၅.၈.၃.၁။ ပွံက်မောဟနသိက္ခာပိုဒ်
445) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ဇၟာပ်ဇၟာပ်လပါ်ဂိတု မ္ဂးဂှ် ဇၟာပ်ဇၟာပ်တ္ၚဲဥပေါဟ် (ဂိတုပေၚ် ဂိတုအိုတ်)။ ရဴဝွံ ဟီုသ္ဂးမ္ဂး မ္ဂးဂှ် ဒ္ဂေတ်တဴဒ္ဂေတ် မဟွံထေက်ကဵုကဵုဒ္ဂေတ်သ္ပတုဲမ္ဂး “ဟိုတ်နူပွမဟွံတီ ဒးအာပတ်ရ” ရဴဝွံ မိက်ကဵုတီတုဲ စၞောန်ထ္ၜးပါတိမုက်မ္ဂး “အခိၚ်လၟုဟ်မှဟေၚ် အဲ သ္ဂောံတီကေတ်ရ၊ ဓရ်ဝွံလေဝ် ကၠုၚ်ပ္ဍဲပါတိမုက်ရဂး၊ လုပ်လၟိဟ်ပ္ဍဲပါတိမုက်ရဂး၊ ဇၟာပ်ဇၟာပ်လပါ်ဂိတု အာစိုပ်ပွမစၞောန်ထ္ၜးဗွဲခမ္ဍန်ရဂး” ရဴဝွံ ဟီုသ္ဂးမ္ဂး ဒးအာပတ်ဒုက္ကဋ်ရ။ ခမဳဝွံတုန် ဗၞတ်ၜါပိဝါ ကေၚ်ပဒတဴ ပ္ဍဲဌာန်စၞောန်ထ္ၜးပါတိမုက်ရ ရဴဝွံ ခမဳသအာ်ဂမၠိုၚ် တီတဴခမဳဂှ်မ္ဂး၊ ကေၚ်ပဒတဴလောန်လတူၜါပိဝါမ္ဂး မုသ္ဇက်သ္ဂးနွံဏီရော? ကုခမဳဂှ် နပွမပပၞဟွံတီ တိတ်ဗၠးနူအာပတ် ဟွံမာန်ရ၊ အာပတ်မဒး ဟိုတ်ပွမပပၞဟွံတီဂှ်လေဝ် ဒးသ္ဂုတ်သွာတ်ဗွဲဗဗွဲ ကဵုဓရ်ရ၊ လောန်လတူဂှ်လေဝ် သ္ဒးပတိုန်ဒုဟ်မဝိဝိၚ် ကုခမဳဂှ်ရ၊ ယွံခမဳတအ် ရဴဝွံဟေၚ် ဒးပတိုန်ဒုဟ်မဝိဝၚ်ရ၊ ခမဳ စဳကၠးဆိုက်ဗ္ဒက်တုဲ မၞုံကဵုအစေစာံသတ္တိဂှ် သ္ဒးကဵုသၚ်တီရ။
446) “ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ စၞောန်ထ္ၜးပါတိမုက်မ္ဂး သ္ပဒးဒးရးရးတုဲ သ္ပမၞုံကဵုဖဵုတုဲ ဟွံသ္ပပၠုပ်စိုတ်ရ၊ ကမ်မၞုံကဵုအခိၚ်မဗဗွဲကုသၚ် ယဝ်ဒှ်မ္ဂး သၚ် ပတိုန်ဒုဟ်မဝိဝိၚ် ကုခမဳမၞုံယၟုဝွံရ၊ ဣဝွံတုန် ပွမကဵုတီရောၚ်။ ယွံတဳလပိုဉ်တအ် သၚ် ဩဝ်ကလၚ်ပၚ်မှိၚ် (ဂလာန်) အဲဍိက်ညိ၊ ခမဳမၞုံယၟုဝွံ စၞောန်ထ္ၜးပါတိမုက်မ္ဂး သ္ပဒးဒးရးရးတုဲ သ္ပမၞုံကဵုဖဵုတုဲ ဟွံသ္ပပၠုပ်စိုတ်ရ၊ သၚ် ပတိုန်ဒုဟ်မဝိဝိၚ် ကုခမဳမၞုံယၟုဝွံရ၊ ယြဴကုတဳလပိုဉ်မွဲ သ္ဍိုက်မၠိုက် ပွမတိုန်ဒုဟ်ဝိဝိၚ် ခမဳမၞုံယၟုဝွံရ၊ တဳလပိုဉ်ဂှ် သ္ဒးဒၟံၚ်သ္ၚိတ်သ္ၚိတ်ရ၊ ယြဴကုတဳလပိုဉ်မွဲ ဟွံမွဲကဵုပွမသ္ဍိုက်မၠိုက်ရ၊ တဳလပိုဉ်ဂှ် သ္ဒးဟီုတိုန်ရ။ သၚ် ဂပ်ဝ်ပတိုန်ဒုဟ်မဝိဝိၚ် ကုခမဳမၞုံယၟုဝွံတုဲရ၊ ကုသၚ်ဂှ် မၞုံကဵုပွမသ္ဍိုက်မၠိုက်ရ၊ ဟိုတ်ဂှ်ရ ဒၟံၚ်ကၞပ်သ္ၚောံသ္ၚိတ်ဇြရ၊ နမဒၟံၚ်ကၞပ်သ္ၚောံသ္ၚိတ်ဇြရဴဝွံ ဂွံတီကေတ် ဒဒှ်မသ္ဍိုက်မၠိုက်ဂှ်ရ” ရဴဝွံ (သ္ဒးကဵုတီရ)။ ကိုပ်ကၠာဟဂွံပတိုန်ဒုဟ်မဝိဝိၚ်ဏီ ပပၞဒိုဟ်ဓိုဟ်ပပၞဟွံတီမ္ဂ၊ ဒးအာပတ်ဒုက္ကဋ်ရ။ ပတိုန်ဒုဟ်မဝိဝိၚ်တုဲမှ ပပၞဒိုဟ်ဓိုဟ်ပပၞဟွံတီမ္ဂး၊ ဒးအာပတ်ပါဲစိုတ်ရ။
447) ပ္ဍဲဓမ္မကမ် မၞုံကဵုစၟတ်သမ္တီ ဓမ္မကမ်ဒှ်တုဲ ပပၞဒိုဟ်ဓီုမ္ဂး၊ ဒးအာပတ်ပါဲစိုတ်ရ။ ပ္ဍဲဓမ္မကမ် မၞုံကဵုသၠေဟ်ပၟာဒှ်တုဲ ပပၞဒိုဟ်ဓီုမ္ဂး၊ ဒးအာပတ်ပါဲစိုတ်ရ။ ပ္ဍဲဓမ္မမကမ် မၞုံကဵုစၟတ်သမ္တီအဓမ္မကမ်ဒှ်တုဲ ပပၞဒိုဟ်ဓီုမ္ဂး၊ ဒးအာပတ်ပါဲစိုတ်ရ။ ပ္ဍဲအမ္မကမ် မၞုံကဵုစၟတ်သမ္တီဓမ္မကမ်ဒှ်တုဲ ပပၞဒိုဟ်ဓီုမ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုသၠေဟ်ပၟာဒှ် ပပၞဒိုဟ်ဓီုမ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မမကမ် မၞုံကဵုစၟတ်သမ္တီ အဓမ္မကမ်မ္ဂး၊ ဒးအာပတ်ဒုက္ကဋ်ရ။
448) ဟွံကေၚ်လလၚ်ဗွဲတြးမ္ဂး၊ ဟွံဒးအာပတ်ရ၊ ကေၚ်ကလၚ်ဗွဲတြးမ္ဂး ယုတ်ဒေက်သၟဝ်ၜါပိဝါမ္ဂး၊ ဟွံဒးအာပတ်ရ၊ ကုခမဳဟွံမွဲပၟိက်ကဵု ပွမပပၞဒိုဟ်ဓီု ခမဳကြအ်ဥမ္မတ် ခမဳကလိလောန်ကၠတဲဂှ် ဟွံဒးအာပတ်ရ။ မောဟနသိက္ခာပိုဒ် တတိယတုဲရ။
