၅.၇.၉။ ဥက္ခိတ္တသမ္ဘောဂသိက္ခာပိုဒ်
423) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန်မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ် ခမဳဆဗ္ဗဂ္ဂဳဂမၠိုၚ် သီုကဵုမတီတဴ ကေုာံခမဳအရိဋ္ဌ ပွမမၞုံကဵုကွေတ်မိစ္ဆာသာ်ဂှ် ပွမဟဂွံသ္ပဗွဲမဗဗွဲကဵုဝိနယဏီ မဟွံမွဲကဵုပွမသၠးကၠေံကွေတ်မိစ္ဆာဂှ် မွဲစွံလေဝ်ပြဘိုဂ်အိုတ်ရ၊ မွဲစွံလေဝ်ပဒတဴအိုတ်ရ၊ မွဲစွံလေဝ်တိက်အိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် သီုကဵုမတီတဴကေုာံခမဳအရိဋ္ဌပွမမၞုံကဵုကွေတ်မိစ္ဆာသာ်ဂှ် ပွမဟဂွံသ္ပဗွဲမဗဗွဲကဵုဝိနယ်ဏီ မဟွံမွဲကဵုပွမသၠးကၠေံကွေတ်မိစ္ဆာဂှ် မွဲစွံလေဝ်ပြဘိုဂ်အိုတ်ရ၊ မွဲစွံလေဝ်ပဒတဴအိုတ်ရ၊ မွဲစွံလေဝ်တိက်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ပ ။ “ယွံခမဳတအ် မၞးတအ်ညးဂမၠိုၚ်သီုကဵုမတီတဴ ကေုာံခမဳအရိဋ္ဌ ပွမမၞုံကဵုကွေတ်မိစ္ဆာသာ်ဂှ် ပွမဟဂွံသ္ပဗွဲမဗဗွဲကဵုဝိနယဏီ မဟွံမွဲကဵုပွမသၠးကၠေံကွေတ်မိစ္ဆာဂှ် မွဲစွံလေဝ်ပြဘိုဂ်အိုတ်ရ၊ မွဲစွံလေဝ်ပဒတဴအိုတ်ရ၊ မွဲစွံလေဝ်တိက်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ်မုဟိုတ် သီုကဵုမတီတဴကေုာံခမဳအရိဋ္ဌ သီုကဵုမတီတဴ ကေုာံခမဳအရိဋ္ဌ ပွမမၞုံကဵုကွေတ်မိစ္ဆာသာ်ဂှ် ပွမဟဂွံသ္ပဗွဲမဗဗွဲကဵုဝိနယဏီ မဟွံမွဲကဵုပွမသၠးကၠေံကွေတ်မိစ္ဆာဂှ် မွဲစွံလေဝ်ပြဘိုဂ်အိုတ်ရော? မွဲစွံလေဝ်ပဒတဴအိုတ်ရော? မွဲစွံလေဝ်တိက်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
