၅.၈.၃။ မောဟနသိက္ခာပိုဒ်
443) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဆဗ္ဗဂ္ဂဳဂမၠိုၚ် ဒ္ဂေတ်သ္ပတဴ ဒ္ဂေတ်မဟွံထေက်ကဵု ဒ္ဂေတ်သ္ပတုဲမ္ဂး “ဟိုတ်နူပွမဟွံတီ ဒးအာပတ်အိုတ်ရ” ရဴဝွံ မိက်ကဵုတီတုဲ စၞောန်ထ္ၜးပါတိမုက်ရဂး၊ လုပ်လၟိဟ်ပ္ဍဲပါတိမုက်ရဂး၊ ဇၟာပ်ဇၟာပ်လပါ်ဂိတု အာစိုပ်ပွမစၞောန်ထ္ၜး ဗွဲခမ္ဍန်ရဂး” ရဴဝွံ ဟီုသ္ဂးအိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဂ္ဂဳဂမၠိုၚ် စၞောန်ထ္ၜးပါတိမုက်မ္ဂး ပိုဲညးဂမၠိုၚ် အခိၚ်လၟုဟ်မှဟေၚ် သ္ဂောံတီကေတ်အိုတ်ရ၊ ဓရ်ဝွံလေဝ် ကၠုၚ်ပ္ဍဲပါတိမုက်ရဂး၊ လုပ်လၟိဟ်ပ္ဍဲပါတိမုက်ရဂး၊ ဇၟာပ်ဇၟာပ်လပါ်ဂိတု အာစိုပ်ပွမစၞောန်ထ္ၜးဗွဲခမ္ဍန်ရဂး ရဴဝွံ ဟီုသ္ဂးအိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် စၞောန်ထ္ၜးပါတိမုက်မ္ဂး ‘ပိုဲညးဂမၠိုၚ် အခိၚ်လၟုဟ်မှဟေၚ် သ္ဂောံတီကေတ်အိုတ်ရ၊ ဓရ်ဝွံလေဝ် ကၠု်ၚနူပါတိမုက်ရဂ၊ လုပ်လၟိဟ် ပ္ဍဲပါတိမုက်ရဂး၊ ဇၟာပ်ဇၟာပ်လပါ်ဂိတု အာစိုပ်ပွမစၞောန်ထ္ၜးဗွဲခမ္ဍန်ရဂး’ ရဴဝွံ ဟီုသ္ဂးအိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် စၞောန်ထ္ၜးပါတိမုက်မ္ဂး “ပိုဲညးဂမၠိုၚ် အခိၚ်လၟုဟ်မှဟေၚ် သ္ဂောံတီကေတ်အိုတ်ရ၊ ဓရ်ဝွံလေဝ် ကၠုၚ်ပ္ဍဲပါတိမုက်ရဂ(း၊ လုပ်လၟိဟ်ပ္ဍဲပါတိမုက်ရဂး၊ ဇၟာပ်ဇၟာပ်လပါ်ဂိတု အာစိုပ်ပွမစၞောန်ထ္ၜးဗွဲခမ္ဍန်ရဂး” ရဴဝွံ ဟီုသ္ဂးအိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုၚ်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
444) “ယြဴခမဳမွဲ ဇၟာပ်ဇၟာပ်လပါ်ဂိတု စၞောန်ထ္ၜးပါတိမုက်မ္ဂး ‘အခိၚ်လၟုဟ်မှဟေၚ်အဲ သ္ဂောံတီကေတ်ရ၊ ဓရ်ဝွံလေဝ် ကၠုၚ်ပ္ဍဲပါတိမုက်ရဂး၊ လုပ်လၟိဟ်ပ္ဍဲပါတိမုက်ရဂး၊ ဇၟာပ်ဇၟာပ်လပါ်ဂိတု အာစိုပ်ပွမစၞောန်ထ္ၜးဗွဲခမ္ဍန်ရဂး’ ရဴဝွံ ဟီုသ္ဂးမ္ဂး ခမဳဝွံ ဗၞတ်ၜါပိဝါ ကေၚ်ပဒတဴ ပ္ဍဲဌာန်စၞောန်ထ္ၜးပါတိမုက်ရ ရဴဝွံ ခမဳသအာၚ်ဂမၠိုၚ် တီတဴခမဳဂှ်မ္ဂး၊ ကေၚ်ပဒတဴလောန်လတူၜါပိဝါမ္ဂး မုသ္ဇက်သ္ဂးနွံဏီရေ? ကုခမဳဂှ် နပွမပပၞဟွံတီ တိတ်ဗၠးနူအာပတ်ဟွံမာန်ရ၊ အာပတ်မ္ဂး ဟိုတ်ပွမပပၞဟွံတီဂှ်လေဝ် ဒးသ္ဂုတ်သွာတ်ဗွဲမဗဗွဲကဵုဓရ်ရ၊ လောန်လတူဂှ်လေဝ် သ္ဒးပတိုန်ဒုဟ်မဝိဝိၚ် ကုခမဳဂှ် (နဉက်ကမ္မဝါစ်) ရ၊ ‘ယွံကောန်တၠ ယြဴတၠအဲမွဲ စၞောန်ထ္ၜးပါတိမုက်မ္ဂး သ္ပဒးဒးရးရးတုဲ သ္ပမၞုံကဵုဖဵုတုဲ ဟွံသ္ပပၠုပ်စိုတ်ရ၊ ကုတၠအဲဂှ် ကလိဂွံဒဒှ်ခမဳ ဟွံဒးရးရ၊ တၠအဲ ဂပ်ဝ်ကလိဂွံဘဝခမဳ ဗွဲဟွံဒးရးရ’ ရဴဝွံ (ဟီုဂရိုဟ်တုဲ သ္ဒးပတိုန်ဒုဟ်မဝိဝိၚ်ရ၊) ပတိုန်ဒုဟ်မဝိဝိၚ်တုဲမ္ဂး ပ္ဍဲခမဳမပပၞဟွံတီဂှ် ဒးအာပတ်ါပဲစိုတ်ဝွံရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
