၅.၉.၃။ ဝိကာလဂါမပ္ပဝိသနသိက္ခာပိုဒ်
508) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် ပ္ဍဲအခိၚ်တ္ၚဲစေၚ် လုပ်အာကွာန်တုဲ ဂဇအ်ဒၟံၚ်ပေဲါသဘၚ်တုဲမ္ဂး ဟီုဒၟံၚ်ဂလာန်တၞဟ်တၞဟ် မဒှ်ဒစဵုဒစးကဵုမဂ်ဖိုလ်အိုတ်ရ။ ဂလာန်မဒစဵုဒစးဂှ် ညးဍေံဂှ်ရော? ဂလာန်မစပ်ကဵုသၟိၚ် ဂလာန်မစပ်ကဵုကမၠတ် ဂလာန်မစပ်ကဵုအမာတ်ဇၞော် ဂလာန်မစပ်ကဵုဒပ်ပၞာန် ဂလာန်မစပ်ကဵုဘဲဖေက်ဂၟံက် ဂလာန်မစပ်ကဵုတဝ်စၞေဟ်ပၞာန် ဂလာန်မစပ်ကဵုစၞစ ဂလာန်မစပ်ကဵုစၞသုၚ် ဂလာန်မစပ်ကဵုယာတ်ဗွိုက်လတက် ဂလာန်မစပ်ကဵုဒၞာဲသတိက် ဂလာန်မစပ်ကဵုပ္ကဴဩဴ ဂလာန်မစပ်ကဵုမြမောဝ် ဂလာန်မစပ်ကဵုကလောဒညာတ် ဂလာန်မစပ်ကဵုယာန် ဂလာန်မစပ်ကဵုကွာန် ဂလာန်မစပ်ကဵုနိဂီု ဂလာန်မစပ်ကဵုဍုၚ် ဂလာန်မစပ်ကဵုဇနပိုဒ် (ရး) ဂလာန်မစပ်ကဵုမၞိဟ်ဗြဴ (ဂလာန်မစပ်ကဵုမၞိဟ်တြုံ) ဂလာန်မစပ်ကဵုသရာဲသဂံၚ် ဂလာန်မစပ်ကဵုဂၠံၚ် ဂလာန်မစပ်ကဵုသၞေဟ်ဍာ် ဂလာန်မစပ်ကဵုညးစုတိ ကလိလောန်အာတုဲ ဂလာန်တၟေၚ်တၟဟ်တၞဟ်တၞဟ်သာ် ဂလာန်မစပ်ကဵု ဟိုတ်ပရူပရာလောက ဂလာန်မစပ်ကဵုဟိုတ်ပရူပရာမှာသၟိဒ် ဂလာန်မစပ်ကဵုပွမဇၞော်မောဝ် ပွမဟုတ်ယုတ်ဂမၠိုၚ်ရောၚ်။ မၞိဟ်ဂမၠိုၚ် “ခမဳဂမၠိုၚ် မဒှ်တၞောဝ်ကျာ်ကောန်သၟိၚ်သာကျဝၚ် အခိၚ်တ္ၚဲစေၚ် လုပ်အာကွာန်တုဲ ဂဇအ်ဒၟံၚ်ပေဲါသဘၚ်တုဲမ္ဂး ညံၚ်ရဴမၞိဟ်ဒုၚ်စသိုၚ်ကာမဂုဏ်ဂမၠိုၚ်ကီု ဟီုသ္ဂးဒၟံၚ်ဂလာန်တၞဟ်တၞဟ် မဒှ်ဒစဵုဒစးကဵုမဂ်ဖိုလ်အိုတ်ရော? ဂလာန်မဒစဵုဒစးဂှ် ညးဍေံဂှ်ရော? ဂလာန်မစပ်ကဵုသၟိၚ် ဂလာန်မစပ်ကဵုကမၠတ် ။ ပ ။ ဂလာန်မစပ်ကဵုပွမဇၞော်မောဝ် ပွမဟုတ်ယုတ်ဂမၠိုၚ်ရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ် ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ပ္ဍဲအခိၚ်တ္ၚဲစေၚ် လုပ်အာကွာန်တုဲ ဂဇအ်ဒၟံၚ်ပေဲါသဘၚ်တုဲမ္ဂး ဟီုဒၟံၚ်ဂလာန်တၞဟ်တၞဟ် မဒှ်ဒစဵုဒစးကဵုမဂ်ဖိုလ်အိုတ်ရော? ဂလာန်မဒစဵုဒစးဂှ် ညးဍေံဂှ်ရော? ဂလာန်မစပ်ကဵုသၟိၚ် ဂလာန်မစပ်ကဵုကမၠတ် ။ ပ ။ ဂလာန်မစပ်ကဵုပွမဇၞော်မောဝ် ပွမဟုတ်ယုတ်ဂမၠိုၚ်ရောၚ်” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် ပ္ဍဲအခိၚ်တ္ၚဲစေၚ် လုပ်အာကွာန်တုဲ ဂဇအ်ဒၟံၚ်ပေဲါသဘၚ်တုဲမ္ဂး ဟီုဒၟံၚ်ဂလာန်တၞဟ်တၞဟ် မဒှ်ဒစဵုဒစးကဵုမဂ်ဖိုလ်အိုတ်ရ ဟီုဂှ် ဍာံပြရဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် ပ္ဍဲအခိၚ်တ္ၚဲစေၚ် လုပ်အာကွာန်တုဲ ဂဇအ်ဒၟံၚ်ပေဲါသဘၚ်တုဲမ္ဂး ဟီုဒၟံၚ်ဂလာန်တၞဟ်တၞဟ် မဒှ်ဒစဵုဒစးကဵုမဂ်ဖိုလ်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ ပ္ဍဲအခိၚ်တ္ၚဲစေၚ် လုပ်အာကွာန်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
509) ပ္ဍဲအခိၚ်ဂှ် ခမဳဂမၠိုၚ်ဗွဲမဂၠိုၚ် အာဍုၚ်သာရဝှ်ဂှ် ပ္ဍဲဇနပိုဒ်ကောသလရးဂမၠိုၚ်မ္ဂး ပ္ဍဲအခိၚ်သဝ်တ္ၚဲ စိုတ်အာကွာန်မွဲအိုတ်ရ။ မၞိဟ်ဂမၠိုၚ် ညာတ်ဒးခမဳဂမၠိုၚ်ဂှ်တုဲ “ယွံတဳလပိုဉ်တအ် ဩဝ်က္ညလုပ်ကွာန်အိုတ်ညိ” ရဴဝွံ ဂရၚ်ပတီအိုတ်ရ။ ပ္ဍဲအခိၚ်ဂှ် ခမဳဂမၠိုၚ် “ဟိုတ်နူတဳလမၞုံပိုဉ်ကျာ်တြဲ ဆေဝ်ဒဝ်လဝ် ပွမလုပ်ကွာန် ပ္ဍဲအခိၚ်တ္ၚဲစေၚ်ဂှ်ရ ဟွံဂပ်ဝ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဒှ်တုဲ ဟွံလုပ်အိုတ်ရ။ ဒမၠမတာဂမၠိုၚ် ပၠံၚ်ဗတိုက်ခမဳဂမၠိုၚ်ဂှ်အိုတ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် အာဍုၚ်သာရဝှ်တုဲ ဟီုလဴဗ္စ ဟိုတ်ပရူပရာဝွံ ကုခမဳဂမၠိုၚ်အိုတ်ရ။ ခမဳဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲ “ယွံခမဳတအ် ပ္ဍဲအခိၚ်တ္ၚဲစေၚ် အာတ်ပါန်အခေါၚ်တုဲ တၞဟ်နပွမလုပ်ကွာန်ဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ ပ္ဍဲအခိၚ်တ္ၚဲစေၚ် ဟွံအာတ်ပါန်အခေါၚ်တုဲ လုပ်အာကွာန်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
