၅.၈.၆။ အမူလကသိက္ခာပိုဒ်

459) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဗဂ္ဂဳဂမၠိုၚ် သီုဟွံမွဲကဵုဟိုတ်တၞမ် (ပွမညာတ် ပွမမိၚ် ပွမသၠေဟ်ပၟာ) စောတ်စောဲခမဳ (သအာၚ်) နကဵုအာပတ်သံဃာဒိသေသ်အိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် သီုဟွံမွဲကဵုဟိုတ်တၞမ (ပွမညာတ် ပွမမိၚ် ပွမသၠေဟ်ပၟာ) သ္ဂောံစောတ်စောဲခမဳ နကဵုအာပတ်သံဃာဒိသေဟ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေတ်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် သီုဟွံမွဲကဵုဟိုတ်တၞမ် (ပွမညာတ် ပွမမိၚ် ပွမသၠေဟ်ပၟာ) စောတ်စောဲခမဳ နကဵုအာပတ်သံဃာဒိသေသ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် သီုဟွံမွဲကဵုဟိုတ်တၞမ် (ပွမညာတ် ပွမမိၚ် ပွမသၠေဟ်ပၟာ) စောတ်စောဲခမဳ နကဵုအာပတ်သံဃဒိသေသ်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုၚ်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ရ။

460) “ယြဴခမဳမွဲ သီုဟွံမွဲကဵုဟိုတ်တၞမ် (ပွမညာတ် ပွမမိၚ် ပွမသၠေဟ်ပၟာ) စောတ်စောဲခမဳ နကဵုအာပတ်သံဃာဒိသေသ်မ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂး)။