၅.၈.၁၀။ ဆန္ဒံအဒတွာဂမနသိက္ခာပိုဒ်

၅.၈.၁၀။ ဆန္ဒံအဒတွာဂမနသိက္ခာပိုဒ် 479) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုန်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် သၚ် ကောံဓရီု နကဵုကိစ္စကေၚ်ကာထေက်ကဵုသ္ပ မမိက်ကဵုမွဲမွဲရ၊ ခမဳဆဗ္ဗဂ္ဂဳဂမၠိုၚ် ဒှ်အဃောဇိၚ်သ္ၚာတုဲ ကဵုဆန် ‘ပွမတုပ်စိုတ်’ ကုခမဳမွဲဇကုအိုတ်ရ။ ပ္ဍဲအခိၚ်ဂှ် သၚ်ဂှ် “ယြဴတၞဟ်နဖဵုကမ်မွဲ ကောံဓရီုရ၊ ကြက်သ္ပကမ်ဂှ်ရ” ရဴဝွံ စွံပတန်ဉတ်ရ၊ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် “ရဴဝွံဟေၚ် ခမဳဂမၠိုၚ်ဝွံ သ္ပကမ် ကုခမဳမွဲဇကုအိုတ်ရ၊ မၞးတအ်ညးဂမၠိုၚ် သ္ပကမ် မုရဴကုခမဳအိုတ်ရော?” ရဴဝွံ သ္ဂးတုဲ သီုဟွံကဵုဆန် ဒၠိုက်ကတဵုနူဒၞါဲတုဲ စ္ဍးအာရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂှ် ဂလာန်သ္ဂုတ်သွာတ် ပ္ဍဲသၚ် ဃောကတဵုဒှတ် ဟွံကဵုဆန်တုဲ ဒၠိုက်ကတဵုနူဒၞါဲတုဲ စ္ဍးအာရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် တၠအဲ ဂလာန်သ္ဂုတ်သွာတ် ပ္ဍဲသၚ် ဃောကတဵုဒှ် ဟွံကဵုဆန်တုဲ ဒၠိုက်ကတဵုနူဒၞါဲတုဲ စ္ဍးအာရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တၠအဲ မုဟိုတ် ဂလာန်သ္ဂုတ်သွာတ် ပ္ဍဲသၚ် ဃောကတဵုဒှ် ဟွံကဵုဆန်တုဲ ဒၠိုက်ကတဵုနူဒၞါဲတုဲ စ္ဍးအာရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲ သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။

480) “ယြဴခမဳမွဲ ဂလာန်သ္ဂုတ်သွာတ် ပ္ဍဲသၚ် ဃောကတဵုဒှ် ဟွံကဵုဆန်တုဲ ဒၠိုက်ကတဵုနူဒၞါဲတုဲ စ္ဍးအာမ္ဂး၊ (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜး အိုတ်ညိ ရဴဝွံ သ္ဂးရ)။