၅.၈.၁။ သဟဓမ္မိကသိက္ခာပိုဒ်

433) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဃောသိတာရာမ် ဇရေၚ်ဍုၚ်ကောသမ္ဗဳဂှ် တဳလပိုဉ်ဆန္န ဒ္ဂေတ်သ္ပတဴ ဒ္ဂေတ်မဟွံထေက်ကဵုဒ္ဂေတ် သ္ပရ။ ခမဳဂမၠိုၚ် “ယွံကောန်တၠဆန္န လ္ပပကမၠောန်မၞုံသဘဴရဴဝွံညိ၊ ကမၠောန်ဂှ် ဟွံဂပ်ဝ်ရ” ရဴဝွံ ဟီုသ္ဂးအိုတ်ရ။ တဳလပိုဉ်ဆန္နဂှ် “ယွံကောန်တၠတအ် လုကဴကာလဗၞတ်ဟွံဂွံသၟာန် ခမဳဝိနယ်ဓိုရ် မစဳကၠးဆိုက်ဗ္ဒက်သအာၚ်ဏီ အဲကြက်ဒ္ဂေတ် ပ္ဍဲသိက္ခာပိုဒ်ဂှ် ဟွံသေၚ်ရ” ရဴဝွံ သ္ဂးရ။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်ဆန္န ခမဳဂမၠိုၚ် ဟီုဒၠောံဗတောန် ဗွဲမညဳသၟဟ်ကဵုသိက္ခာပိုဒ်မ္ဂး ယွံကောန်တၠတအ် လုကဴကာလဗၞတ်ဟဂွံသၟာန် ခမဳဝိနယ်ဓိုရ် မစဳကၠးဆိုက်ဗ္ဒက်သအာၚ်ဏီ အဲကြက်ဒ္ဂေတ် ပ္ဍဲသိက္ခာပိုဒ်ဂှ် ဟွံသေၚ်ရ ရဴဝွံ ဂွံဟီုသ္ဂးရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံဆန္န တၠအဲ ခမဳဂမၠိုၚ် ဟီုဒၠောံဗတောန် ဗွဲမညဳသၟဟ်ကဵုသိက္ခာပိုဒ်မ္ဂး ယွံကောန်တၠတအ် လုကဴကာလဗၞတ်ဟဂွံသၟာန်ခမဳဝိနယ်ဓိုရ် မစဳကၠးဆိုက်ဗ္ဒက်သအာၚ်ဏီ အဲကြက်ဒ္ဂေတ် ပ္ဍဲသိက္ခာပိုဒ်ဂှ် ဟွံသေၚ်ရ ရဴဝွံ ဟီုသ္ဂးရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တၠအဲ မုဟိုတ် ခမဳဂမၠိုၚ် ဟီုဒၠောံဗတောန် ဗွဲမညဳသၟဟ်ကဵုသိက္ခာပိုဒ်မ္ဂး “ယွံကောန်တၠတအ် လုကဴကာလ ဗၞတ်ဟဂွံသၟာန် ခမဳဝိနယ်ဓိုရ် မစဳကၠးဆိုက်ဗ္ဒက်သအာၚ်ဏီ အဲကြက်ဒ္ဂေတ်ပ္ဍဲသိက္ခာပိုဒ်ဂှ် ဟွံသေၚ်ရ” ရဴဝွံ ဂွံဟီုသ္ဂးရော? ယွံတြုံမလ္ၚုသၟူ (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။

434) “ယြဴခမဳမွဲ ခမဳဂမၠိုၚ် ဟီုဒၠောံဗတောန် ဗွဲမညဳသၟဟ်ကဵုသိက္ခာပိုဒ်မ္ဂး ‘ယွံကောန်တၠတအ် လုကဴကာလဗၞတ်ဟဂွံသၟာန် ခမဳဝိနယ်ဓိုရ် မစဳကၠးဆိုက်ဗ္ဒက်သအာၚ်ဏီ အဲကြက်ဒ္ဂေတ်ပ္ဍဲသိက္ခာပိုဒ်ဂှ် ဟွံသေၚ်ရ’ ရဴဝွံ ဟီုသ္ဂးမ္ဂး၊ (ကုခမဳဂှ်) ဒးအာပတ်ပါဲစိုတ်ရ။ ယွံခမဳတအ် ခမဳ မမိက်ဒ္ဂေတ်လ္ၚတ်ဂှ် သ္ဒးသ္ပညံၚ်သ္ဂောံတီရ၊ သ္ဒးသၟာန်ဂၠိုၚ်ဂၠိုၚ်ကဵုဝါရ၊ သ္ဒးကေတ်ကၠေဝ်ဗ္စာရဏာ ဂၠိုၚ်ဂၠိုၚ်ကဵုဝါရ၊ ပွမသ္ပရဴသာ်ဝွံ ပ္ဍဲအရာမမိက်ဒ္ဂေတ်သိက္ခာပိုဒ်ဂှ် ဒ္ဂေတ်ဝတ်ရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။