510) ပ္ဍဲအခိၚ်ဂှ် ခမဳမွဲဇကု အာဍုၚ်သာရဝှ် ပ္ဍဲဇနပိုဒ်ကောသလရးဂမၠိုၚ်မ္ဂး ပ္ဍဲအခိၚ်သဝ်တ္ၚဲ စိုပ်အာကွာန်မွဲရ။ မၞိဟ်ဂမၠိုၚ် ညာတ်ဒးခမဳဂှ်တုဲ “ယွံတဳလပိုဉ် ဩဝ်က္ညလုပ်ကွာန်ညိ” ရဴဝွံ ဂရၚ်ပတီအိုတ်ရ။ ပ္ဍဲအခိၚ်ဂှ် ခမဳဂှ် “ဟိုတ်နူတဳလမၞုံပိုဉ်ကျာ်တြဲ ဆေဝ်ဒဝ်လဝ် ပွမလုပ်ကွာန် ပ္ဍဲအခိၚ်တ္ၚဲစေၚ် သီုဟွံအာတ်ပါန်အခေါၚ် ဟွံဂပ်ဝ်ဂှ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဒှ်တုဲ ဟွံလုပ်ရ။ ဒမၠမတာဂမၠိုၚ် ပၠံၚ်ဗတိုက်ခမဳဂှ်အိုတ်ရ။ ပ္ဍဲအခိၚ်ဂှ် ခမဳဂှ် အာဍုၚ်သာရဝှ်တုဲ ဟီုလဴဗ္စ ဟိုတ်ပရူပရာဝွံ ကုခမဳဂမၠိုၚ်အိုတ်ရ။ ခမဳဂမၠိုၚ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန် ဓရ်တုဲ “ယွံခမဳတအ် ပ္ဍဲအခိၚ်တ္ၚဲစေၚ် အာတ်ပါန်အခေါၚ်ခမဳမၞုံပြာကဋ်တုဲ တၞဟ်နပွမလုပ်ကွာန်ဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ ပ္ဍဲအခိၚ်တ္ၚဲစေၚ် ဟွံအာတ်ပါန်အခေါၚ် ခမဳမၞုံပြာကဋ်တုဲ လုပ်အာကွာန်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
511) ပ္ဍဲအခိၚ်ဂှ် ဇြုံဒွံစုတ် ခမဳမွဲဇကု၊ ခမဳသအာၚ်ဂှ် “ဟိုတ်နူတဳလမၞုံပိုဉ်ကျာ်တြဲ ဆေဝ်ဒဝ်လဝ် ပွမလုပ်ကွာန် ပ္ဍဲအခိၚ်တ္ၚဲစေၚ် သီုဟွံအာတ်ပါန်အခေါၚ် ခမဳမၞုံပြာကဋ် ဟွံဂပ်ဝ်ဂှ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဒှ်တုဲ ဟွံလုပ်ရ၊ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ တွံကဵုဂလာန်ဓရ်တုဲ “ယွံခမဳတအ် ပ္ဍဲအခိၚ်တ္ၚဲစေၚ် ကိစ္စကေၚ်ကာမထေက်ကဵုသ္ပ ဗွဲမဃရက်ဂဗက်မဖှ်သာ်ဂှ်နွံမ္ဂး အာတ်ပါန်အခေါၚ် ခမဳမၞုံပြာကဋ်တုဲ တၞဟ်နပွမလုပ်ကွာန်ဂှ် ကဵုအခေါၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
512) “ယြဴခမဳမွဲ ဝေၚ်ကၠေံကိစ္စကေၚ်ကာမထေက်ကဵုသ္ပ ဗွဲမဃရက်ဂဗက် မဖှ်သာ်ဂှ်တုဲ ပ္ဍဲအခိၚ်တ္ၚဲစေၚ် ဟွံအာတ်ပါန်အခေါၚ် ခမဳမၞုံပြာကဋ်တုဲ လုပ်အာကွာန်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
