၅.၇.၇။ သံဝိဓါနသိက္ခာပိုဒ်
412) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳမွဲဇကု အာဍုၚ်သာရဝှ် ပ္ဍဲဇနပိုဒ်ကောသလရးဂမၠိုၚ်မ္ဂး လောန်ၜက်အာ တြၚ်ကွာန်မွဲမဟွံပြာကဋ်ရ။ ဗြဴမွဲဂှ်လေဝ် ကတဵုဒှ်ကယျာန်ဓဝါတ်သေက်ဇဵု ကဵုတြုံတၠသ္ၚိတုဲ တိတ်ကၠုၚ်နူကွာန်မ္ဂးညာတ်ဒးခမဳဂှ်တုဲ “ယွံတဳလပိုဉ် တဳလပိုဉ်က္ညအာ မုရဴဌာန်မွဲရော?” ရဴဝွံ ဂရၚ်ပတီရ။ ယွံဒေံဗြဴ အဲကြက်အာဍုၚ်သာရဝှ်ရ ရဴဝွံ သ္ဂးတဴမ္ဂး အဲဍိက်ဗြဴ မိက်ဗက်အာမွဲဟာန်ကေုာံ တဳလပိုဉ်ရ ရဴဝွံ (ဂရၚ်ပတီရ)။ ယွံဒေံဗြဴ (ဩဝ်ဗက်ကၠုၚ်ညိ) ကြက်အာရ (ရဴဝွံသ္ဂးတုဲ အာတဴရ)။ ပ္ဍဲအခိၚ်ဂှ် တြုံတၠသ္ၚိဗြဴဂှ် တိတ်ကၠုၚ်နူကွာန်တုဲ “ယွံနာဲတအ် ညာတ်တဴ ဗြဴမၞုံသဘဴရဴဝွံ အိုတ်ဟာ” ရဴဝွံ သၟာန်မၞိဟ်ဂမၠိုၚ်ရ။ ယွံကောန်နာဲ ဗြဴဂှ် ဗက်အာကေုာံခမဳမွဲစွံရ ရဴဝွံ (သ္ဂးအိုတ်ရ)။ တြုံဂှ်ဗက်အာလၟေၚ်တုဲ ရပ်ကေတ်ခမဳဂှ်တုဲမ္ဂး ဂဒုထၞက်တုဲ ဗလးကၠေံရ။ ပ္ဍဲအခိၚ်ဂှ် ခမဳဂှ် သီုမၚုၚ်ၚဒၟံၚ်ပ္ဍဲသၟဝ်တမ်ဆုမွဲဂှ် ဂဇအ်ဒၟံၚ်ရ။ ပ္ဍဲအခိၚ်ဂှ် ဗြဴဂှ် “ယွံကော ခမဳဂှ် ဟွံကောဏာအဲရ၊ ဗွဲစၟတ်တုန် အဲဟေၚ် အာကေုာံခမဳဂှ်မွဲစွံရ၊ ခမဳဂှ် ဒုဟ်ဟွံမွဲရ၊ ဩဝ်အာညိ ဩဝ်ကလအ်ဝန်စဝ် ‘ကဵုအေၚ်ဒုၚ်’ ခမဳဂှ်ညိ” ရဴဝွံ သ္ဂးကဵုတြုံဂှ်ရ။ ပ္ဍဲအခိၚ်ဂှ် ခမဳဂှ် အာဍုၚ်သာရဝှ်တုဲ ဟီုလဴဗ္စ ဟိုတ်ပရူပရာဝွံ ကုခမဳဂမၠိုၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂှ် သီုကဵုမတီတဴ ကသေံကၟဝ်ကေုာံမာတုဂါမ်မွဲစွံတုဲ သွိုန်ဗပိုန်တဴ တရဴအဓါန်မဂၠိၚ်သ္ၚောဲမွဲဂၠံၚ်ဓဝ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳ တၠအဲ သီုကဵုမတီတဴ ကသေံကၟဝ်ကေုာံမာတုဂါမ်မွဲစွံတုဲ သွိုန်ဗပိုန်တဴ တရဴအဓါန်မဂၠိၚ်သ္ၚောဲမွဲဂၠံၚ်ဓဝ်ရ ဟီုဂှ် ဍာ်ပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဲပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ သီုကဵုမတီတဴ ကသေံကၟဝ်ကေုာံမာတုဂါမ်မွဲစွံတုဲ သွိုန်ဗပိုန်တဴ တရဴအဓါန်မဂၠိၚ်သ္ၚောဲမွဲဂၠံၚ်ဓဝ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
413) “ယြဴခမဳမွဲ သီုကဵုမတီတဴ ကသေံကၟဝ်ကေုာံမာတုဂါမ်မွဲစွံတုဲ သွိုန်ဗပိုန်တဴ တရဴအဓါန်မဂၠိၚ်သ္ၚောဲ မွဲဂၠံၚ်ဓဝ်မ္ဂး၊ ဗွဲတွဵုမယုတ် ကွာန်မွဲသအာၚ်လေဝ် အာမ္ဂး (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
