၅.၈.၇။ သဥ္စိစ္စသိက္ခာပိုဒ်
464) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်မာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ်− “ယွံကောန်တၠတအ် ‘ညးဟွံပေၚ်အာယုက်ၜါစှော်သၞာံ သ္ပပယျၚ်ဟွံဂွံရ’ ရဴဝွံ တဳလမၞုံပိုဉ်ကျာ်တြဲ ပညပ်လဝ်သိက္ခာပိုဒ်ရ၊ မၞးတအ်ညးဂမၠိုၚ်လေဝ် သီုဟွံပေၚ်အာယုက်ၜါစှော်သၞာံ သ္ပပယျၚ်အိုတ်ရ၊ မၞးတအ်ညးဂမၠိုၚ် သာမဏဳဂမၠိုၚ်ဟာ” ရဴဝွံ ကဵုကတဵုဒှ် ‘သံသယကုက္ကုစ္စ’ ပွမချပ် သၠေဟ်ပၟာ ကုခမဳသတ္တရသဝဂ္ဂဳဂမၠိုၚ်အိုတ်ရ။ ခမဳသတ္ဝရသဝဂ္ဂဳဂမၠိုၚ် လရိုအ်ယာံအိုတ်ရ။ ခမဳဂမၠိုၚ် “ယွံကောန်တၠတအ် မၞုးတအ်ညးဂမၠိုၚ် မုဟိုတ် လရိုအ်ယာံအိုတ်ရော?” ရဴဝွံ သၟာန်အိုတ်ရ။ ယွံကောန်တၠတအ် ခမဳဆဗ္ဗဂ္ဂဳဂမၠိုၚ်ဝွံ မၞုံကဵုစေတနာဒှ်တုဲ ကဵုကတဵုဒှ် ‘သံသယကုက္ကုစ္စ’ ပွမချပ်သၠေဟ် ကုပိုဲညးဂမၠိုၚ်အိုတ်ရ ရဴဝွံ (ဟီုသ္ဂးအိုတ်ရ)။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် မၞုံကဵုစေတနာဒှ်တုဲ ကဵုကတဵုဒှ် ‘သံသယကုက္ကုစ္စ’ ပွမချပ်သၠေဟ်ပၟာ ကုခမဳဂမၠိုၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် မၞုံကဵုစေတနာဒှ်တုဲ ကဵုကတဵုဒှ် ‘သံသယကုက္ကုစ္စ’ ပွမချပ်သၠေဟ်ပၟာ ကုခမဳဂမၠိုၚ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် မၞုံကဵုစေတနာဒှ်တုဲ ကဵုကတဵုဒှ် ‘သံသယကုက္ကုစ္စ’ ပွမချပ်သၠေဟ်ပၟာ ကုခမဳဂမၠိုၚ်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
465) “ယြဴခမဳမွဲ ‘ဟီုသ္ဂးရဴဝွံမ္ဂး ဗၞတ်မွဲခဏလေဝ် ကြက်ကတဵုဒှ် ဟွံဒှ်တသိုခ်ရ’ ရဴဝွံ သ္ပဟိုတ်ကဵု ဟိုတ်မတွံဂးပွမဟွံကဵုဒှ်တသိုခ်ဂှ်ဟေၚ်တုဲ သီုဟွံမွဲကဵုဟိုတ်မွဲသအာၚ် မၞုံကဵုစေတနာဒှ်တုဲ ကဵုကတဵုဒှ် ‘သံသယကုက္ကုစ္စ’ ပွမချပ်သၠေဟ်ပၟာ ကုခမဳမ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
