၅.၇.၄။ ဒုဋ္ဌုလ္လသိက္ခာပိုဒ်
397) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန်မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် ဟိုတ်မဒးအာပတ်သံဃာဒိသေသ် ပွမတိတ်သုက် မၞုံကဵုစေတနာပြကဋ်ဂှ်ရ “ယွံကောန်တၠအဲဒးအာပတ်သံဃာဒိသေသ် ပွမတိတ်သုက် မၞုံကဵုစေတနာပြာကဋ်ရ၊ လ္ပဟီုလဴ ကုခမဳမမိက်ကဵုသၞမွဲမွဲညိ” ရဴဝွံ ဟီုသ္ဂးကဵု ကုခမဳမဒှ်ကွးပဒတဴမွဲစွံ ကောဇကုရ။ ပ္ဍဲအခိၚ်ဂှ် ခမဳမွဲဇကု ဟိုတ်မဒးအာပတ်သံဃာဒိသေသ် ပွမတိတ်သုက် မၞုံကဵုစေတနာပြကဋ်ဂှ်ရ အာတ်တဴသၚ် ပြဝးမဆေၚ်စပ်ကဵုအာပတ်ဂှ်ရ၊ သၚ်ကဵုပြဝးမဆေၚ်စပ်ကဵုအာပတ်ဂှ် ကုခမဳဂှ်၊ ခမဳဂှ် ပဒတဴဒၟံၚ်ပြဝးမ္ဂး ညာတ်ဒးခမဳဂှ်တုဲ “ယွံကောန်တၠ အဲဍိက်ဟိုတ်မဒးအာပတ်သံဃာဒိသေသ် ပွမပတိတ်သုက် မၞုံကဵုစေတနာပြာကဋ်ဂှ်ရ အာတ်တဴသၚ်ပြဝးမဆေၚ်စပ်ကဵုအာပတ်ဂှ်ရ၊ သၚ်ကဵုပြဝးမဆေၚ်စပ်ကဵုအာပတ်ဂှ် ကုအဲဍိက်ဂှ်ရ၊ အဲဍိက်ဂှ်လေဝ် ပဒတဴဒၟံၚ်ပြဝးရ၊ ယွံကောန်တၠ အဲဍိက် ဟီုလၟိၚ်ပြဝးရ၊ အဲဍိက်ဂှ် ညးဟီုလၟိၚ်ပြဝးရရဴဝွံ တဳလပိုဉ် ဩဝ်ဂိုၚ်သမ္တီညိ” ရဴဝွံ သ္ဂးရ။ ယွံကောန်တၠ ပသာ်ရော? ယြဴပူဂိုလ်သအာၚ်မွဲလေဝ် ဒးအာပတ်သံဃာဒိသေသ်ဝွံရ၊ ပူဂိုလ်ဂှ်လေဝ် ဒးသ္ပရဴဝွံဟေၚ်ရဟာ ရဴဝွံသၟာန်ရ။ ယွံကောန်တၠ ဒးသ္ပရဴဝွံဟေၚ်ရ ရဴဝွံသ္ဂးရ၊ ယွံကောန်တၠ တဳလပိုဉ်ဥပနန္ဒ ကောန်သၟိၚ်သာကျဝၚ်ဝွံ ဟိုတ်မဒးအာပတ်သံဃာဒိသေသ် ပွမတိတ်သုက် မၞုံကဵုစေတနာပြာကဋ်ဂှ်ရ တဳလပိုဉ်ဥပနန္ဒဂှ် “လ္ပဟီုလဴ ကုခမဳမမိက်ကဵုမွဲမွဲညိ” ရဴဝွံ ဟီုသ္ဂးကဵုကုအဲဍိက်ရဂှ် သ္ဂးရ။ ယွံကောန်တၠ ပသာ်ရော? တၠအဲဂြောပ်ဗ္ဒန်စွံလဝ်ဟာ ရဴဝွံ သၟာန်ရ၊ ယွံကောန်တၠ ဂြောပ်ဗ္ဒန်စွံလဝ်ဂှ် ဍာံပြရ ရဴဝွံ သ္ဂးရ။ ပ္ဍဲအခိၚ်ဂှ် ခမဳဂှ် ဂရၚ်ပတီဟိုတ်ပရူပရာဝွံ ကုခမဳဂမၠိုၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂှ် သီုကဵုမတီတဴ ဂြောပ်ဗ္ဒန်အာပတ်မရုန်မဵုခမဳရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတၠအဲ သီုကဵုမတီတဴ ဂြောပ်ဗ္ဒန်အာပတ်မရုန်မဵုခမဳရ ဟီုဂှ်ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) မုဟိုတ် တၠအဲ သီုကဵုမတီတဴ ဂြောပ်ဗ္ဒန်အာပတ်မရုန်မဵုခမဳရော? ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
398) “ယြဴခမဳမွဲ သီုကဵုမတီတဴ ဂြောပ်ဗ္ဒန်အာပတ်သံဃာဒိသေသ်မရုန်မဵုခမဳမ္ဂး (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
