၅.၈.၁၀.၁။ ပွံက်ဆန္ဒံအဒတွာဂမနသိက္ခာပိုဒ်
481) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။
ဂလာန်သ္ဂုတ်သွာတ် မ္ဂးဂှ် ဝတ္ထုဂှ်လေဝ် ဟီုလဴစတုဲရ ဟဂွံသ္ဂုတ်သွာတ်ဏီရ။ ဉတ်ဂှ်လေဝ် စွံပတန်လဝ်ရ၊ ကမ္မဝါစ်လေဝ် ဟွံစိုပ်ဒတုဲဏီရ။ ဟွံကဵုဆန်တုဲ ဒၠိုက်ကတဵုနူဒၞါဲတုဲ စ္ဍ:အာမ္ဂး မ္ဂးဂှ် “မုရဴသာ်လဵု ကမ်ဝွံ သ္ဂောံလီုရော? သ္ဂောံဒှ်ဂကောံဒကးရော? ဟွံသ္ပရော?” ရဴဝွံ ပၠုပ်စိုတ်တုဲ အာမ္ဂး၊ ဒးအာပတ်ဒုက္ကဋ်ရ။ ဃောသၠးကၠေံဟတ္ထပါသ်ပရိသာတ်ဂှ် ဒးအာပတ်ဒုက္ကဋ်ရ။ သၠးကၠေံတုဲမ္ဂး ဒးအာပတ်ပါဲစိုတ်ရ။
482) ပ္ဍဲဓမ္မမကမ် မၞုံကဵုစၟတ်သမ္တီဓမ္မကမ်ဒှ်တုဲ ဟွံကဵုဆန်တုဲ ဒၠိုက်ကတဵုနူဒၞါဲတုဲ စ္ဍးအာမ္ဂး၊ ဒးအာပတ်ပါဲစိုတ်ရ။ ပ္ဍဲဓမ္မကမ် မၞုံကဵုသၠေဟ်ပၟာဒှ်တုဲ ဟွံကဵုဆန်တုဲ ဒၠိုက်ကတဵုနူဒၞါဲတုဲ စ္ဍးအာမ္ဂး၊ ဒးအာပတ်ဒုက္ကဋ်ရ။ ပ္ဍဲဓမ္မကမ် မၞုံကဵုစၟတ်သမ္တီ အဓမ္မကမ်ဒှ်တုဲ ဟွံကဵုဆန်တုဲ ဒၠိုက်ကတဵုနူဒၞါဲတုဲ စ္ဍးအာမ္ဂး၊ ဟွံဒးအာပတ်ရ။ ပ္ဍဲအဓမ္မကမ် မၞုံကဵုစၟတ်သမ္တီဓမ္မကမ်မ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုစၟတ်သမ္တီအဓမ္မကမ်မ္ဂး၊ ဒးအာပတ်ဒုက္ကဋ်ရ။
483) “ပွမကတဵုဒှ်သေက်ဇဵု ပွကယျာန်ဓဝါတ် ပွမဂိုၚ်ကေတ်ကွေတ်မစှ်ေစး ပွမဟီုဂလာန်စှေ်စး ဒဒက်တဴသၚ် ကြက်ကတဵုဒှ်ရ” ရဴဝွံ (ပၠုပ်စိုတ်တုဲ) အာမ္ဂး၊ “သၚ်ပါ်ဒကးကီု စရိတ်သၚ် (သၚ်ကရောန်) ကီု ကြက်ကတဵုဒှ်ရ” ရဴဝွံ (ပၠုပ်စိုတ်တုဲ) အာမ္ဂး၊ “နသဘဴမဟွံဍာံစၟတ်ကီု နမဒှ်ဝဂ် ‘ပ္ဍဲမွဲသီဓဝ် တန်ဒၟံၚ်တၞဟ်တၞဟ်’ ကီု သ္ပကမ် ကုခမဳ ဟွံထေက်ကဵုကမ်ရကီု” ရဴဝွံ (ပၠုပ်စိုတ်တုဲ) အာမ္ဂး၊ ဂိယဲတုဲ အာမ္ဂး၊ ဟိုတ်နူကိစ္စကေၚ်ကာခမဳဂိယဲ အာမ္ဂး၊ ဟိုတ်နူတရဴဇၞော်တရဴသၟတ် ပ္ဍဵုပ္ဍိုက်တုဲ အာမ္ဂး၊ “ဟွံမိက်ကဵုကမ်လီုအာတုဲ ကြက်ကလေၚ်ကၠုၚ်ရ” ရဴဝွံ (ပၠုပ်စိုတ်တုဲ) အာမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ခန္ဒံအဒတွာဂမနသိက္ခာပိုဒ် ဒသမတုဲရ။
