၅.၇.၆။ ထေယျသတ္တသိက္ခာပိုဒ်

407) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဲပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထိပိဏ္ဍိကသေဌဳ ဇရေၚ်ဍုၚ်သာရဝှ်ဂှ် သၟာဗၞိက်ကွဳတၠ နူဍုၚ်ရာဇဂြိုဟ်မိက်ဂွံအာဒိုဟ်ပလိုတ်ရ။ ခမဳမွဲဇကုဂှ် “အဲလေဝ် မိက်ဂွံအာ ကေုာံ (ကရောံ) ဒကာတအ်ညးဂမၠိုၚ်ရ” ရဴဝွံ သ္ဂးကဵုမၞိဟ်ဂမၠိုၚ်ဂှ်ရ။ ယွံတဳလပိုဉ် ပိုဲဍိက်တအ်ညးဂမၠိုၚ်တုန် ကြက်ပါဲဗလေတ်ကၚ်အိုတ်ရ ရဴဝွံ အခိၚ်မဟီုတိုန်ဂှ် ယွံဒကာတအ် ဩဝ်တီအိုတ်ညိ၊ (ဩဝ်ကၠိုဟ်ခၠၚ်အိုတ်ညိ) ရဴဝွံ သ္ဂးရ။ ပၟၚ်ကၚ်ဂမၠိုၚ် “သၟာဗၞိက် ကြက်ပါဲဗလေတ်အခေါန်ကၚ်ၚာ်ရ” ရဴဝွံ သ္ဂောံမိၚ်ကေတ်အိုတ်ရ။ ပၟၚ်ကၚ်ဂမၠိုၚ်ဂှ် စွံပတန်လဝ်ပၟၚ်ပၟဲ ပ္ဍဲအကြာဂၠံၚ်အိုတ်ရ။ ပ္ဍဲအခိၚ်ဂှ် ပၟၚ်ကၚ်ဂမၠိုၚ်ဂှ် ရပ်ပၠံၚ်ကေတ် သၟာဗၞိက်တုဲ “ယွံတဳလပိုဉ် တဳလပိုဉ် သီုကဵုမတီတဴ မုဟိုတ်ကွာ်တရဴမွဲဟာန်ကေုာံသၟာဗၞိက်ကမၠတ်ရော?” ရဴဝွံ သ္ပပလာဲပထုဲ ခမဳဂှ်တုဲ ဗလးကၠေံအိုတ်ရ။ ပ္ဍဲအခိၚ်ဂှ် ခမဳဂှ် အာဍုၚ်သာရဝှ်တုဲ ဟီုလဴဗ္စ ဟိုတ်ပရူပရာဝွံ ကုခမဳဂမၠိုၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂှ် သီုကဵုမတီတဴ ကသေံကၟဝ်ကေုာံညးဗၞိက်ကမၠတ်မွဲစွံတုဲ သွိုန်ဗပိုန်တဴ တရဴအဓါန်မဂၠိၚ်သ္ၚောဲ မွဲဂၠံၚ်ဓဝ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳ တၠအဲ သီုကဵုမတီတဴ ကသေံကၟဝ်ကေုာံညးဗၞိက်ကမၠတ်မွဲစွံတုဲ သွိုန်ဗပိုန်တဴ တရဴအဓါန်မဂၠိၚ်သ္ၚောဲ မွဲဂၠံၚ်ဓဝ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠအပိုဉ်တြဲပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ သီုကဵုမတီတဴကသေံကၟဝ်ကေုာံညးဗၞိက်ကမၠတ်မွဲစွံတုဲ သွိုန်ဗပိုန်တဴ တရဴအဓါန်မဂၠိၚ်သ္ၚောဲ မွဲဂၠံၚ်ဓဝ်ရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။

408) “ယြဴခမဳမွဲ သီုကဵုမတီတဴ ကသေံကၟဝ်ကေုာံညးဗၞိက်ကမၠတ်မွဲစွံတုဲ သွိုန်ဗပိုန်တဴ တရဴအဓါန်မဂၠိၚ်သ္ၚောဲ မွဲဂၠံၚ်ဓဝ်မ္ဂး၊ ဗွဲတွဵုမယုတ် ကွာန်မွဲသအာၚ်လေဝ် အာမ္ဂး (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။