၅.၉.၁၀။ နန္ဒသိက္ခာပိုဒ်

547) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်နန္ဒ မဒှ်ကောန်ဣစဳ တဳလမၞုံပိုဉ်ကျာ်တြဲဂှ် မၞုံကဵုရုပ်သာ်ကျေဝ်ဂေါဝ်လောန်ရ၊ ထေက်ကဵုဗဵုသ္ၚေဝ်ရ၊ မၞုံကဵုလျုၚ်ရ၊ ယုတ်ဒေက်သၟဝ် တဳလမၞုံပိုဉ်ကျာ်တြဲ ပန်လပုဟ်ရ၊ တဳလပိုဉ်နန္ဒဂှ် ပကၚ်ရၚ်လဝ်သ္ၚာ မၞုံဗၞတ်ဗ္ၜတ်သ္ၚာကျာ်ရ။ ခမဳဂမၠိုၚ် မဒှ်ထေရ်ဇၞော်ဂမၠိုၚ် ညာတ်ဒးတၠဳပိုဉ်နန္ဒ မက္ညကၠုၚ်နူဇမ္ၚောဲတုဲ “တဳလမၞုံပိုဉ်ကျာ်တြဲ က္ညကၠုၚ်ရ” ရဴဝွံ ဒၠိုက်ကတဵုနူဒၞဲါအိုတ်ရ။ ခမဳထေရ်ဇၞော်ဂမၠိုၚ်ဂှ် ကြပ်ကၠုၚ်ဇရေၚ်မ္ဂး တီကေတ်အိုတ်တုဲ “မုဟိုတ် တဳလပိုဉ်နန္ဒ ပကၚ်ရၚ်လဝ်သ္ၚာ မၞုံဗၞတ်ဗ္ၜတ်သ္ၚာကျာ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံနန္ဒ တၠအဲ ပကၚ်ရၚ်လဝ်သ္ၚာ မၞုံဗၞတ်ဗ္ၜတ်သ္ၚာကျာ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံနန္ဒ တၠအဲ မုဟိုတ် ပကၚ်ရၚ်လဝ်သ္ၚာ မၞုံဗၞတ်ဗ္ၜတ်သ္ၚာကျာ်ရော?” ယွံနန္ဒ (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ်ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။

548) “ယြဴခမဳမွဲ ကဵုကၠောန်ခၞံ သ္ၚာမၞုံဗၞတ်ဗ္ၜတ်သ္ၚာကျာ်ကီု သ္ၚာမလောန်လတူဂှ်ကီုမ္ဂး (ကုခမဳဂှ်) ဒးအာပတ်ပဲါစိုတ် မၞုံကဵုပွမဒးကုတ်ကၠေံရ၊ ပ္ဍဲအရာဗၞတ်ဗ္ၜတ်သ္ၚာကျာ်ဂှ် ကြက်သ္ဂးဂတဝွံတုန် ဗၞတ်ဗ္ၜတ်သ္ၚာကျာ်ရောၚ်၊ နဍစၞေန်တဲကျာ် နူဇမၠိၚ်ဒ္စိတ်ဍ နူအနာံတြဴဍဂမၠိုၚ်ရောၚ်၊ ဣဝွံတုန် ဗၞတ်ဗ္ၜတ်သ္ၚာကျာ်ရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။