၅.၇.၇.၁။ ပွံက်သံဝိဓါနသိက္ခာပိုဒ်
414) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ မာတုဂါမ် မ္ဂးဂှ် ဗြဴမၞိဟ်ရောၚ်၊ လကိုဟ် (ဒေဝတဴ) ဗြဴ ဟွံသေၚ်၊ ပြိုတ်ဗြဴ ဟွံသေၚ်၊ တိရိစ္ဆာန်ဗြဴ ဟွံသေၚ်၊ မၞိဟ်ဗြဴ မသၟဟ်စောံ တၞဟ်နတီကၠိုဟ်ခၠၚ် ဂလာန်ခိုဟ် ဂလာန်ဟွံခိုဟ်ဂလာန်ရုန်မဵု ဂလာန်ဟွံရုန်မဵုရောၚ်။ မွဲစွံ မ္ဂးဂှ် မွဲဂကောံဓဝ်ရောၚ်။ ကသေံကၟဝ်တုဲ မ္ဂးဂှ် “ယွံဒေံဗြဴ အာအိုတ်ရ ယွံတဳလပိုဉ် အာအိုတ်ရ၊ ယွံတဳလပိုဉ်အာအိုတ်ရ ယွံဒေံဗြဴ အာအိုတ်ရ၊ ပ္ဍဲတ္ၚဲဏအ်ကီု ပ္ဍဲတ္ၚဲယးကီု ပ္ဍဲကလဳတေံကီု အာအိုတ်ရ” ရဴဝွံ ကသေံကၟဝ်မ္ဂး၊ ဒးအာပတ်ဒုက္ကဋ်ရ။ ဗွဲတွဵုမယုတ် ကွာန်မွဲသအာၚ်လေဝ် မ္ဂးဂှ် ပ္ဍဲကွာန်မသ္ၚောဲခရာမွဲစာၚ်ပဝ် ဇၟာပ်ကွာန်မွဲ ဇၟာပ်ကွာန်မွဲ ‘ရိုဟ်ကွာန်မွဲ ရိုဟ်ကွာန်မွဲ’ ဒးအာပတ်ပါဲစိုတ်ရ။ ပ္ဍဲတရဴဂြိုပ် မဟွံသေၚ်ကဵုကွာန်တုန် ဇၟာပ်ကဝက်ယောဇနာ ဇၟာပ်ကဝက်ယောဇနာ ဒးအာပတ်ပါဲစိုတ်ရ။
415) ပ္ဍဲမာတုဂါမ်ဂှ် မၞုံကဵုစၟတ်သမ္တီ မာတုဂါမ်ဒှ်တုဲ ကသေံကၟဝ်တုဲ သွိုန်ဗပိုန်တဴတရဴအဓါန်မဂၠိၚ်သ္ၚောဲမွဲဂၠံၚ်ဓဝ်မ္ဂး ဗွဲတွဵုမယုတ် ကွာန်မွဲသအာၚ်လေဝ် အာတဴမ္ဂး ဒးအာပတ်ပါဲစိုတ်ရ။ ပ္ဍဲမာတုဂါမ်ဂှ် မၞုံကဵုသၠေဟ်ပၟာဒှ်တုဲ ကသေံကၟဝ်တုဲ သွိုန်ဗပိုန်တဴ တရဴအဓါန်မဂၠိၚ်သ္ၚောဲ မွဲဂၠံၚ်ဓဝ်မ္ဂး ဗွဲတွဵုမယုတ် ကွာန်မွဲသအာၚ်လေဝ် အာတဴမ္ဂး ဒးအာပတ်ပါဲစိုတ်ရ။ ပ္ဍဲမာတုဂါမ်ဂှ် မၞုံကဵုစၟတ်သမ္တီ ညးမာတုဂါမ်ဟွံသေၚ်ဒှ်တုဲ ကသေံကၟဝ်တုဲ သွိုန်ဗပိုန်တဴ တရဴအဓါန်မဂၠိၚ်သ္ၚောဲမွဲဂၠံၚ်ဓဝ်မ္ဂး ဗွဲတွဵုမယုတ် ကွာန်မွဲသအာၚ်လေဝ် အာတဴမ္ဂး ဒးအာပတ်ပါဲစိုတ်ရ။ ခမဳ ကသေံကၟဝ်ရ၊ မာတုဂါမ် ဟွံကသေံကၟဝ်မ္ဂး ဒးအာပတ်ဒုက္ကဋ်ရ။ ကသေံကၟဝ်ကေုာံလကိုဟ် (ဒေဝတဴ) ဗြဴကီု ကေုာံပြိုတ်ဗြဴကီု ကေုာံခမၞုဲဗြဴကီု ကေုာံခမၞုဲဗြဴကီု ကေုာံတိရစ္ဆာန်ဗြဴမပတောံလဝ် မၞိဟ်ကီုမွဲစွံတုဲ သွိုန်ဗပိုန်တဴ တရဴအဓါန်မဂၠိၚ်သ္ၚောဲမွဲဂၠံၚ်ဓဝ်မ္ဂး၊ ဗွဲတွဵုမယုတ် ကွာန်မွဲသအာၚ်လေဝ်အာတဴမ္ဂး ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုမာတုဂါမ်ဂှ် မၞုံကဵုစၟတ်သမ္တီမာတုဂါမ်မ္ဂး ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုမာတုဂါမ် မၞုံသၠေဟ်ပၟာမ္ဂး ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုမာတုဂါမ်ဂှ် မၞုံကဵုစၟတ်သမ္တီမာတုဂါမ်ဟွံသေၚ်မ္ဂး ဟွံဒးအာပတ်ရ။
416) ဟွံကသေံကၟဝ်တုဲ အာမ္ဂး၊ မာတုဂါမ် ကသေံကၟဝ်တုဲ ခမဳဟွံကသေံကၟဝ်မ္ဂး ပွမချိၚ်ဖါပ်ဆောတ်ယောၚ်တုဲ အာမ္ဂး ဟိုတ်နူပရိုက်ဘဲဂမၠိုၚ် အာမ္ဂး ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သံဝိဓါနသိက္ခာပိုဒ် သတ္တမတုဲရ။
