာပိုဒ်

521) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် တိက်ဒၟံၚ် ပ္ဍဲဇံၚ်မသၠုၚ်ရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ မွဲဟာန်ကေုာံခမဳဂမၠိုၚ်ဗွဲမဂၠိုၚ် ဂေတ်ဂ္ၚေၚ်ဒေသစာရိတ် လၟေၚ်ဘာမ္ဂး ပြာပ်လုပ်အာဘာတဳလပိုဉ်ဥပနန္ဒ ကောန်သၟိၚ်သာကျဝၚ်ရ။ တဳလပိုဉ်ဥပနန္ဒ ကောန်သၟိၚ်သာကျဝၚ် သ္ဂောံညာတ်ကေတ် တဳလမၞုံပိုဉ်ကျာ်တြဲ မက္ညကၠုၚ်ဒၟံၚ်နူဇမ္ၚောဲတုဲ “ယွံတဳလမၞုံပိုဉ် ဩဝ်က္ညကၠုၚ်ညိကျာ်၊ ဩဝ်ဗဵုသ္ၚေဝ်ရံၚ် ဒၞဲါသတိက်အဲဍိက်ညိ” ရဴဝွံ ဂရၚ်ပတီရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ နူဌာန်ဂှ်ဟေၚ် ဂတးကလေၚ်တုဲ “ယွံခမဳတအ် န (အကာဲအရာ) ဗီုမံၚ်စံၚ်ဂှ် ထေက်ကဵုတီကေတ် ရဴဝွံမ္ဂး တြုံလ္ၚုသၟး (နူမဂ်ဖိုလ်ရ)” ရဴဝွံ သ္ဂးရ။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဟီုဂရိုဟ် တဳလပိုဉ်ဥပနန္ဒ ကောန်သၟိၚ်သာကျဝၚ် နဟိုတ်မဂၠိုၚ်ဂၠၚ်တုဲမ္ဂး ပွမဇြိုၚ်ကဵုလွဳမြိမြန်ဇကုဇကု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။

522) “ခမဳမမိက်ခၞံတဴ ဇံၚ်တၟိကီု ဂတဵုတၟိကီုဂှ် ဝေၚ်ကၠေံသၟဝ်ၝောံဇံၚ်တုဲ ဒးကဵုကၠောန်ခၞံဇံၚ်ဂတဵု မၞုံကဵုဇိုၚ်လပုဟ် နဍစၞေန်တဲကျာ်ရ၊ ကုခမဳကဵုကလိလောန်အာဇိုၚ် လတူဒ္စာံလပုဟ်ဂှ် ဒးအာပတ်ပဲါစိုတ် မၞုံကဵုပွမဒးကုတ်ကၠေံဇိုၚ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂး)။