၅.၈.၉။ ကမ္မပဋိဗာဟနသိက္ခာပိုဒ်

474) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် ဒ္ဂေတ်သ္ပတဴ ဒ္ဂေတ်မဟွံထေက်ကဵုဒ္ဂေတ်တုဲ ဒးဒုၚ်သ္ပကမ်မ္ဂး ဆေဝ်ဒဝ်တဴသွက်ရၚ်သကအ်အိုတ်ရ။ ပ္ဍဲအခိၚ်ဂှ် သၚ် ကောံဓရီု နကဵုကိစ္စကေၚ်ကာထေက်ကဵုသ္ပမမိက်ကဵုမွဲမွဲရ၊ ခမဳဆဗ္ဗဂ္ဂဳဂမၠိုၚ် ဒှ်အဃောဇိၚ်သ္ၚာတုဲ ကဵုဆန် ‘ပွမတုပ်စိုတ်’ ကုခမဳမွဲဇကုအိုတ်ရ။ ပ္ဍဲအခိၚ်ဂှ် သၚ်ဂှ် “ယွံကောန်တၠတအ် ခမဳဆဗ္ဗဂ္ဂဳဂမၠိုၚ်ဝွံ ကၠုၚ်မွဲဇကုဓဝ်ရ၊ ပ္ဍဲအခိၚ်လၟုဟ် ပ္ဍဲညးဂမၠိုၚ် သ္ပကမ် ကုခမဳဂှ်အိုတ်စိုအ်” ရဴဝွံ ဟီုသ္ဂးတုဲ သ္ပကမ် ကုခမဳဂှ်ရ။ ပ္ဍဲအခိၚ်ဂှ် ခမဳဂှ် ပြာပ်အာဇရေၚ်ခမဳဆဗ္ဗဂ္ဂဳဂမၠိုၚ်ရ၊ ခမဳဆဗ္ဗဂ္ဂဳဂမၠိုၚ် “ယွံကောန်တၠ သၚ် သ္ပတဴ မုမွဲရော?” ရဴဝွံ သၟာန်ခမဳဂှ်အိုတ်ရ၊ ယွံကောန်တၠတအ် သၚ်သ္ပကမ် ကုအဲဍိက်ရ ရဴဝွံ (ဟီုသ္ဂးရ)၊ ယွံကောန်တၠ ပိုဲညးဂမၠိုၚ် “ကြက်သ္ပကမ် ကုတၠအဲရ” ရဴဝွံ (ပၠုပ်စိုတ်တုဲ) တၞဟ်နသ္ပကမ်ဂှ် ကဵုဏာဆန် ဟွံသေၚ်အိုတ်ရ၊ ပိုဲညးဂမၠိုၚ် “ကြက်သ္ပကမ် ကုတၠအဲရ” ရဴဝွံ ယဝ်တီအိုတ်မ္ဂး၊ ဟွံကဵုဏာဆန်အိုတ်ရ ရဴဝွံ (ဟီုသ္ဂးအိုတ်ရ)။ ခမဳပၟိက်အောန်ဂမၠိုၚ် “မုဟိုတ် ခမဳဆဗ္ဗဂ္ဂဳဂမၠိုၚ် ကဵုဏာဆန် ကုကမ်ဂမၠိုၚ် မဗဗွဲကဵုဓရ်တုဲ ပ္ဍဲကြဴ အာစိုပ်သဘဴပွမကဵုပျုတ်ဗ္ဒေက်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် ကဵုဏာဆန် ကုကမ်ဂမၠိုၚ် မဗဗွဲကဵုဓရ်တုဲ ပ္ဍဲကဴ အာစိုပ်သဘဴပွမကဵုပျုတ်ဗ္ဒေက်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟူ (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ်ကဵုဏာဆန် ကုကမ်ဂမၠိုၚ် မဗဗွဲကဵုဓရ်တုဲ ပ္ဍဲကြဴ အာစိုပ်သဘဴပွမကဵုပျုတ်ဗ္ဒေက်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။

475) “ယြဴခမဳမွဲ ကဵုဏာဆန် ကုကမ်ဂမၠိုၚ် မဗဗွဲကဵုဓရ်တုဲ ပ္ဍဲကြဴ အာစိုပ်သဘဴပွမဟီုပျုတ်ဗ္ဒေက်မ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။