၅.၇.၃.၁။ ပွံက်ဥက္ကောဋနသိက္ခာပိုဒ်

394) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ တီရ မ္ဂးဂှ် အလဵုဇကုလေဝ် တီရ၊ ညးသအာၚ်ဂမၠိုၚ်လေဝ် ဟီုလဴကဵုကုခမဳဂှ်အိုတ်ရ၊ ခမဳဂှ်လေဝ် ဟီုလဴစရ။ ဗွဲမဗဗွဲဓရ် မ္ဂးဂှ် သ္ပလဝ် နသဘဴဓရ်မဍာံစၟတ် နဝိနယ် နဒၠောံဗတောန်ကျာ် (နဉတ်ကမ္မဝါစ်) ရ၊ ပွမသ္ပရဴဝွံ ဗွဲမဗဗွဲကဵုဓရ်မ္ဂးရ။ အဓိကိုရ် မ္ဂးဂှ် ‘ပွမကယျာန်ဓဝါတ်’ ဝိဝါဒါဓိကိုရ်၊ ‘ပွမစောတ်စောဲ’ အနုဝါဒါဓိကိုရ်၊ ‘အာပတ်ထပှ်ဘုံ’ အာပတ္တာဓိကိုရ်၊ ‘ပွမသ္ပကအ်’ ကိစ္စာဓိကိုရ် ရဴဝွံ အဓိကိုရ်နွံပန်ဂကူရ။ တၞဟ်နပွမကဵုသ္ပကမ်မွဲဝါပၠန် ခ္ဍဟ်ကတဵုမ္ဂး မ္ဂးဂှ် “ဟဂွံသ္ပ ကမ်ဏီရ၊ ကမ် မဂပ်ဝ်သ္ပလဝ် ဗွဲဟွံဒးရးရ၊ ထေက်ကဵုကလေၚ်သ္ပကမ်မွဲဝါပၠန်ရ၊ ဟဂွံကဵုလလမ်ဏီရ၊ ကမ် မဂပ်ဝ်လလမ်လဝ် ဗွဲဟွံဒးရးရ၊ ထေက်ကဵုကလေၚ်လလမ်မွဲဝါပၠန်ရ” ရဴဝွံ ခ္ဍဟ်ကတဵုမ္ဂး ဒးအာပတ်ပါဲစိုတ်ရ။

395) ပ္ဍဲဓမ္မကမ် မၞုံကဵုစၟတ်သမ္တီ ဓမ္မကအ်ဒှ်တုဲ ခ္ဍဟ်ကတဵုမ္ဂး၊ ဒးအာပတ်ပါဲစိုတ်ရ။ ပ္ဍဲဓမ္မကမ် မၞုံကဵုသၠေဟ်ပၟာဒှ်တုဲ ခ္ဍဟ်ကတဵုမ္ဂး ဒးအာပတ်ပါဲစိုတ်ရ။ ပ္ဍဲဓမ္မကမ် မၞုံကဵုစၟတ်သမ္တီအဓမ္မကမ်ဒှ်တုဲ ခ္ဍဟ်ကတဵုမ္ဂး ဒးအာပတ်ပါဲစိုတ်ရ။ ပ္ဍဲအဓမ္မကမ် မၞုံကဵုစၟတ်သမ္တီဓမ္မကမ်မ္ဂး ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုသၠေဟ်ပၟာမ္ဂး ဒးအာပတ်ဒုက္ကဋ်ရ။ ပ္ဍဲအဓမ္မကမ် မၞုံကဵုစၟတ်သမ္တီအဓမ္မကမ်မ္ဂး ဒးအာပတ်ဒုက္ကဋ်ရ။

396) “နသဘဴမဟွံဍာံစၟတ်ကီု နမဒှ်ဝဂ် ‘ပ္ဍဲမွဲသီဓဝ် တန်ဒၟံၚ်တၞဟ်တၞဟ်’ ကီု သ္ပကမ်ကုခမဳဟွံထေက်ကဵုကမ်ရကီု” ရဴဝွံတီတုဲ ခ္ဍဟ်ကတဵုမ္ဂး ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဥက္ကောဋနသိက္ခာပိုဒ် တတိယတုဲရ။