၅.၈.၁၁.၁။ ပွံက်ဒုဗ္ဗလသိက္ခာပိုဒ်
486) ယြဴ မ္ဂးဂှ် ယြဴဍေံမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ သၚ်မညဳသၟဟ်သၟန် မ္ဂးဂှ် (သၚ်) မၞုံကဵုပွမပံၚ်ဖက်တုပ်သၟဟ် မတန်တဴပ္ဍဲသိမ်တုပ်သၟဟ်။ သ္ၚာ မ္ဂးဂှ် ပၞောဝ်သ္ၚာဂမၠိုၚ်တြဴဂတှေ် ဗွဲတွဵုမယုတ် သ္ၚာမွဲမွဲဂတှေ် မရုမ်ဂပ်ကဵုဝိကပ္ပနရ။ ကဵုတုဲ မ္ဂးဂှ် အလဵုဇကု ကဵုတုဲ။ ဗွဲမဗဗွဲကဵုညးဍုက်ကေဝ်ဒဒှ်ေဒယှ် မ္ဂးဂှ် ဒဒှ်မိတ်သဟာဲ ဒဒှ်မိတ်သဟာဲအယာံမာတ်ကေၚ်ညာတ် ဒဒှ်မိတ်သဟာဲပြဘိုဂ်စသုၚ်မွဲစွံ ဒဒှ်ညးဥပဇ္ၛာယ်တုပ်သၟဟ် ဒဒှ်ညးအ်စာတုပ်သၟဟ်ရောၚ်။ မဒှ်ဂြပ်သၚ် မ္ဂးဂှ် ဝတ္ထုမဂပ်ဝ်ကဵုဒါန် ဂပ်ဝ်သၠးပွး ကုသၚ်တုဲဒှ်ရ။ လာဘ် မ္ဂးဂှ် သ္ၚာပိဏ္ဍပါတ်ဘာ ဂဥုဲမဒှ်ကြိယာဗာပၟၚ်ပၟဲလမျီု မစှေ်စးကဵုယဲဂမၠိုၚ်ရ၊ ဗွဲတွဵုမယုတ် ကဠောံကြကောတ်ကီု ဆုဒကကီု တောဝ်တသာဲကီုရောၚ်။ ပ္ဍဲကြဴ အာစိုပ်သဘဴပွမဟီုပျုတ်ဗ္ဒေက် မ္ဂးဂှ် ကဵုတဴသ္ၚာ ကုခမဳညးပညပ် ဘာသၞာသတိက်သၞာဒၟံၚ်ကီု ကုခမဳစၞောန်ထ္ၜးပိဏ္ဍပါတ်ကီု ကုခမဳပါ်ပရအ်ယာဂုကီု ကုခမဳပါ်ပရအ်သတ်ဆုကီု ကုခမဳပါ်ပရအ်စၞသ္ၚာဲ (ကွာၚ်ၜဲ) ကီု ကုခမဳသၠးကဵုဗၞတ်ညိနာၚ်ကီု သၚ်မဂပ်ဝ်သၟိတ်လဝ်ဂှ် ဟီုပျုတ်ဗ္ဒေက်မ္ဂး၊ ဒးအာပတ်ပါဲစိုတ်ရ။
487) ပ္ဍဲဓမ္မမကမ် မၞုံကဵုစၟတ်သမ္တီဓမ္မကမ်ဒှ်တုဲ ကဵုတဴသ္ၚာဂှ် ဟီုပျုတ်ဗ္ဒေက်မ္ဂး၊ ဒးအာပတ်ပါဲစိုတ်ရ။ ပ္ဍဲဓမ္မကမ် မၞုံကဵုသၠေဟ်ပၟာဒှ်တုဲ ကဵုတဴသ္ၚာဂှ် ဟီုပျုတ်ဗ္ဒေက်မ္ဂး၊ ဒးအာပတ်ပါဲစိုတ်ရ။ ပ္ဍဲဓမ္မကမ် မၞုံကဵုစၟတ်သမ္တီအဓမ္မကမ်ဒှ်တုဲ ကဵုတဴသ္ၚာဂှ် ဟီုပျုတ်ဗ္ဒေက်မ္ဂး၊ ဒးအာပတ်ပါဲစိုတ်ရ။ ကဵုတဴပရိက္ခရာသအာၚ်ဂှ် ဟီုပျုတ်ဗ္ဒေက်မ္ဂး၊ ဒးအာပတ်ဒုက္ကဋ်ရ။ ကဵုတဴသ္ၚာကီု ပရိက္ခရာသအာၚ်ကီုကုခမဳလးပညပ် ဘာသၞာသတိက်သၞာဒၟံၚ်ကီု ကုခမဳစၞောန်ထ္ၜးပိဏ္ဍပါတ်ကီု ကုခမဳပါ်ပရအ်ယာဂုကီု ကုခမဳပါ်ပရအ်သတ်ဆုကီု ကုခမဳပါ်ပရအ် စၞသ္ၚာဲ (ကွာၚ်ၜဲ) ကီု ကုခမဳသၠးကဵုဗၞတ်ညိနာၚ်ကီု သၚ်မဟဂပ်ဝ်သၟိတ်လဝ်ဂှ် ဟီုပျုတ်ဗ္ဒေက်မ္ဂး၊ ဒးအာပတ်ဒုက္ကဋ်ရ။ ကဵုတဴသ္ၚာကီု ပရိက္ခရာသအာၚ်ကီု ကုညးဟွံသေၚ်ကဵုခမဳ မလးပညပ် ဘာသၞာသတိက်သၞာဒၟံၚ်ကီု မစၞောန်ထ္ၜးပိဏ္ဍပါတ်ကီု မပါ်ပရအ်ယာဂုကီု မပါ်ပရအ်သတ်ဆုကီု မပါ်ပရအ်စၞသ္ၚာ (ကွာၚ်ၜဲ) ကီု မသၠးကဵုဗၞတ်ညိနာၚ်ကီု မဒှ်သၚ်မဂပ်ဝ်သၟိတ်လဝ် သၚ်မဟဂပ်ဝ်သၟိတ်လဝ်ဂှ် ဟီုပျုတ်ဗ္ဒေက်မ္ဂး၊ ဒးအာပတ်ဒုက္ကဋ်ရ။ ပ္ဍဲဓမ္မကမ် မၞုံကဵုစၟတ်သမ္တီဓမ္မကမ်မ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုစၟတ်သမ္တီအဓမ္မကမ်မ္ဂး၊ ဒးအာပတ်ဒုက္ကဋ်ရ။
488) ဗွဲသဘဴပကတိ ခမဳမသ္ပဒၟံၚ် ဟိုတ်နူသ္ဍိုက်ဆာန်၊ ဟိုတ်နူပွမထေဲပၞတ်၊ ဟိုတ်နူပွမဝိဝိၚ်ဒိုဟ်ဓီု၊ ဟိုတ်နူပွမဖေက်ဂှ် “နပွမကဵုကုခမဳဂှ် မုဖဵုမၞုံရော? ၜိုန်ကလိဂွံလေဝ် ကြက်ပလီုပလာ်ရ ကြက်ဟွံသုၚ်စောဲဗွဲမဒးရးရ” ရဴဝွံ ဟီုပျုတ်ဗ္ဒေက်မ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဒုဗ္ဗလသိက္ခာပိုဒ် ဨကာဒသမတုဲရ။
