၅.၈.၄.၁။ ပွံက်ပဟာရသိက္ခာပိုဒ်

451) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ကုခမဳ မ္ဂးဂှ် ကုခမဳသအာၚ်။ ထေဲပၞတ်ဒှ်တုဲ ဟွံမိပ်စိုတ်ဒှ်တုဲ မ္ဂးဂှ် မၞုံစိုတ်ဟွံမိပ်လဟိၚ်ဒှ်တုဲ မၞုံစိုတ်မဒွံလုက်စုက် (ထ္ဍိမြိ) ဒးဒှ်တုဲ မၞုံစိုတ်မကတဵုဒှ် ညံၚ်ကၞက်စရံၚ်ဒှ်တုဲ။ ကဵုဂွဵုဂွိုက် (တက်ၜုၚ်) မ္ဂးဂှ် နကဵုဇကုကီု နကဵုဝတ္ထုမစပ်ကေုာံဇကုကီု နကဵုဝတ္ထုမသောဝ်ဗလးဏာကီု ဗွဲတွဵုမယုတ် နကဵုသၠဒကှ်လေဝ် ကဵုဂွဵုဂွိုက်မ္ဂး၊ ဒးအာပတ်ပါဲစိုတ်ရ။

452) ပ္ဍဲခမဳ မၞုံကဵုစၟတ်သမ္တီခမဳဒှ်တုဲ ထေဲပၞတ်ဒှ်တုဲ ဟွံမိပ်စိုတ်ဒှ်တုဲ ကဵုဂွဵုဂွိုက်မ္ဂး၊ ဒးအာပတ်ပါဲစိုတ်ရ။ ပ္ဍဲခမဳ မၞုံကဵုသၠေဟ်ပၟာဒှ်တုဲ ထေဲပၞတ်ဒှ်တုဲ ဟွံမိပ်စိုတ်ဒှ်တုဲ ကဵုဂွဵုဂွိုက်မ္ဂး၊ ဒးအာပတ်ပါဲစိုတ်ရ။ ပ္ဍဲခမဳ မၞုံကဵုစၟတ်သမ္တီြ ခမဳဟွံသေၚ်ဒှ်တုဲ ထေဲပၞတ်ဒှ်တုဲ ဟွံမိပ်စိုတ်ဒှ်တုဲ ကဵုဂွဵုဂွိုက်မ္ဂး၊ ဒးအာပတ်ပါဲစိုတ်ရ။ ထေဲပၞတ်ဒှ်တုဲ ဟွံမိပ်စိုတ်ဒှ်တုဲ ကဵုဂွဵုဂွိုက် ကုညးဟွံသေၚ်ကဵုခမဳမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုစၟတ်သမ္တီခမဳမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုစၟတ်သမ္တီ ညးဟွံသေၚ်ကဵုခမဳမ္ဂး၊ ဒးအာပတ်ဒုက္ကဋ်ရ။

453) မၞုံသဘဴမမိက်တိတ်ဗၠး ဟိုတ်နူညးမမိက်ကဵုမွဲမွဲ ရာန်သကိုတ်ပျဲပျာံဒှ်တုဲ ကဵုဂွဵုဂွိုက်မ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ပဟာရသိက္ခာပိုဒ် စတုတ္ထတုဲရ။