၅.၈.၁.၁။ ပွံက်သဟဓမ္မိကသိက္ခာပိုဒ်
435) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ခမဳဂမၠိုၚ် မ္ဂးဂှ် ခမဳသအာၚ်ဂမၠိုၚ်။ ဗွဲမညဳသၟဟ်ကဵုဓရ် မ္ဂးဂှ် သိက္ခာပိုဒ် တဳလမၞုံပိုဉ်ကျာ်တြဲ ပညပဴ်လဝ်ဂှ် ဗဗွဲကဵုဓရ်မ္ဂးရ။ ဟီုဒၠောံဗတောန် နကဵုသိက္ခာပိုဒ်ဂှ်မ္ဂး ယွံကောန်တၠတအ် လုကဴကာလဗၞတ်ဟဂွံသၟာန် ခမဳဝိနယ်ဓိုရ် မစဳကၠးဆိုက်ဗ္ဒက်သအာၚ်ဏီ အဲကြက်ဒှ်ညးဒ္ဂေတ် ပ္ဍဲသိက္ခာပိုဒ်ဂှ် ဟွံသေၚ်ရ၊ ကြက်သၟာန်ခမဳမၞုံကဵုပညာ မစဳကၠးဆိုက်ဗ္ဒက်သကေက်သကာ ပ္ဍဲဝိနယ်သိက္ခာပိုဒ် မၞုံကဵုလမိၚ်လညာတ်ဂၠိုၚ် မလေပ်ကဵုတွံဂလာန်ဓရ်ဏီရ ရဴဝွံ ဟီုသ္ဂးမ္ဂး၊ ဒးအာပတ်ပါဲစိုတ်ရ။
436) ပ္ဍဲခမဳ မၞုံကဵုစၟတ်သမ္တီခမဳဒှ်တုဲ ဟီုသ္ဂးရဴဝွံမ္ဂး၊ ဒးအာပတ်ပါဲစိုတ်ရ။ ပ္ဍဲခမဳ မၞုံကဵုသၠေဟ်ပၟာဒှ်တုဲ ဟီုသ္ဂးရဴဝွံမ္ဂး၊ ဒးအာပတ်ပါဲစိုတ်ရ။ ပ္ဍဲခမဳ မၞုံကဵုစၟတ်သမ္တီ ခမဳဟွံသေၚ်ဒှ်တုဲ ဟီုသ္ဂးရဴဝွံမ္ဂး၊ ဒးအာပတ်ပါဲစိုတ်ရ။ ဟီုဒၠောံဗတောန် နကဵုပညပ်သိက္ခာပိုဒ် ဟွံသေၚ်မ္ဂး “သိက္ခာပိုဒ်ဝွံ ဟွံဒှ်တဴတၞဟ်နအေၚ်သတှေ်ရ၊ ဟွံဒှ်တဴတၞဟနခါလယှ်ကၠေံ ကိလေသရ၊ ဟွံဒှ်တဴတၞဟ်နပွမရၚ်တၠုၚ်ကဵုလျုၚ်ဇြုၚ်သ္ဍိုက်ရ၊ ဟွံဒှ်တဴ တၞဟ်နပွမလီုပလာ်ကိလေသရ၊ ဟွံဒှ်တဴတၞဟ်နပွမပတိတ်ဇြဟတ်လွဳပရာရ” ရဴဝွံ ဟီုသ္ဂးရ။ “ယွံကောန်တၠတအ် လုကဴကာလဗၞတ်ဟဂွံသၟာန် ခမဳဝိနယ်ဓိုရ် မစဳကၠးဆိုက်ဗ္ဒက်သအာၚ်ဏီ အဲကြက်ဒ္ဂေတ် ပ္ဍဲသိက္ခာပိုဒ်ဂှ် ဟွံသေၚ်ရ၊ ကြက်သၟာန် ခမဳမၞုံကဵုပညာ မစဳကၠးဆိုက်ဗ္ဒက်သကေက်သကာ ပ္ဍဲဝိနယ်သိက္ခာပိုဒ် မၞုံကဵုလမိၚ်လညာတ်ဂၠိုၚ် မလေပ်ဟီုတွံ ဂလာန်ဓရ်ဏီရ” ရဴဝွံ ဟီုသ္ဂးမ္ဂး၊ ဒးအာပတ်ဒုက္ကဋ်ရ။ ညးဟွံသေၚ်ကဵုခမဳဂှ် ဟီုဒၠောံဗတောန်နကဵုပညပ်သိက္ခာပိုဒ်ကီု နကဵုပညပ်သိက္ခာပိုဒ်ဟွံသေၚ်ကီုမ္ဂး “သိက္ခာပိုဒ်ဝွံ ဟွံဒှ်တဴ တၞဟ်နအေၚ်သတှေ်ရ၊ ဟွံဒှ်တဴတၞဟ်နခါလယှ်ကၠေံကိလေသရ၊ ဟွံဒှ်တဴတၞဟ်နပွမရၚ်တၠုၚ်ကဵုလျုၚ်ဇြုၚ်သ္ဍိုက်ရ၊ ဟွံဒှ်တဴ တၞဟ်နပွမလီုပလာ်ကိလေသရ၊ ဟွံဒှ်တဴတၞဟ်နပွမပတိတ်ဇြဟတ်လွဳပရာရ” ရဴဝွံ ဟီုသ္ဂးရ။ “ယွံကောန်တၠတအ် လုကဴကာလဗၞတ်ဟဂွံသၟာန် ခမဳဝိနယ်ဓိုရ် မစဳကၠးဆိုက်ဗ္ဒက်သအာၚ်ဏီ အဲကြက်ဒ္ဂေတ်ပ္ဍဲသိက္ခာပိုဒ်ဂှ် ဟွံသေၚ်ရ၊ ကြက်သၟာန်ခမဳမၞုံကဵုပညာ မစဳကၠးဍိုက်ဗ္ဒက်သကေက်သကာ ပ္ဍဲဝိနယ်သိက္ခာပိုဒ် မၞုံကဵုလမိၚ်လညာတ်ဂၠိုၚ် မလေပ်ဟီုတွံဂလာန်ဓရ်ဏီရ” ရဴဝွံ ဟီုသ္ဂးမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုစၟတ်သမ္တီမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုစၟတ်သမ္တီ ညးဟွံသေၚ်ကဵုခမဳမ္ဂး၊ ဒးအာပတ်ဒုက္ကဋ်ရ။ ဍေံမမိက်ဒ္ဂေက် မ္ဂးဂှ် ညးမၞုံပၟိက် တၞဟ်နဒ္ဂေတ်ရောၚ်။ သ္ဒးသ္ပညံၚ်ဂွံတီရ မ္ဂးဂှ် သ္ဒးတီရ။ သ္ဒးသၟာန်ဂၠိုၚ်ဂၠိုၚ်ကဵုဝါရ မ္ဂးဂှ် ယွံတဳလပိုဉ် သိက္ခာပိုဒ်ဝွံ မုရဴအကာဲအရာမွဲတုဲ တဴရော? အရထသိက္ခာပိုဒ်ဝွံတုန် ညးဍေံရော? ရဴဝွံ သ္ဒးသၟာန်။ သ္ဒးကေဝ်ကၠေဝ်ဗ္စာရဏာဂၠိုၚ်ဂၠိုၚ်ကဵုဝါရ မ္ဂးဂှ် သ္ဒးချပ်ရ၊ သ္ဒးကေဝ်ကၠေဝ်ရ။ ပွမသ္ပရဴသာ်ဝွံ ပ္ဍဲအရာမမိက်ဒ္ဂေတ်သိက္ခာပိုဒ်ဂှ် ဒ္ဂေတ်ဝတ်ရောၚ် မ္ဂးဂှ် ပွမသ္ပ ရဴသာ်ဝွံ ပ္ဍဲအရာမမိက်ဒ္ဂေတ်သိက္ခာပိုဒ်ဂှ် ဒ္ဂေတ်မဗဗွဲကဵုဓရ်ရောၚ်။
437) “ကြက်တီရ ကြက်ဒ္ဂေတ်ရ” ရဴဝွံ ဟီုသ္ဂးမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သဟဓမ္မိကသိက္ခာပိုဒ် ပဌမတုဲရ။