424) “ယြဴခမဳမွဲ သီုကဵုမတီတဴကေုာံခမဳ သီုကဵုမတီတဴ ပွမမၞုံကဵုကွေတ်မိစ္ဆာသာ်ဂှ် ပွမဟဂွံသ္ပဗွဲမဗဗွဲကဵုဝိနယဏီ မဟွံမွဲကဵုပွမသၠးကၠေံကွေတ်မိစ္ဆာဂှ် မွဲစွံလေဝ်ပြဘိုဂ်မ္ဂး၊ မွဲစွံလေဝ်ပဒတဴမ္ဂး၊ မွဲစွံလေဝ်တိက်မ္ဂး (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
၇.၉.၁။ ပွံက်ဥက္ခိတ္တသမ္ဘောဂသိက္ခာပိုဒ် 425) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ တဳရ မ္ဂးဂှ် အလဵုဇကုလေဝ် တီရ၊ ညးသအာၚ်ဂမၠိုၚ်လေဝ် ဟီုလဴကဵုကုခမဳဂှ်အိုတ်ရ၊ ခမဳဂှ်လေဝ် ဟီုလဴစရ။ ပွမမၞုံကဵုကွေတ်မိစ္ဆာသာ်ဂှ် မ္ဂးဂှ် ပွမမၞုံကဵုကွေတ်မိစ္ဆာ ရဴဝွံမ္ဂး “ဓရ်ဂမၠိုၚ်ဏီ တဳလမၞုံပိုဉ်ကျာ်တြဲ မတွံလဝ်ရဴဝွံမ္ဂး လေပ်သ္ပကဵုအန္တရာယ် (ၛာန်မဂ်ဖိုလ်) အိုတ်ဂှ် အတိုၚ်တွံလဝ်ဂှ် အဲတီကေတ်ရ၊ ဓရ်ဂမၠိုၚ်ဂှ် ဟွံသၟဟ်အစောံတၞဟ်နသ္ပကဵုအန္တရာယ် (ၛာန်မဂ်ဖိုလ်) ကုညးသိပ်ဂၠိပ်” ရ။ ပွမဟဂွံသ္ပဗွဲမဗဗွဲကဵုဝိနယ်ဏီ မ္ဂးဂှ် ပွမဗက်ဗ္ဒဴပတိတ်လဝ် ပွမဟဂွံကော်ပၠုပ်ဏီရ။ ကေုာံခမဳ မဟွံမွဲကဵုပွမသၠးကၠေံကွေတ်မိစ္ဆာဂှ် မ္ဂးဂှ် ကေုာံခမဳ မဟဂွံသၠးကၠေံကွေတ်မှာရာဝွံ။ ပ္ဍဲအရာပြဘိုဂ်မွဲစွံ မ္ဂးဂှ် ပြဘိုဂ်မ္ဂးဂှ် ‘အာမိသသမ္ဘောဂ’ ပွမပြဘိုဂ်ဂြပ်ပစ္စယ်၊ ‘ဓမ္မသမ္ဘောဂ’ ပွမပြဘိုဂ်ဓရ် ရဴဝွံ ပွမပြဘိုဂ်နွံၜါဂကူရ။ ‘အာမိသသမ္ဘောဂ’ ပွမပြဘိုဂ်ပစ္စယ်မ္ဂးဂှ် ကဵုအာမိသမပ္တံပိဏ္ဍပါတ်မ္ဂး၊ ဒုၚ်ဂိုၚ်ကေတ်မ္ဂး၊ ဒးအာပတ်ပါဲစိုတ်ရ။ ‘ဓမ္မသမ္ဘောဂ’ ပွမပြဘိုဂ်ဓရ်မ္ဂးဂှ် ဗတောန်လေဝ်ဗတောန်ကဵုမ္ဂး၊ ဖအောဝ်လေဝ်ဖအောဝ်ကဵုဗတောန်မ္ဂး၊ ဗတောန်လေဝ်ဗတောန်ကဵုနပိုဒ်မ္ဂး၊ ဖအောဝ်လေဝ်ဖအောဝ်ကဵုဗတောန်မ္ဂး၊ ဇၟာပ်ပိုဒ်ဇၟာပ်ပိုဒ် ဒးအာပတ်ပါဲစိုတ်ရ။ ဗတောန်လေဝ်ဗတောန်ကဵု နအက္ခရ်မ္ဂး၊ ဖအောဝ်လေဝ်ဖအောဝ်ကဵုဗတောန်မ္ဂး၊ ဇၟာပ်အက္ခရ် ဇၟာပ်အက္ခရ် ဒးအာပတ်ပါဲစိုတ်ရ။ မွဲစွံလေဝ်ပဒတဴမ္ဂး (ပံၚ်ဖက်) မ္ဂးဂှ် သ္ပဥပေါသ်ကီု ပဝါရဏာကီု သံဃကမ်ကီု မွဲဟာန်ကေုာံခမဳမဗက်ဗ္ဒဴလဝ်မ္ဂး ဒးအာပတ်ပါဲစိုတ်ရ။ မွဲစွံလေဝ်တိက်မ္ဂး မ္ဂးဂှ် ပ္ဍဲဘာမၞုံကဵုစၟဳမွဲဓဝ် ခမဳမဗက်ဗ္ဒဴလဝ်တိက်ဒၟံၚ်နေဝ် ခမဳသအာၚ်တိက်မ္ဂး၊ ဒးအာပတ်ပါဲစိုတ်ရ။ ခမဳသအာၚ်တိက်ဒၟံၚ်နေဝ် ခမဳမဗက်ဗ္ဒက်လဝ် တိက်မ္ဂး ဒးအာပတ်ပါဲစိုတ်ရ။ သီုညးၜါဇကုတိက်အိုတ်မ္ဂး ဒးအာပတ်ပါဲစိုတ်ရ။ ဒၠိုက်ကတဵုတုဲ ဂၠိုၚ်ဂၠိုၚ်ကဵုဝါ တိက်အိုတ်မ္ဂး ဒးအာပတ်ပါဲစိုတ်ရ။
426) ပ္ဍဲခမဳမဗက်ဗ္ဒဴလဝ် မၞုံကဵုစၟတ်သမ္တီ ခမဳမဗက်ဗ္ဒဴလဝ်ဒှ်တုဲ မွဲစွံလေဝ်ပြဘိုဂ်မ္ဂး၊ မွဲစွံလေဝ် ပဒတဴမ္ဂး၊ မွဲစွံလေဝ်တိက်မ္ဂး ဒးအာပတ်ပါဲစိုတ်ရ။ ပ္ဍဲခမဳမဗက်ဗ္ဒဴလဝ် မၞုံကဵုသၠေဟ်ပၟာဒှ်တုဲ မွဲစွံလေဝ်ပြဘိုဂ်မ္ဂး၊ မွဲစွံလေဝ်ပဒတဴမ္ဂး၊ မွဲစွံလေဝ်တိက်မ္ဂး ဒးအာပတ်ဒုက္ကဋ်ရ။ ပ္ဍဲခမဳမဗက်ဗ္ဒဴလဝ် မၞုံကဵုစၟတ်သမ္တီ ခမဳမဗက်ဗ္ဒဴလဝ်ဟွံသေၚ်ဒှ်တုဲ မွဲစွံလေဝ်ပြဘိုဂ်မ္ဂး၊ မွဲစွံလေဝ်ပဒတဴမ္ဂး၊ မွဲစွံလေဝ်တိက်မ္ဂး ဒးအာပတ်ဒုက္ကဋ်ရ။ ပ္ဍဲခမဳမဟွံဗက်ဗ္ဒဴလဝ် မၞုံကဵုစၟတ်သမ္တီ ခမဳမဗက်ဗ္ဒဴလဝ်မ္ဂး ဒးအာပတ်ဒုက္ကဋ်ရ။ ပ္ဍဲခမဳမဟွံဗက်ဗ္ဒဴလဝ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲခမဳမဟွံဗက်ဗ္ဒဴလဝ် မၞုံကဵုစၟတ်သမ္တီ ခမဳမဟွံဗက်ဗ္ဒဴလဝ်မ္ဂး ဟွံဒးအာပတ်ရ။
427) ခမဳမဗက်ဗ္ဒဴလဝ်ဟွံသေၚ် ရဴဝွံ တီမ္ဂး၊ ကော်ပၠုပ်လဒေါဝ်သၚ် ခမဳမဗက်ဗ္ဒဴလဝ်တုဲရ ရဴဝွံ တီမ္ဂး၊ သၠးကၠေံကွေတ်ဂှ်တုဲရ ရဴဝွံ တီမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဥက္ခိတ္တသမ္ဘောဂသိက္ခာပိုဒ် နဝမတုဲရ။
