၅.၈.၈.၁။ ပွံက်ဥပဿုတိသိက္ခာပိုဒ်

471) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ဒဒက်တဴခမဳ မ္ဂးဂှ် ဒဒက်တဴခမဳသအာၚ်ဂမၠိုၚ်။ မကတဵုဒှ်သေက်ဇဵု မကတဵုဒှ်ယျာန်ဓဝါတ် မဟီုသ္ဂးဂလာန်စှေ်စး မ္ဂးဂှ် ဍေံမကတဵုဒှ်အဓိကိုရ်။ တန်တဴ ပ္ဍဲဌာန်ဇရေၚ် မထေက်ကဵုမိၚ်ရမျာၚ်ဂလာန် မ္ဂးဂှ် “မိၚ်ကေတ် (ဂလာန်) ခမဳဂမၠိုၚ်ဝွံတုဲ ကြက်စောဒနာရ၊ ကြက်ကဵုဗှ်ဗၞုဟ်ရ၊ ကြက်စောဒနာမွဲလှေ်ပၠန်ရ၊ ကြက်ကဵုဗှ်ဗၞုဟ် မွဲလှေ်ပၠန်ရ၊ ကြက်ကဵုမုက်မတ်ဟွံကျေဝ်ရ” ရဴဝွံ အာမ္ဂး၊ ဒးအာပတ်ဒုက္ကဋ်ရ။ ယြဴပ္ဍဲဌာန်မွဲ ဒတူဒၟံၚ်တုဲ ကလၚ်မ္ဂး၊ ဒးအာပတ်ပါဲစိုတ်ရ။ ခမဳမအာနူလက်ကရဴဂှ် ကြက်ကလၚ်ရ ရဴဝွံ စွံစိုတ်တုဲ အာတဴပြဟ်ပြဟ်မ္ဂး၊ ဒးအာပတ်ဒုက္ကဋ်ရ။ ယြဴပ္ဍဲဌာန်မွဲ ဒတူဒၟံၚ်တုဲ ကလၚ်မ္ဂး၊ ဒးအာပတ်ပါဲစိုတ်ရ။ ခမဳမအာဂတဂှ် ကြက်ကလၚ်ရ ရဴဝွံ စွံစိုတ်တုဲ သှ်ၜက်ဒၟံၚ်မ္ဂး၊ ဒးအာပတ်ဒုက္ကဋ်ရ။ ယြဴပ္ဍဲဌာန်မွဲ ဒတူဒၟံၚ်တုဲ ကလၚ်မ္ဂး၊ ဒးအာပတ်ပါဲစိုတ်ရ။ ကၠုၚ်တဴ ဌာန်တန်တဴကဵုဌာန်ဂဇအ်ကီု ဌာန်တိက်ကီု ခမဳဂှ်တုဲ ချပ်ဂၞန်မ္ဂး၊ သ္ဒးခအေမ်ရ၊ သ္ဒးကဵုတီရ၊ ယဝ်ခအေမ်လေဝ်ဟွံခအေမ်မ္ဂး၊ ယဝ်ကဵုတီလေဝ် ဟွံကဵုတီမ္ဂး၊ ဒးအာပတ်ပါဲစိုတ်ရ။ သ္ဟိုတ်ကဵုဟိုတ်ဂှ်ဟေၚ်တုဲ သီုဟွံမွဲကဵုဟိုတ်မွဲသအာၚ် မ္ဂးဂှ် တၞဟ်နပွမတန်တဴပ္ဍဲဌာန်ဇရေၚ်မထေက်ကဵုမိၚ်ရမျာၚ်ဂလာန် ဟိုတ်သအာၚ်မမိက်ကဵုမွဲမွဲ ဟွံမွဲရ။

472) ပ္ဍဲခမဳ မၞုံကဵုစၟတ်သမ္တီခမဳဒှ်တုဲ တန်တဴ ပ္ဍဲဌာန်ဇရေၚ် မထေက်ကဵုမိၚ်မ္ဂး၊ ဒးအာပတ်ပါဲစိုတ်ရ။ ပ္ဍဲခမဳ မၞုံကဵုသၠေဟ်ပၟာဒှ်တုဲ တန်တဴ ပ္ဍဲဌာန်ဇရေၚ်မထေက်ကဵုမိၚ်မ္ဂး၊ ဒးအာပတ်ပါဲစိုတ်ရ။ ပ္ဍဲခမဳ မၞုံကဵုစၟတ်သမ္တီခမဳဟွံသေၚ်ဒှ်တုဲ တန်တဴ ပ္ဍဲဌာန်ဇရေၚ် မထေက်ကဵုမိၚ်မ္ဂး၊ ဒးအာပတ်ပါဲစိုတ်ရ။ တန်တဴ ပ္ဍဲဌာန်ဇရေၚ်မထေက်ကဵုမိၚ် ညးဟွံသေၚ်ကဵုခမဳမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုစၟတ်သမ္တီခမဳမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုစၟတ်သမ္တီ ညးဟွံဟေၚ်ကဵုခမဳမ္ဂး၊ ဒးအာပတ်ဒုက္ကဋ်ရ။

473) “မိၚ်ကေတ် ဂလာန်ခမဳဂမၠိုၚ်ဝွံတုဲ ကြက်ဝေၚ်ပါဲရ၊ ကြက်ဝေၚ်ပါဲဗွဲတၟေၚ်ရ၊ ကြက်ကဵုလလမ်ရ၊ ကြက်ကဵုဇကုဇကုတိတ်ဗၠးရ” ရဴဝွံ ပၠုပ်စိုတ်တုဲအာမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဥပဿုတိသိက္ခာပိုဒ် အဋ္ဌမတုဲရ။