၅.၈.၂။ ဝိလေခနသိက္ခာပိုဒ်
438) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတာဝန် မဒှ်အာရှာမ်အနာထပိဏ္ဍိကသေဌဳ ဇရဆေၚ်ဍုၚ်သာရဝှ်ဂှ် နဟိုတ်မဂၠိုၚ်ဂၠၚ် တွံကဵုဂလာန်မစပ်ကေုာံဝိနယ် ကုခမဳဂမၠိုၚ်ရ၊ တွံကဵုဂုဏ်ဝိနယ်ရ၊ တွံကဵုဂုဏ်ပွမကတ်ဗတောန်ဝိနယ်ရ၊ ရန်တၟအ်တုဲ ရန်တၟအ်တုဲ (စၞောန်တုဲ) ဟီုသ္ဂးတဴ ဂုဏ်တဳလပိုဉ်ဥပါလိရ။ ခမဳဂမၠိုၚ် “တဳလမၞုံပိုဉ်ကျာ်တြဲတုန် နဟိုတ်မဂၠိုၚ်ဂၠၚ် တွံကဵုဂလာန်မစပ်ကေုာံဝိနယ်ကုခမဳဂမၠိုၚ်ရ၊ တွံကဵုဂုဏ်ဝိနယ်ရ၊ တွံကဵုဂုဏ်ပွမကတ်ဗတောန်ဝိနယ်ရ၊ ရန်တၟအ်တုဲ ရန်တၟအ်တုဲ (စၞောန်တုဲ) ဟီုသ္ဂးတဴ ဂုဏ်တဳလပိုဉ်ဥပါလိရ။ ယွံကောန်တၠတအ် ပ္ဍဲအခိၚ်လၟုဟ် ပိုဲညးဂမၠိုၚ် ကတ်ဗတောန်ဓရ်ဝိနယ် ပ္ဍဲဇရေၚ်တဳလပိုဉ်ဥပါလိအိုတ်စိုအ်” ရဴဝွံ ဟီုသ္ဂးတုဲ ခမဳဂမၠိုၚ်ဗွဲမဂၠိုၚ် မဒှ်မှာထေရ်ဇၞော် မှာထေရ်လဒေါဝ် မှာထေရ်ဍောတ်ဂှ် ကတ်ဗတောန်ဓရ်ဝိနယ် ပ္ဍဲဇရေၚ်တဳလပိုဉ်ဥပါလိအိုတ်ရ။ ပ္ဍဲအခိၚ်ဂှ် “ယွံကောန်တၠတအ် ပ္ဍဲအခိၚ်လၟုဟ် ခမဳဂမၠိၚ်ဗွဲမဂၠိုၚ် မဒှ်မှာထေရ်ဇၞော် မှာထေရ်လဒေါဝ် မှာထေရ်ဍောတ်ဂှ် ကတ်ဗတောန်ဓရ်ဝိနယ် ပ္ဍဲဇရေၚ်တဳလပိုဉ်ဥပါလိအိုတ်ရ၊ ခမဳဂမၠိုၚ်ဝွံ စဳကၠးဆိုက်ဗ္ဒက် ပ္ဍဲဝိနယ်မ္ဂး အတိုၚ်ပၟိက်ညးတအ် အခိၚ်ညးတအ်နွံပၟိက် အတိုၚ်ညးတအ်နွံပၟိက်ဂှ် ကြက်တံၚ်ဓဇက် ပိုဲညးဂမၠိုၚ် တိုက်ရိုက်အိုတ်ရ၊ ကြက်တံၚ်ဓဇက်ဂဝုဲဂဝါ်အိုတ်ရ၊ ယွံကောန်တၠတအ် ပိုဲညးဂမၠိုၚ် ပ္ဍဲအခိၚ်လၟုဟ် ကြက်ဟီုဂရိုဟ် ဝိနယ်အိုတ်စိုအ်” ရဴဝွံ ကသပ်ဒှ် ကုခမဳဆဗ္ဗဂ္ဂဳဂမၠိုၚ်ရ။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် ပြာပ်အာဇရေၚ်ခမဳဂမၠိုၚ်တုဲ “နပွမစၞောန်ထ္ၜးဖ္ဍောတ်သှ်ၛာယ် နသိက္ခာပိုဒ်ဂမၠိုၚ် မဍောတ်သွတ်ဍောတ်သွတ်လောန်ဝွံ မုဖဵုမၞုံရော? ဒှ်တဴတၞဟ်နအယာံမာတ် ဒှ် ‘သံသယကုက္ကုစ္စ’ ပွမခပျ်သၠေဟ်ပၟာ အယာံမာတ်စိုတ်ဍောၚ်ၜိုတ် အယာံမာတ်စိုတ်ခရက်တုဲ ဗွဲမလောန်ဟေၚ်အိုတ်ရ” ရဴဝွံ သ္ဂးအိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် ဟီုဂရိုဟ်ဝိနယ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် ဟီုဂရိုဟ်ဝိနယ်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် ဟီုဂရိုဟ်ဝိနယ်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠဳိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
439) “ယြဴခမဳမွဲ စၞောန်ထ္ၜးဖ္ဍောတ်သှ်ၛာယ် ပါတိမုက် ‘သိက္ခာပိုဒ်ခမဳဂမၠိုၚ်’ မ္ဂး နပွမစၞောန်ထ္ၜးဖ္ဍောတ်သှ်ၛာယ် နသိက္ခာပိုဒ်ဂမၠိုၚ် မဍောတ်သွတ်ဍောတ်သွတ်လောန်ဝွံ မုဖဵုမၞုံရော? ဒှ်တဴ တၞဟ်နအယာံမာတ် ဒှ် ‘သံသယကုက္ကုစ္စ’ ပွမချပ်သၠေဟ်ပၟာ အယာံမာတ် စိုတ်ဍောတ်ၜိုတ် အယာံမာတ်စိုတ်ခရက်တုဲ ဗွဲမလောန်ဟေၚ်အိုတ်ရ” ရဴဝွံ ဟီုသ္ဂးမ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
