၅.၇.၄.၁။ ပွံက်ဒုဋ္ဌုလ္လသိက္ခာပိုဒ်

399) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ခမဳ မ္ဂးဂှ် ဒဒက်တဴခမဳမွဲသအာၚ်။ တီရ မ္ဂးဂှ် အလဵုဇကုလေဝ် တီရ၊ ညးသအာၚ်ဂမၠိုၚ်လေဝ် ဟီုလဴကဵုကုခမဳဂှ်အိုတ်ရ၊ ခမဳဂှ်လေဝ် ဟီုလဴစရ။ အာပတ်မရုန်မဵု မ္ဂးဂှ် အာပတ်ပါရာဇ်ပန် သံဃာဒိသေသ်စှ်ပိဂမၠိုၚ်ရောၚ်။ ဂြောပ်ဗ္ဒန်မ္ဂး မ္ဂးဂှ် “ခမဳဝွံ (ညးသအာၚ်ဂမၠိုၚ်) တီဒးမ္ဂး ကြက်စောဒနာအိုတ်ရ၊ ကြက်ကဵုဗှ်ဗၞုဟ်အိုတ်ရ၊ ကြက်တ္ၜေဟ်လက်အိုတ်ရ၊ ကြက်ပျုတ်ဗ္ဒေက်အိုတ်ရ၊ ကြက်ဟွံကဵုမုက်မတ် ကျေဝ်အိုတ်ရ၊ (အဲ) ဟွံဟီုလဴဗ္စရ” ရဴဝွံ အယာံမာတ်ဖျေံကၠေံသဇိုၚ်ဝန်ဂှ် ဒးအာပတ်ပါဲစိုတ်ရ။

400) ပ္ဍဲအာတ်ပတ်မရုန်မဵုဂှ် မၞုံကဵုစၟတ်သမ္တီအာပတ်မရုန်မဵုဒှ်တုဲ ဂြောပ်ဗ္ဒန်မ္ဂး၊ ဒးအာပတ်ပါဲစိုတ်ရ။ ပ္ဍဲအာပတ်မရုန်မဵုဂှ် မၞုံကဵုသၠေဟ်ပၟာဒှ်တုဲ ဂြောပ်ဗ္ဒန်မ္ဂး ဒးအာပတ်ပါဲစိုတ်ရ။ ပ္ဍဲအာပတ်မရုန်မဵုဂှ် မၞုံကဵုစၟတ်သမ္တီအာပတ်ဟွံရုန်မဵုဒှ်တုဲ ဂြောပ်ဗ္ဒန်မ္ဂး၊ ဒးအာပတ်ပါဲစိုတ်ရ။ ဂြောပ်ဗ္ဒန်အာပတ်ဟွံရုန်မဵုမ္ဂး၊ ဒးအာပတ်ဒုက္ကဋ်ရ။ ဂြောပ်ဗ္ဒန် ပွမကလိလောန်မဟွံရုန်မဵု ပွမကလိလောန်ဟွံရုန်မဵုသာမဏဳမ္ဂး၊ ဒးအာပတ်ဒုက္ကဋ်ရ။ ပ္ဍဲအာပတ်မဟွံရုန်မဵုဂှ် မၞုံကဵုစၟတ်သမ္တီ အာပတ်မရုန်မဵုမ္ဂး၊ ဒးအာပတ်ဒုက္ကဋ်ရ။ ပ္ဍဲအာပတ်မဟွံရုန်မဵုဂှ် မၞုံကဵုသၠေဟ်မ္ဂး၊ ဒးအာပတ်ဒုက္ကဋ်ရ။ ပ္ဍဲအာပတ်မဟွံရုန်မဵုဂှ် မၞုံကဵုစၟတ်သမ္တီ အာပတ်မဟွံရုန်မဵုမ္ဂး၊ ဒးအာပတ်ဒုက္ကဋ်ရ။

401) “ပွမကတဵုဒှ်သေက်ဇဵု ပွကယျာန်ဓဝါတ် ပွမဂိုၚ်ကေတ်ကွေတ်မစှ်ေစး ပွမဟီုဂလာန်စှ်ေစးဒဒက်တဴသၚ် ကြက်ကတဵုဒှ်ရ” ရဴဝွံ ဗှ်ဗၞုဟ်ရဴဝွံ ဟွံဟီုလဴဗ္စမ္ဂး၊ “သၚ်ပါ်ဒကးကီုစရိတ်သၚ် (သၚ်ကရောန်) ကီု ကြက်ကတဵုဒှ်ရ” ရဴဝွံ စွံစိုတ်တုဲ ဟွံဟီုလဴဗ္စမ္ဂး ဟွံဒးအာပတ်ရ။ “ခမဳဝွံ သအဵုသကာတ်ရ၊ ကြမ်ကြသကာတ်မြဟ်ရ၊ ကြက်သ္ပတဴအန္တရာယ်လမျီုကီု အန္တရာယ်သာသနာကီုရ” ရဴဝွံ ပၠုပ်စိုတ်တုဲ ဟွံဟီုလဴဗ္စမ္ဂး၊ ဟိုတ်မဟွံညာတ် ခမဳသအာၚ်ဂမၠိုၚ်မဗဗွဲတုဲ ဟွံဟီုလဴဗ္စမ္ဂး၊ သီုဟွံမွဲပၟိက်ဂြောပ်ဗ္ဒန် ဟွံဟီုလဴဗ္စမ္ဂး၊ “နပွကမၠောန်ဇကု ကြက်ပြာကဋ်ရ” ရဴဝွံ ဗှ်ဗၞုဟ်ရဴဝွံ ဟွံဟီုလဴဗ္စမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဒုဋ္ဌုလ္လသိက္ခာပိုဒ် စတုတ္ထတုဲရ။