၅.၈.၂.၁။ ပွံက်ဝိလေခနသိက္ခာပိုဒ်

440) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ စၞောန်ထ္ၜးဖ္ဍောတ်ၛာယ် ပါတိမုက် မ္ဂးဂှ် စၞောန်ထ္ၜးမ္ဂးကီု ဖအောဝ်ကဵုစၞောန်ထ္ၜးမ္ဂးကီု ဖ္ဍောတ်သှ်ၛာယ်မ္ဂးကီုရောၚ်။ ရဴဝွံ ဟီုသ္ဂး မ္ဂးဂှ် နပွမစၞောန်ထ္ၜးဖ္ဍောတ်သှ်ၛာယ် နသိက္ခာပိုဒ်ဂမၠိုၚ် မဍောတ်သွတ်, ဍောတ်သွတ်လောန်ဝွံ မုဖဵုမၞုံရော? ဒှ်တဴ တၞဟ်နအယာံမာတ် ဒှ် ‘သံသယကုက္ကုစ္စ’ ပွမချပ်သၠေဟ်ပၟာ အယာံမာတ်စိုတ်ဍောၚ်ၜိုတ် အယာံမာတ်စိုတ်ခရက်ထုဲ ဗွဲမလောန်ဟေၚ်အိုတ်ရ ရဴဝွံ (ဟီုသ္ဂးမ္ဂး)။ “ကုခမဳ မကတ်ဗတောန်ပါတိမုက်ဂမၠိုၚ်ဂှ် ဒှ် ‘သံသယကုက္ကုစ္စ’ ပွမချပ်သၠေဟ်ပၟာရ၊ ဒှ်စိုတ်ဍောၚ်ၜိုတ် ဒှ်စိုတ်ခရက်တုဲရ။ ကုခမဳ မဟွံကတ်ဗတောန်ပါတိမုက်ဂမၠိုၚ်ဂှ် ဟွံဒှ် ‘သံသယကုက္ကုစ္စ’ ပွမချပ်သၠေဟ်ပၟာရ၊ ဟွံဒှ်စိုတ်ဍောၚ်ၜိုတ် ဟွံဒှ်စိုတ်ခရက်ထုဲရ။ ပွမဟွံစၞောန်ထ္ၜးသိက္ခာပိုဒ်ဝွံ ပြဲရ၊ ပွမဟဂိုၚ်ကေတ် သိက္ခာပိုဒ်ဝွံ ပြဲရ၊ ပွမဟွံကတ်ဗတောန်သိက္ခာပိုဒ်ဝွံ ပြဲရ၊ ပွမဟွံပကၚ်ရၚ် သိက္ခာပိုဒ်ဝွံ ပြဲရ၊ ဓရ်ဝိနယ်လေဝ် ဩဝ်ကဵုကၠေံဗ္ဒန်အာညိ၊ ခမဳဂမၠိုၚ်လေဝ် ဩဝ်လ္ပကဵုစဳကၠးဆိုက်ဗ္ဒက် ပ္ဍဲဝိနယ်အိုတ်ညိ” ရဴဝွံ ဟီုဂရိုဟ်ဝိနယ် ပ္ဍဲဇရေၚ်ခမဳမ္ဂး၊ ဒးအာပတ်ပါဲစိုတ်ရ။

441) ပ္ဍဲခမဳ မၞုံကဵုစၟတ်သမ္တီခမဳဒှ်တုဲ ဟီုဂရိုဟ် ဝိနယ်မ္ဂး၊ ဒးအာပတ်ပါဲစိုတ်ရ။ ပ္ဍဲခမဳမၞုံကဵုသၠေဟ်ပၟာဒှ်တုဲ ဟီုဂရိုဟ်ဝိနယ်မ္ဂး၊ ဒးအာပတ်ပါဲစိုတ်ရ။ ပ္ဍဲခမဳ မၞုံကဵုစၟတ်သမ္တီ ခမဳဟွံသေၚ်ဒှ်တုဲ ဟီုဂရိုဟ်ဝိနယ်မ္ဂး၊ ဒးအာပတ်ပါဲစိုတ်ရ။ ဟီုဂရိုဟ် ဓရ်မသအာၚ် (နူဝိနယ်) မ္ဂး၊ ဒးအာပတ်ဒုက္ကဋ်ရ။ ဟီုဂရိုဟ်ဝိနယ်ကီု ဓရ်မွဲသအာၚ်ကီု (ပ္ဍဲဇရေၚ်) ညးဟွံသေၚ်ကဵုခမဳမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုစၟတ်သမ္တီခမဳမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳမၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုစၟတ်သမ္တီ ညးဟွံသေၚ်ကဵုခမဳမ္ဂး၊ ဒးအာပတ်ဒုက္ကဋ်ရ။

442) “ဗတိုက်ဗအောဝ်ရ၊ တၠအဲ ဩဝ်ကတ်ဗတောန် သုတ်ဂမၠိုၚ်ကီု ဂါထာဂမၠိုၚ်ကီု အဘိဓရ်ကီု ကိုပ်ကၠာညိ၊ လက်ကရဴမှ သ္ဒးကတ်ဗတောန်ဝိနယ်ရ” ရဴဝွံ သီုဟွံမိက်ဟီုဂရိုဟ် ဟီုသ္ဂးမ္ဂး၊ ဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဝိလေခနသိက္ခာပိုဒ် ဒုတိယတုဲရ။