၅.၉.၂.၁။ ပွံက်ရတာသိက္ခာပိုဒ်

506) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ရတ် မ္ဂးဂှ် ဗၠဲ မၞိက် မၞိက်မတ်ဗ္ဂဲ (မၞိက်စၞာံဒုန်) ကၞုသၚ် တၟံ (တၟံဗိုတ်) သိဠာ (မဂွါ) သြန်ထဝ် မၞိက်ဗကေတ် မၞိက်ဒဝါန် (မၞိက်အပြံက်) ရောၚ်။ ဝတ္ထုမဂပ်ဝ်သၟိတ်ဂးရတ် မ္ဂးဂှ် အရပ်စပ်သုၚ်စောဲအပ္ဍဲကီု အရပ်စပ်သုၚ်စောဲမ္ၚးမၞိဟ်ဂမၠိုၚ်ကီုရောၚ်၊ ဣဝွံတုန် ဝတ္ထုမဂပ်ဝ်သၟိတ်ဂးရတ်မ္ဂးရ။ ဝေၚ်ကၠေံအပ္ဍဲအာရှာမ်ဘာ ကေုာံအပ္ဍဲသ္ၚိမဒှ်ဌာန်ဒတန်ဇူဒီုတုဲ မ္ဂးဂှ် ပါဲကၠေံအပ္ဍဲအာရှာမ်ဘာ အပ္ဍဲသ္ၚိမဒှ်ဌာန်ဒတန်ဇူဒီုတုဲ။ အပ္ဍဲအာရှာမ်ဘာ မ္ဂးဂှ် အာစဵုဗိုၚ်ဒပ်ကၟာၚ်နွံမ္ဂး အပ္ဍဲအာရှာမ်သ္ၚိမဒှ်ဌာန်ဒတန်ဇူဒီုရောၚ်၊ အာစဵုဗိုၚ်ဒပ်ကၟာၚ် ဟွံမွဲမ္ဂး ဥပစာ (သ္ၚိမဒှ်ဌာန်ဒတန်ဇူဒီု) ရောၚ်။ လပှ်ဂိုၚ်ကေတ် မ္ဂးဂှ် အလဵုဇကု လပှ်ဂိုၚ်ကေတ်မ္ဂး၊ ဒးအာပတ်ပါဲစိုတ်ရ။ ဖအောဝ်ကဵုလပှ်ဂိုၚ်ကေတ် မ္ဂးဂှ် ဖအောဝ်ကဵုညးသအာၚ် လပှ်ဂိုၚ်ကေတ်မ္ဂး၊ ဒးအာပတ်ပါဲစိုတ်ရ။ ခမဳဂှ် လပှ်ဂိုၚ်ကေတ် ရတ်ကီု ဝတ္ထုမဂပ်ဝ်သၟိတ်ဂးရတ်ကီု ပ္ဍဲအပ္ဍဲအာရှာမ်ဘာ ကေုာံပ္ဍဲအပ္ဍဲသ္ၚိမဒှ်ဌာန်ဒတန်ဇူဒီုကီု ဖအောဝ်ကဵုလပှ်ဂိုၚ်ကေတ်တုဲကီု သ္ဒးစွံပတန်လဝ်ရ မ္ဂးဂှ် ပသမ္တီလဝ် ဗွဲအစောံရုပ်သာ်ကီု ဗွဲစၟတ်သမ္တီတုဲ သီဒေပ်စွံလဝ်တုဲမ္ဂး “ညးဂြပ်ကၠေံဂှ် ဩဝ်ကဵုကၠုၚ်ညိ” ရဴဝွံ သ္ဒးကဵုလၟိၚ်ရ။ ယဝ်ကၠုၚ်ဌာန်ဂှ်မ္ဂး၊ “ယွံဒကာ ဂပ်တၠအဲ မၞုံသဘဴသာ်လဵုရော?” ရဴဝွံ သ္ဒးသၟာန်ညးဂှ်ရ။ ကေုာံရုပ်သာ်ကီု ကေုာံစၟတ်သမ္တီကီု ယဝ်ညဳသၟဟ်ဍိုက်ပေၚ်မ္ဂး၊ သ္ဒးကဵုရ။ ယဝ်ဟွံညဳသၟဟ်ဟွံဍိုက်ပေၚ်မ္ဂ၊ “ယွံဒကာ ဩဝ်အာဂၠာဲကၠာညိ” ရဴဝွံ သ္ဒးဟီုရ။ ခမဳ မမိက်စ္ဍးအာနူဘာဂှ် စွံပတန်လဝ် ပ္ဍဲတဲခမဳဂမၠိုၚ်မဗဗွဲ ပ္ဍဲဘာဂှ်တုဲ သ္ဒးစ္ဍးအာရ၊ ယဝ်ခမဳဂမၠိုၚ်မဗဗွဲ ဟွံမွဲမ္ဂး၊ စွံပတန်လဝ် ပ္ဍဲတဲမၞိဟ်ဂမၠိုၚ်မဗဗွဲ ပ္ဍဲဘာဂှ်တုဲ သ္ဒးစ္ဍးအာရ။ ဣဝွံတုန် ဝတ်ထေက်ကဵုဒးသ္ပ ပ္ဍဲအရာမဝိုတ်ကၠေံဂြပ်ဂှ်ရောၚ် မ္ဂးဂှ် ပွမသီဒေပ်စွံလဝ်ဝွံ ပ္ဍဲအရာမဝိုတ်ကၠေံဂြပ်ဂှ် ဒ္ဂေတ်မဗဗွဲကဵုဓရ်ရောၚ်။ 507) ရတ်စှ်သာ်ကီု ဝတ္ထုမဂပ်ဝ်သၟိတ်ဂးရတ်ကီု ပ္ဍဲအပ္ဍဲအာရှာမ်ဘာ ကေုာံပ္ဍဲအပ္ဍဲသ္ၚိမဒှ်ဌာန်ဒတန်ဇူဒီု လပှ်ဂိုၚ်ကေတ်ကီု ဖအောဝ်ကဵုလပှ်ဂိုၚ်ကေတ်ကီု ‘တၠဂြပ် ကြက်ဂိုၚ်ကေတ်ရ’ ရဴဝွံ (ပၠုပ်စိုတ်တုဲ) စွံပတန်လဝ်မ္ဂး၊ ဟွံဒးအာပတ်ရ။ ဍုက်ကေဝ်ဒဒှ်ေဒယှ်တုဲ လပှ်ဂိုၚ်ကေတ် အရပ်စပ်သုၚ်စောဲ မဂပ်ဝ်သၟိတ်ဂးရတ်ကီုမ္ဂး၊ ဟွံဒးအာပတ်ရ၊ ဂိုၚ်ကေတ်ဗၞတ်မွဲခဏမ္ဂး၊ ဟွံဒးအာပတ်ရ၊ ကုခမဳမၞုံကဵုစၟတ်သမ္တီပံသုကူ ခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ရတနသိက္ခာပိုဒ် ဒုတိယတုဲရ။