၅.၇.၆.၁။ ပွံက်ထေယျသတ္တသိက္ခာပိုဒ်
409) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ တဳရ မ္ဂးဂှ် အလဵုဇကုလေဝ် တီရ၊ ညးသအာၚ်ဂမၠိုၚ်လေဝ် ဟီုလဴကဵုကုခမဳဂှ်အိုတ်ရ၊ ခမဳဂှ်လေဝ် ဟီုလဴစရ။ ညးဗၞိက်ကမၠတ် မ္ဂးဂှ် ကမၠတ်ဂမၠိုၚ် မသ္ပကမၠောန်ကမၠတ်တုဲ မဟဂွံသ္ပကမၠောန်ကမၠတ်ဏီ ကၠတ်ကေတ် သၟိၚ် (ဂြပ်သၟိၚ်) တုဲလေဝ် အာအိုတ်ရ၊ အခေါၚ်ကၚ်ၚာ်လေဝ် ဗလေတ်ပါဲအိုတ်ရ။ မွဲစွံ မ္ဂးဂှ် မွဲဂကောံဓဝ်ရောၚ်။ ကသေံကၟဝ်တုဲ မ္ဂးဂှ် “ယွံဒကာ အာအိုတ်ရ ယွံတဳလပိုဉ် အာအိုတ်ရ၊ ယွံတဳလပိုဉ်အာအိုတ်ရ ယွံဒကာ အာအိုတ်ရ၊ ပ္ဍဲတ္ၚဲဏအ်ကီု ပ္ဍဲတ္ၚဲယးကီု ပ္ဍဲကလဳတေံကီု အာအိုတ်ရ” ရဴဝွံ ကသေံကၟဝ်မ္ဂး ဒးအာပတ်ဒုက္ကဋ်ရ။ ဗွဲတွဵုမယုတ် ကွာန်မွဲသအာၚ်လေဝ် မ္ဂးဂှ် ပ္ဍဲကွာန်မသ္ၚောဲခရာမွဲစာၚ်ပဝ် ဇၟာပ်ကွာန်မွဲဇၟာပ်ကွာန်မွဲ ‘ရိုဟ်ကွာန်မွဲ ရိုဟ်ကွာန်မွဲ’ ဒးအာပတ်ပါဲစိုတ်ရ။ ပ္ဍဲတရဴဂြိုပ် မဟွံသေၚ်ကဵုကွာန်တုန်ဇၟာပ်ကဝက်ယောဇနာ ဇၟာပ်ကဝက်ယောဇနာ ဒးအာပတ်ပါဲစိုတ်ရ။
410) ညးဗၞိက်ကမၠတ်ဂှ် မၞုံကဵုစၟတ်သမ္တီ ညးဗၞိက်ကမၠတ်ဒှ်တုဲ ကသေံကၟဝ်တုဲသွိုန်ဗပိုန်တဴ တရဴအဓါန်မဂၠိုၚ်သ္ၚောဲမွဲဂၠံၚ်ဓဝ်မ္ဂး ဗွဲတွဵုမယုတ် ကွာန်မွဲသအာၚ်လေဝ် အာတဴမ္ဂး ဒးအာပတ်ပါဲစိုတ်ရ။ ပ္ဍဲညးဗၞိက်ကမၠတ်ဂှ် မၞုံကဵုသၠေဟ်ပၟာဒှ်တုဲ ကသေံကၟဝ်တုဲ သွိုန်ဗပိုန်တဴ တရဴအဓါန်မဂၠိၚ်သ္ၚောဲ မွဲဂၠံၚ်ဓဝ်မ္ဂး၊ ဗွဲတွဵုမယုတ် ကွာန်မွဲသအာၚ်လေဝ် အာတဴမ္ဂး၊ ဒးအာပတ်ပါဲစိုတ်ရ။ ညးဗၞိက်ကမၠတ်ဂှ် မၞုံကဵုစၟတ်သမ္တီ ညးဗၞိက်ကမၠတ်ဟွံသေၚ်ဒှ်တုဲ ကသေံကၟဝ်တုဲ သွိုန်ဗပိုန်တဴ တရဴအဓါန်မဂၠိၚ်သ္ၚောဲမွဲဂၠံၚ်ဓဝ်မ္ဂး၊ ဗွဲတွဵုမယုတ် ကွာန်မွဲသအာၚ်လေဝ် အာတဴမ္ဂး ဒးအာပတ်ပါဲစိုတ်ရ။ ခမဳ ကသေံကၟဝ်ရ၊ မၞိဟ်ဂမၠိုၚ် ဟွံကသေံကၟဝ်အိုတ်မ္ဂး ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုညးဗၞိက်ကမၠတ် မၞုံကဵုစၟတ်သမ္တီညးဗၞိက်ကမၠတ်မ္ဂး ဒးအာပတ်ဒုက္ကဋ်ရ။ ပ္ဍဲညးဟွံသေၚ် ကဵုညးဗၞိက်ကမၠတ် မၞုံကဵုသၠေဟ်ပၟာမ္ဂး ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵု ညးဗၞိက်ကမၠတ် မၞုံကဵုစၟတ်သမ္တီ ညးဗၞိက်ကမၠတ်ဟွံသေၚ်မ္ဂး ဟွံဒးအာပတ်ရ။
411) ဟွံကသေံကၟဝ်တုဲ အာအိုတ်မ္ဂး မၞိဟ်ဂမၠိုၚ် ကသေံကၟဝ်တုဲ ခမဳ ဟွံကသေံကၟဝ်မ္ဂး၊ ပွမချိၚ်ဖါပ်ဆောတ်ယောၚ်တုဲ အာအိုတ်မ္ဂး၊ ဟိုတ်နူပရိုက်ဘဲဂမၠိုၚ် ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ထေယျသတ္ထသိက္ခာပိုဒ် ဆဋ္ဌတုဲရ။
