၅.၉.၁.၁။ ပွံက်အန္တေပုရသိက္ခာပိုဒ်
499) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ် နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ဂကူသၟိၚ် မ္ဂးဂှ် ညးနူလပါ်မိလပါ်မ သီုၜါလပါ်ဂမၠိုၚ် မၞုံကဵုဇာတ်ခိုဟ်ဆာဲရ၊ စဵုကဵုအပါဇၞော် အပါနက်ထပှ်ဒတောဝ် မၞုံကဵုဗုၚ်ဂၞဴပမိ မသအအးဇ္ၚးရ၊ ဟွံဒးဒုၚ်ပါဲကၠေံ နဂလာန်မစပ်ကေုာံဇာတ်ရ၊ဟွံဒးဒုၚ်ဟီုဂရိုဟ်ရ။ ဍေံမဂပ်ဝ်စဝ်လဝ်အဘိသိက် ပ္ဍဲက္ဍိုပ်တုဲ မ္ဂးဂှ် မဂပ်ဝ်စဝ်လဝ် နအဘိသိက်သၟိၚ် ပ္ဍဲက္ဍိုပ်တုဲဒှ်ရ။ သၟိၚ်မဟဂွံတိတ်ကၠုၚ်ဏီ မ္ဂးဂှ် သၟိၚ်မဟဂွံတိတ်ကၠုၚ် နူဂၠမ်သတိက်ဟေၚ် မဒှ်ရ။ ရတ်ဂၞကျာ်မဟဂွံတိတ်ကၠုၚ်ဏီ မ္ဂးဂှ် ရတ်ဂၞကျာ်မဟဂွံတိတ်ကၠုၚ် နူဂၠမ်သတိက်ဟေၚ်မဒှ်ရ၊ သီုညးၜါတၠဂမၠိုၚ်လေဝ် ဟဂွံတိတ်ကၠုၚ်အိုတ်ဏီရ။ ဟွံဂရၚ်ပတီလဴဗ္စ (ဒဒှ်ဇကုမကၠုၚ်) ပ္ဍဲကိုပ်ကၠာတုဲ မ္ဂးဂှ် ဟွံဂရၚ်ပတီလဴဗ္စ ‘ဟွံကဵုပရိုၚ်’ ပ္ဍဲကိုပ်ကၠာတုဲ။ ဒၟုၚ်တြၚ် မ္ဂးဂှ် သ္ဂးတဴဒၟုၚ်တြၚ်ဂၠမ်သတိက်ရ။ ဂၠမ်သတိက် မ္ဂးဂှ် ပ္ဍဲဒၞါဲမမိက်ကဵုမွဲ လးလဝ် သၞာသတိက်သၟိၚ်ရ၊ ဗွဲတွဵုမယုတ် ဒၞါဲမစဵုလဝ် ယာတ်သၞိက်လေဝ် ဂၠမ်သတိက်မ္ဂးရ။
500) ပ္ဍဲမဟွံဂရၚ်ပတီလဴဗ္စ (ဒဒှ်ဇကုမကၠုၚ်) ဂှ် မၞုံကဵုစၟတ်သမ္တီ မဟွံဂရၚ်ပတီလဴဗ္စဒှ်တုဲ ကဵုကလိလောန် ဒၟုၚ်တြၚ်မ္ဂး၊ ဒးအာပတ်ပါဲစိုတ်ရ။ ပ္ဍဲမဟွံဂရၚ်ပတီလဴဗ္စဂှ် မၞုံကဵုသၠေဟ်ပၟာဒှ်တုဲ ကဵုကလိလောန် ဒၟုၚ်တြၚ်မ္ဂး၊ ဒးအာပတ်ပါဲစိုတ်ရ။ ပ္ဍဲမဟွံဂရၚ်ပတီလဴဗ္စဂှ် မၞုံကဵုစၟတ်သမ္တီဂရၚ်ပတီလဴဗ္စတုဲဒှ်တုဲ ကဵုကလိလောန် ဒၟုၚ်တြၚ်မ္ဂး၊ ဒးအာပတ်ပါဲစိုတ်ရ။ ပ္ဍဲမဂရၚ်ပတီလဴဗ္စတုဲဂှ် မၞုံကဵုစၟတ်သမ္တီ မဟွံဂရၚ်ပတီလဴဗ္စမ္ဂး၊ ဒးအာပတ်ဒုက္ကဋ်ရ။ ပ္ဍဲမဂရၚ်ပတီလဴဗ္စတုဲဂှ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲမဂရၚ်ပတီလဴဗ္စတုဲဂှ် မၞုံကဵုစၟတ်သမ္တီ ဂရၚ်ပတီလဴဗ္စတုဲမ္ဂး၊ ဟွံဒးအာပတ်ရ။
501) ဂရၚ်ပတီလဴဗ္စတုဲမ္ဂး ဟွံဒးအာပတ်ရ၊ ဂကူသၟိၚ်ဟွံသေၚ်မ္ဂး၊ ဒှ်ညးမဟဂပ်ဝ်စဝ်လဝ် နအဘိသိက်သၟိၚ်ဏီမ္ဂး၊ သၟိၚ်တိတ်ကၠုၚ် နူဂၠမ်သတိက်မ္ဂး၊ ဂၞကျာ်တိတ်ကၠုၚ် နူဂၠမ်သတိက်မ္ဂး၊ သၟိၚ်ဂၞကျာ်သီုညးၜါဂမၠိုၚ်လေဝ် တိတ်ကၠုၚ်နူဂၠမ်သတိက်အိုတ်မ္ဂး၊ ပ္ဍဲဂၠမ်သတိက်ဟွံသေၚ်မ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ အန္တေပုရသိက္ခာပိုဒ် ပဌမတုဲရ။
