၅.၉.၁။ အန္တေပုရသိက္ခာပိုဒ်
494) ပ္ဍဲအခိၚ်တဳလပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် သၟိၚ်ဇၞော်ပသေနဒဳကောသလဂှ် “ဩဝ်အာညိ၊ ဩဝ်သောၚ်ခ္ဍောၚ်သအးဇ္ၚးဥဒျာန်ညိ၊ ကြက်အာဥဒျာန်ရ” ရဴဝွံ ဖအောဝ်စကာပၟၚ်ဥဒျာန်ရ။ “ခိုဟ်သန်ရ ယွံတၠညးသၟိၚ်ဇၞော်” ရဴဝွံ ပၟၚ်ဥဒျာန်ဂှ် ဒုၚ်ဝန် ကုသၟိၚ်ဇၞော်ပသေနဒဳကောသလတုဲမ္ဂး၊ သောၚ်ခ္ဍောၚ်သအးဇ္ၚးဥဒျာန်မ္ဂး ဟိုတ်မဂွံညာတ်ကေတ် တဳလမၞုံပိုဉ်ကျာ်တြဲ မသ္ပဒတဴဂဇအ်ဒၟံၚ် ပ္ဍဲသၟဝ်တမ်ဆုမွဲဂှ်ရ ပြာပ်အာဇရေၚ်သၟိၚ်ဇၞော်ပသေနဒဳကောသလတုဲမ္ဂး “ယွံတၠညးသၟိၚ်ဇၞော် ဥဒျာန်တုန် သောၚ်ခ္ဍောၚ်သအးဇ္ၚးတုဲရ၊ ၜိုန်ဂှ် တဳလမၞုံပိုဉ်ကျာ်တြဲ မသ္ပဒတဴဂဇအ်ဒၟံၚ် ပ္ဍဲဥဒျာန်ဂှ်ရ” ရဴဝွံ ဂရၚ်ပတီရ။ ယွံသကအ် သဍေံရ၊ ပိုဲညးဂမၠိုၚ် ပြာပ်ခစတဳလမၞုံပိုဉ်ကျာ်တြဲဂှ် အိုတ်ရ ရဴဝွံ (ဟီုသ္ဂးရ)။ ပ္ဍဲအခိၚ်ဂှ် သၟိၚ်ဇၞော်ပသေနဒဳကောသလ အာဥဒျာန်တုဲ ပြာပ်အာဇရေၚ်တဳလမၞုံပိုဉ်ကျာ်တြဲရ။ ပ္ဍဲအဃောဂှ် ဥပးမွဲတၠ ပြာပ်ခစဒၟံၚ် တဳလမၞုံပိုဉ်ကျာ်တြဲရ၊ သၟိၚ်ဇၞော်ပသေနဒဳကောသလ သ္ဂောံညာတ်ကေတ် ဥပးမပြာပ်ခစဒၟံၚ် တဳလမၞုံပိုဉ်ကျာ်တြဲတုဲ ဖေက်ဖေက်ဒညဒညဂှ် ဒတူဒၟံၚ်ရ။ ပ္ဍဲကြဴနူဂှ် “တြုံဝွံ ဒှ်ဒၟံၚ်ညးပြာပ်ခစ တဳလမၞုံပိုဉ်ကျာ်တြဲတုဲ ဟွံတန်ဒှ်ညးယုတ်သဝ်ရ” ရဴဝွံ ကသပ်ဒှ် ကုသၟိၚ်ဇၞော်ပသေနဒဳကောသလတုဲ ပြာပ်အာဇရေၚ်တဳလမၞုံပိုဉ်ကျာ်တြဲတုဲမ္ဂး လ္ၚောဝ်သ္ပဝတ်တုဲ ဂဇအ်ဒမံၚ်ပ္ဍဲဒၞါဲမွဲရ။ ပ္ဍဲအခိၚ်ဂှ် ဥပးဂှ် ဗွဲမရှေ်သှေ်ရဴဂဴ တဳမၞုံပိုဉ်ကျာ်တြဲ လ္ၚောဝ်လေဝ်ဟွံလ္ၚောဝ် သၟိၚ်ဇၞော်ပသေနဒဳကောသလရ၊ တရဴလေဝ်ဟွံဒစးဒုၚ်တၠုၚ်ဂှ်ရ “တြုံဝွံ ပ္ဍဲအခိၚ်အဲကၠုၚ် မုဟိုတ် လ္ၚောဝ်လေဝ်ဟွံလ္ၚောဝ်ရော? တရဴလေဝ်ဟွံဒစးဒုၚ်တၠုၚ်ရော?” ရဴဝွံ ပွမဟွံမိပ်စိုတ် ဒှ်ကုသၟိၚ်ဇၞော် ပသေနဒဳကောသလရ၊ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ တီကေတ် သၟိၚ်ဇၞော်ပသေနဒဳကောသလ ဟွံမိပ်စိုတ်ဒှ်တုဲ “ယွံသၟိၚ်ဇၞော် ဥပးဝွံ လမိၚ်လညာတ်လေဝ်ဂၠိုၚ်ရ၊ ညးပါဠိအာဂီု ကၠုၚ်ပ္ဍဲပါၚ်လေဝ် ဒှ်ရ၊ ပွမသ္ဍိုက်မၠိုက်ထၞေန်စပ် ပ္ဍဲကာမဂုဏ်ဂမၠိုၚ်လေဝ် စာ်စ္ဍးရ” ရဴဝွံ သ္ဂးကဵုသၟိၚ်ဇၞော်ပသေနဒဳကောသလရ။ ပ္ဍဲအခိၚ်ဂှ် “ဥပးဝွံ ဟွံတန်ဒှ် ညးယုတ်သဝ်ရ၊ တဳလမၞုံပိုဉ်ကျာ်တြဲလေဝ် ထိုၚ်သးဒၟံၚ်ဂုဏ်ဥပးဝွံရ” ရဴဝွံ ကသပ်ဒှ် ကုသၟိၚ်ဇၞော်ပသေနဒဳကောသလတုဲ “ယွံဥပး အရာတၠအဲနွံပၟိက်ဂှ် ဟီုညိ” ရဴဝွံ သ္ဂးကဵုဥပးဂှ်ရ။ ခိုဟ်သန်ရ ယွံတၠညးသၟိၚ်ဇၞော် ရဴဝွံ (ဂရၚ်ပတီရ)။ ပ္ဍဲအခိၚ်ဂှ် နကဵုဂလာန်ဓရ် တဳလမၞုံပိုဉ်ကျာ် ကဵုသၟိၚ်ဇၞော်ပသေနဒဳကောသလ တီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲမ္ဂး သၟိၚ်ဇၞော်ပသေနဒဳကောသလ ဒၠိုက်ကတဵုနူဒၞါဲတုဲ လ္ၚောဝ်သ္ပဝတ်တဳလမၞုံပိုဉ်ကျာ်တြဲတုဲမ္ဂး သ္ပရှေ်သှေ်ရဴဂဴကၠာ ပါဲစ္ဍးအာရ။
495) ပ္ဍဲအခိၚ်ဂှ် သၟိၚ်ဇၞော်ပသေနဒဳကောသလ ဃောပဒတဴဒၟံၚ် ပ္ဍဲလတူပြာသာဒ်မပြဲ သ္ဂောံညာတ်ကေတ်ဥပးဂှ် မအာဒၟံၚ်ပ္ဍဲဂၠံၚ်ဍာန် သီုမရပ်လဝ်က္ဍိုၚ်ပ္ဍဲတဲတုဲ သကဵုကော်တုဲမ္ဂး “ယွံဥပး တၠအဲ မၞုံကဵုလမိၚ်လညာတ်ဂၠိုၚ်ရဂး၊ ဒှ်ညးပါဠိအာဂီု ကၠုၚ်ပ္ဍဲပါၚ်တုဲရဂး၊ ယွံဥပး အာတ်ပါန်အခေါၚ်ရ၊ ဩဝ်ဗတောန်ထ္ၜးဖျေံပတိုန်ဓရ် ကုဂကောံမောၚ်မ ပိုဲညးဂမၠိုၚ်ညိ” ရဴဝွံ သ္ဂးရ။ ယွံတၠညးသၟိၚ်ဇၞော် အဲဍိက် ဟိုတ်နူဟိုတ်တဳလပိုဉ်ဂမၠိုၚ်ဟေၚ် သ္ဂောံတီကေတ်ဓရ်၊ တဳလပိုဉ်မဆာဲဂမၠိုၚ်ဟေၚ် ကြက်ဗတောန်ထ္ၜးဖျေံပတိုန်ဓရ်ဂှ် ကုဂကောံမောၚ်မ တၠညးသၟိၚ်ဇၞော်အိုတ်ရ ရဴဝွံ (သ္ဂးရ)။ ပ္ဍဲအခိၚ်ဂှ် သၟိၚ်ဇၞော်ပသေနဒဳကောသလဂှ် “ဥပးဝွံတုန် ဟီုသ္ဂးဍာံစၟတ်ရသွံ” ရဴဝွံ (ပၠုပ်စိုတ်တုဲ) ပြာပ်အာဇရေၚ်တဳလပိုဉ်ကျာ်တြဲတုဲမ္ဂး လ္ၚောဝ်သ္ပဝတ်ဗွဲမရှေ်သှေ်ရဴဂဴ ဂဇအ်ဒၟံၚ်ပ္ဍဲဒၞါဲမွဲတုဲ “ယွံတဳလမၞုံပိုဉ် အာတ်ပါန်အခေါၚ်ရ၊ ဩဝ်ဗလးကဵု ခမဳမွဲဇကု မဗတောန်ထ္ၜးဖျေံပတိုန်ဓရ် ကုဂကောံမောၚ်မ ပိုဲဍိက်တအ်ညးဂမၠိုၚ်မာန်ညိ” ရဴဝွံ ဂရၚ်ပတီ တဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် နကဵုဂလာန်ဓရ် တဳလမၞုံပိုဉ်ကျာ် ကဵုသၟိၚ်ဇၞော်ပသေနဒဳကောသလ တိညာတ်ကေတ် (ဒတုဲဖဵုမြမောဝ်) ရ ။ ပ ။ သ္ပရှေ်သှေ်ရဴဂဴကၠာ ပါဲစ္ဍးအာရ။ ပ္ဍဲကြဴနူဂှ် တဳလမၞုံပိုဉ်ကျာ်တြဲဂှ် “ယွံအာနန္ဒ ဗတိုက်ဖအောဝ်ရ၊ ဩဝ်ဗတောန်ထ္ၜးဖျေံပတိုန်ဓရ် ကုဂကောံမောၚ်မသၟိၚ်ဇၞော်ညိ” ရဴဝွံ သ္ဂးကဵုတဳလပိုဉ်အာနန္ဒရ။ ခိုဟ်သန်ရ ယွံကျာ်မၞုံပိုဉ် ရဴဝွံ တဳလပိုဉ်အာနန္ဒ ဒုၚ်ဝန်ကုတဳလမၞုံပိုဉ်ကျာ်တြဲတုဲ ဗတောန်ထ္ၜးဖျေံပတိုန်ဓရ် ကုဂကောံမောၚ်မသၟိၚ်ဇၞော်ရ။ ပ္ဍဲအခိၚ်ဂှ် တဳလပိုဉ်အာနန္ဒ ပ္ဍဲအခိၚ်နူဂယး သၠောံရုၚ်လတက်ပဠေဝ်သ္ၚာတုဲ ဂိုၚ်ထ္ၜးကေတ်ဗဗေၚ်သ္ၚာတုဲမ္ဂး ပြာပ်စဴအာ သ္ၚိနန်သၟိၚ်ဇၞော်ပသေနဒဳကောသလရ။ 496) ပ္ဍဲအခိၚ်ဂှ် သၟိၚ်ဇၞော်ပသေနဒဳကောသလ မွဲဟာန်ကေုာံဂၞကျာ်မလ္လိကာ ပဒတဴဒၟံၚ်ပ္ဍဲဂၠမ်သတိက်ရ၊ ဂၞကျာ်ဇၞော်မလ္လိကာ ညာတ်ဒးတဳလပိုဉ်အာနန္ဒ မက္ညကၠုၚ်ဒၟံၚ်နူဇမ္ၚောဲတုဲ ဒၠိုက်ကတဵုဗွဲမပြဟ်ရ၊ ယာတ်သာ်မိတ်မကဠိတ်ကဠောတ်ဂှ် သၠောတ်စှေ်ရ၊ ပ္ဍဲအခိၚ်ဂှ် တဳလပိုဉ်အာနန္ဒ နူဌာန်ဂှ်ဟေၚ် ဂတးကလေၚ်တုဲ အာအာရှာမ်တုဲမ္ဂး ဟီုလဴဗ္စ ဟိုတ်ပရူပရာဝွံ ကုခမဳဂမၠိုၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်အာနန္ဒ သီုဟွံကဵုတီတဴ ဒဒှ်ဇကုမကၠုၚ်ဗွဲကိုပ်ကၠာဂှ် သ္ဂောံလုပ်အာပ္ဍဲသ္ၚိနန်သၟိၚ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ “ယွံအာနန္ဒ တၠအဲ သီုဟွံကဵုတီတဴ ဒဒှ်ဇကုမကၠုၚ်ဗွဲကိုပ်ကၠာဂှ် သ္ဂောံလုပ်အာ အပ္ဍဲသ္ၚိနနိသၟိၚ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံအာနန္ဒ တၠအဲ မုဟိုတ် သီုဟွံကဵုတီတဴ ဒဒှ်ဇကုမကၠုၚ်ဗွဲကိုပ်ကၠာဂှ် သ္ဂောံလုပ်အာ အပ္ဍဲသ္ၚိနန်သၟိၚ်ရော? ယွံအာနန္ဒ (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ဟီုဂရိုဟ်တုဲ ။ ပ ။ တွံကဵုဂလာန်ဓရ်တုဲမ္ဂး သ္ဂးတိုန်ကဵုခမဳဂမၠိုၚ်ရ။
*ဒုဟ်လုပ်နန်စှ်သာ် 497) ယွံခမဳတအ် ဒုဟ်ဂမၠိုၚ် ပ္ဍဲပွမလုပ်သ္ၚိနန်သၟိၚ် ဣဝွံစှ်သာ်ဂမၠိုၚ်ရ။ ညးမ္ဂးစှ်သာ်အိုတ်ဂှ်ရော?— (၁) ယွံခမဳတအ် ပ္ဍဲအခိၚ်ခမဳလုပ်ကၠုၚ် ဒၞါဲသၟိၚ်ကေုာံဂၞကျာ် ပဒတဴမွဲစွံဂှ် ဂၞကျာ်ဂှ်လေဝ် ညာတ်ဒးခမဳတုဲ လေပ်အီခၟောဒးရ၊ ခမဳဂှ်လေဝ် ညာတ်ဒးဂၞကျာ်တုဲ လေပ်အီခၟောံဒးရ၊ ပ္ဍဲအီခၟောံဒးသာ်ဂှ် “ခမဳကေုာံဂၞကျာ်ဂမၠိုၚ်ဝွံ မကလိလောန်တုဲကီု ကြက်ကလိလောန်ကီု ဒှ်အဆတ်ရ” ရဴဝွံ လေပ်ဒှ်ထေၚ်မှာ ကုသၟိၚ်ဇၞော်ရ၊ ယွံခမဳတအ် ဣဝွံတုန် ဒုဟ်ပ္ဍဲပွမလုပ်သ္ၚိနန် ပဌမရ။ (၂) ယွံခမဳတအ် တၞဟ်သအာၚ်မွဲပၠန်လေဝ် သၟိၚ်မ္ဂးဂှ် မၞုံကဵုကိစ္စကေၚ်ကာဂၠိုၚ်ရ၊ မၞုံကဵုကမၠောန်ထေက်ကဵုဒးသ္ပဂၠိုၚ်ရ၊ အာကၠုၚ်ကဵုဗြဴ ‘ဂၞကျာ်ဍောတ်’ မွဲတုဲလေဝ် သမ္တီဟွံဒးရ၊ ဗြဴဂှ် ပ္ဍဲအရာဂိုၚ်ကေတ်ဂၠမ်ဂဝ် (ပဋိသန္ဓိ) ဟိုတ်နူပွမအာကၠုၚ်သၟိၚ်ဂှ် “ပ္ဍဲဌာန်ဝွံ ပါဲနူခမဳတုဲ ညးမမိက်ကဵုမွဲမွဲ ဟွံလုပ်ရ၊ ဒှ်ကမၠောန်ပွ ခမဳဟာဟွံတီ” ရဴတွံ လေပ်ဒှ်ထေၚ်မှာ ကုသၟိၚ်ဇၞော်ရ၊ ယွံခမဳတအ် ဣဝွံတုန် ဒုဟ်ပ္ဍဲပွမလုပ်သ္ၚိနန် ဒုတိယရ။ (၃) ယွံခမဳတအ် တၞဟ်သအာၚ်မွဲပၠန်လေဝ် ပ္ဍဲအခိၚ်ရတ်မမိက်ကဵုမွဲမွဲ ကၠေံနှၚ်အာပ္ဍဲအပ္ဍဲသ္ၚိနန်ဂှ် “ပ္ဍဲဌာန်ဝွံ ပါဲနူခမဳတုဲ ညးမမိက်ကဵုမွဲမွဲ ဟွံလုပ်ရ၊ ဒှ်ကမၠောန်ပွ ခမဳဟာဟွံတီ” ရဴဝွံ လေပ်ဒှ်ထေၚ်မှာ ကုသၟိၚ်ဇၞော်ရ၊ ယွံခမဳတအ် ဣဝွံတုန် ဒုဟ်ပ္ဍဲပွမလုပ်သ္ၚိနန် တတိယရ။ (၄) ယွံခမဳတအ် တၞဟ်သအာၚ်မွဲပၠန်လေဝ် ပ္ဍဲအခိၚ်ဂလာန်ချပ်ဂၞန် ပရေၚ်ကိစ္စသ္ၚိနန်မပၞုက်ဓလုက်လဝ် ပ္ဍဲအပ္ဍဲသ္ၚိန် ပြးတိတ်ကၠုၚ်လပါ်မ္ၚးဂှ် “ပ္ဍဲဌာန်ဝွံ ပါဲနူခမဳတုဲ ညးမမိက်ကဵုမွဲ ဟွံလုပ်ရ၊ ဒှ်ကမၠောန်ပွ ခမဳဟာဟွံတီ” ရဴဝွံ လေပ်ဒှ်ထေၚ်မှာ ကုသၟိၚ်ဇၞော်ရ၊ ယွံခမဳတအ် ဣဝွံတုန် ဒုဟ်ပ္ဍဲပွမလုပ်သ္ၚိနန် စတုတ္ထရ။ (၅) ယွံခမဳတအ် တၞဟ်သအာၚ်မွဲပၠန်လေဝ် ပ္ဍဲအပ္ဍဲသ္ၚိနန် ကောန်လေဝ် လေပ်နွံပၟိက် (တၞဟ်နဂစိုတ်) မအံက်ရ၊ မအံက်လေဝ် လေပ်နွံပၟိက် (တၞဟ်နဂစိုတ်) ကောန်ရ၊ “ပ္ဍဲဌာန်ဝွံ ပါဲနူခမဳတုဲ ညးမမိက်ကဵုမွဲမွဲ ဟွံလုပ်ရ၊ ဒှ်ကမၠောန်ပွ ခမဳဟာဟွံတီ” ရဴဝွံ လေပ်ဒှ်ထေၚ်မှာ ကုသၟိၚ်ဇၞော်ရ၊ ယွံခမဳတအ် ဣဝွံတုန် ဒုဟ်ပ္ဍဲပွမလုပ်သ္ၚိနန် ပဉ္စမရ။ (၆) ယွံခမဳတအ် တၞဟ်သအာၚ်မွဲပၠန်လေဝ် ပ္ဍဲအခိၚ်သၟိၚ် ခါန်ကၞက်စွံပတန် ညးမၞုံကဵုဌာနန္တရဂုဏ်မသဝ် ပ္ဍဲဌာနန္တရဂုဏ်မသၠုၚ်ဂှ် “သၟိၚ် နှဴရဴဒၟံၚ် ကေုာံခမဳရ၊ ဒှ်ကမၠောန်ပွ ခမဳဟာဟွံတဳ” ရဴဝွံ လေပ်ဒှ်ထေၚ်မှာ ကုညးဂမၠိုၚ် (မဟွံသ္ဍိုက်မၠိုက် ပွမပြံၚ်လှာဲဌာနန္တရဂုဏ်) ဂှ်ရ၊ ယွံခမဳတအ် ဣဝွံတုန် ဒုဟ်ပ္ဍဲပါမလုပ်သ္ၚိနန် ဆဋ္ဌမရ။ (၇) ယွံခမဳတအ် တၞဟ်သအာၚ်မွဲပၠန်လေဝ် ပ္ဍဲအခိၚ်သၟိၚ် ဖျေံထောံညးမၞုံကဵုဌာနန္တရဂုဏ်မသၠုၚ် ပ္ဍဲဌာနန္တရဂုဏ်မသဝ်ဂှ် “သၟိၚ် နှဴရဴဒၟံၚ် ကေုာံခမဳရ၊ ဒှ်ကမၠောန်ပွ ခမဳဟာဟွံတီ” ရဴဝွံ လေပ်ဒှ်ထေၚ်မှာ ကုညးဂမၠိုၚ် (မဟွံသ္ဍိုက်မၠိုက် ပွမပြံၚ်လှာဲဌာနန္တရဂုဏ်) ဂှ်ရ၊ ယွံခမဳတအ် ဣဝွံတုန် ဒုဟ်ပ္ဍဲပွမလုပ်သ္ၚိနန် သတ္တမရ။ (၈) ယွံခမဳတအ် တၞဟ်သအာၚ်မွဲပၠန်လေဝ် ပ္ဍဲအခိၚ်သၟိၚ် ဗလးဏာဒပ်ပၞာန် ပ္ဍဲဟွံသေၚ်ကဵုအခိၚ်ဂှ် “သၟိၚ် နှဴရဴဒၟံၚ် ကေုာံခမဳရ၊ ဒှ်ကမၠောန်ပွ ခမဳဟာဟွံတီ” ရဴဝွံ လေပ်ဒှ်ထေၚ်မှာ ကုညးဂမၠိုၚ် (မဟွံသ္ဍိုက်မၠိုက် ပွမဗလးဏာဒပ်ပၞာန် ဟွံသေၚ်ကဵုအခိၚ်) ဂှ်ရ၊ ယွံခမဳတအ် ဣဝွံတုန် ဒုဟ်ပ္ဍဲပွမလုပ်သ္ၚိနန် အဋ္ဌမရ။ (၉) ယွံခမဳတအ် တၞဟ်သအာၚ်မွဲပၠန်လေဝ် ပ္ဍဲအခိၚ်သၟိၚ် ဗလးဏာဒပ်ပၞာန် ပ္ဍဲအခိၚ်ထေက်ကဵုဗလးဏာတုဲ ပ္ဍဲကြဴ သကဵုဂတးကလေၚ်ကၠုၚ် နူအကြာဂၠံၚ်ဂှ် “သၟိၚ် နှဴရဴဒၟံၚ် ကေုာံခမဳရ၊ ဒှ်ကမၠောန်ပွ ခမဳဟာဟွံတီ” ရဴဝွံ လေပ်ဒှ်ထေၚ်မှာ ကုညးဂမၠိုၚ် (မဟွံသ္ဍိုက်မၠိုက် ပွမကဵုဒပ်ပၞာန် ဂတးကလေၚ်ကၠုၚ်) ဂှ်ရ၊ ယွံခမဳတအ် ဣဝွံတုန် ဒုဟ်ပ္ဍဲပွမလုပ်သ္ၚိနန် နဝမရ။ (၁၀) ယွံခမဳတအ် တၞဟ်သအာၚ်မွဲပၠန်လေဝ် သ္ၚိနန်သၟိၚ်ဂှ် က္ဍန်ဂြက်ကြေပ်တဴ နကဵုစိၚ် ချေံ ကွဳစောတ်ရထာဂမၠိုၚ်ရ၊ ရူပါရီု သဒ္ဒါရီု ဂန္ဓာရီု ရသာရီု ဖောဋ္ဌဗ္ဗာရီု မဒှ်ထေက်ကဵုထၞေန်စပ်သ္ဍိုက်မၠိုက်ဂမၠိုၚ်လေဝ် နွံအိုတ်ရ၊ အာရီုဂမၠိုၚ်ဂှ် ဟွံဗဗွဲကဵု ကုခမဳအိုတ်ရ၊ ယွံခမဳတအ် ဣဝွံတုန် ဒုဟ်ပ္ဍဲပွမလုပ်သ္ၚိနန် ဒသမရ၊ ယွံခမဳတအ် ဒုဟ်ဂမၠိုၚ် ပ္ဍဲပွမလုပ်သ္ၚိနန်သၟိၚ် ဣဝွံ စှ်သာ်ဂမၠိုၚ်ရ ရဴဝွံ (သ္ဂးရ)။ ပ္ဍဲအခိၚ်ဂှ် တဳလမၞုံပိုဉ်ကျာ်တြဲ ဟီုဂရိုဟ်တၚ်ဒုၚ် တဳလပိုဉ်အာနန္ဒ နဟိုတ်မဂၠိုၚ်တုဲမ္ဂး အလဵုဇကု ပွမဇြိုၚ်ကဵုလွဳမြိမြန်ဇကု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
498) “ယြဴခမဳမွဲ ပ္ဍဲဂၠမ်သတိက် သၟိၚ်မဒှ်ဂကူသၟိၚ် မဂပ်ဝ်စဝ်သၠိုက်လဝ်အဘိသိက်ပ္ဍဲကၞိပ်တုဲ ကေုာံရတ်ဂၞကျာ် မဟဂွံတိတ်ကၠုၚ်ဏီ ဟွံဂရၚ်ပတီလဴဗ္စ (ဒဒှ်ဇကုမကၠုၚ်) ပ္ဍဲကိုပ်ကၠာတုဲ ကဵုကလိလောန်ဒၟုၚ်တြၚ်မ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
