၅.၈.၈။ ဥပဿုတိသိက္ခာပိုဒ်

469) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် ကတဵုဒှ်သေက်ဇဵု မွဲဟာန်ကေုာံခမဳဂမၠိုၚ် မသ္ဍိုက်ဆာန်သၞေံသၞဴသဳလအိုတ်ရ။ ခမဳဂမၠိုၚ် မသ္ဍိုက်ဆာန်သၞေံသၞဴသဳလ “ယွံကောန်တၠတအ် ခမဳဆဗ္ဗဂ္ဂဳဂမၠိုၚ်ဝွံ ဂဝဂလေံဟွံမွဲအိုတ်ရ၊ တၞဟ်နပွမသေက်ဇဵု မွဲဟာန်ကေုာံခမဳဂမၠိုၚ်ဂှ် ဟွံထေက်ရ” ရဴဝွံ ဟီုသ္ဂးအိုတ်ရ။ ခမဳဆဗ္ဗဂ္ဂဳဂမၠိုၚ် “ယွံကောန်တၠတအ် မၞးတအ်ညးဂမၠိုၚ် မုဟိုတ် သ္ဂောံဟီုသ္ဂးကဵုပိုဲညးဂမၠိုၚ် ဟွံမွဲကဵုဂဝဂလေံအိုတ်ရော?” ရဴဝွံ ဟီုသ္ဂးအိုတ်ရ။ ယွံကောန်တၠတအ် မၞးတအ်ညးဂမၠိုၚ် မုရဴနအကာဲအရာ မိၚ်ကေတ်အိုတ်ရော? ရဴဝွံ (ဟီုသ္ဂးတိုန်မ္ဂး) ပိုဲညးဂမၠိုၚ် တန်တဴဒၟံၚ်ပ္ဍဲဌာန်ဇရေၚ် မထေက်ကဵုမိၚ်ရမျာၚ်ဂလာန် တဳလပိုဉ်ဂမၠိုၚ်အိုတ်ရ ရဴဝွံ (ဟီုသ္ဂးအိုတ်ရ)။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် တန်တဴဒၟံၚ် ပ္ဍဲဌာန်ဇရေၚ် မထေက်ကဵုမိၚ်ရမျာၚ်ဂလာန် ခမဳဂမၠိုၚ် မကတဵုဒှ်သေက်ဇဵု မကတဵုဒှ်ကယျာန်ဓဝါတ် မဟီုသ္ဂးဂလာန်စှေ်စးအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် တန်တဴဒၟံၚ် ပ္ဍဲဌာန်ဇရေၚ် မထေက်ကဵုမိၚ်ရမျာၚ်ဂလာန် ခမဳဂမၠိုၚ် မကတဵုဒှ်သေက်ဇဵု မကတဵုဒှ်ကယျာန်ဓဝါတ် မဟီုသ္ဂးဂလာန်စှေ်စးအိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် တန်တဴဒၟံၚ် ပ္ဍဲဌာန်ဇရေၚ် မထေက်ကဵုမိၚ်ရမျာၚ်ဂလာန် ခမဳဂမၠိုၚ် မကတဵုဒှ်သေက်ဇဵု မကတဵုဒှ်ကယျာန်ဓဝါတ် မဟီုသ္ဂးဂလာန်စှေ်စးအိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။

470) “ယြဴခမဳမွဲ ပ္ဍဲဌာန်ဇရေၚ် မထေက်ကဵုမိၚ်ရမျာၚ်ဂလာန် ခမဳဂမၠိုၚ် မကတဵုဒှ်သေက်ဇဵု မကတဵုဒှ်ကယျာန်ဓဝါတ် မဟီုသ္ဂးဂလာန်စှေ်စးဂှ် ‘ကြက်ကလၚ်ဂလာန် ကြက်ဟီုသ္ဂးခမဳဂမၠိုၚ်ဝွံရ’ ရဴဝွံ သ္ပဟိုတ်ကဵုဟိုတ်ဂှ်ဟေၚ်တုဲ သီုဟွံမွဲကဵုဟိုတ်မွဲသအာၚ် တနတဴမ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜး အိုတ်ညိ ရဴဝွံ သ္ဂးရ)။