၅.၇.၁၀။ ကဏ္ဋကသိက္ခာပိုဒ်
428) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန်မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ကုသာမဏဳမၞုံယၟုကဏ္ဋကဂှ် “ဓရ်ဂမၠိုၚ်တဳလမၞုံပိုဉ်ကျာ်တြဲ မတွံလဝ်ရဴဝွံမ္ဂး လေပ်သ္ပကဵုအန္တရာယ် (ၛာန်မဂ်ဖိုလ်) အိုတ်ဂှ် အတိုၚ်တွံလဝ်ဂှ် အဲတီကေတ်ရ၊ ဓရ်ဂမၠိုၚ်ဂှ် ဟွံသၟဟ်အစောံ တၞဟ်နသ္ပကဵုအန္တရာယ် (ၛာန်မဂ်ဖိုလ်) ကုညးသိပ်ဂၠိပ်ရ” ရဴဝွံ ကွေတ်မိစ္ဆာမယုတ်သဝ် ကတဵုဒှ်ကၠုၚ်ရ။ ခမဳဂမၠိုၚ်မဂၠိုၚ်ဂၠၚ်ဂှ် “ကုသာမဏဳမၞုံယၟုကဏ္ဋကဂှ် ဓရ်ဂမၠိုၚ် တဳလမၞုံပိုဉ်ကျာ်တြဲမတွံလဝ်ရဴဝွံမ္ဂး လေပ်သ္ပကဵုအန္တရာယ် (ၛာန်မဂ်ဖိုလ်) အိုတ်ဂှ် အတိုၚ်တွံလဝ်ဂှ် အဲတီကေတ်ရ။ ဓရ်ဂမၠိုၚ်ဂှ် ဟွံသၟဟ်အစောံ တၞဟ်နသ္ပကဵုအန္တရာယ် (ၛာန်မဂ်ဖိုလ်) ကုညးသိပ်ဂၠိပ်ရ ရဴဝွံ ကွေတ်မိစ္ဆာမယုတ်သဝ် ကတဵုဒှ်ကၠုၚ်ရ” ဂှ် သ္ဂောံမိၚ်ကေတ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ပြာပ်အာဇရေၚ်သာမဏဳမၞုံယၟုကဏ္ဋကတုဲမ္ဂး “ယွံကောန်တၠကဏ္ဋက ကွေတ်မိစ္ဆာ မယုတ်သဝ် ကတဵုဒှ်ကၠုၚ် ကုတၠအဲ ရဴဝွံမ္ဂး ‘ဓရ်ဂမၠိုၚ် တဳလမၞုံပိုဉ်ကျာ်တြဲ မတွံလဝ်ရဴဝွံမ္ဂး လေပ်သ္ပကဵုအန္တရာယ် (ၛာန်မဂ်ဖိုလ်) အိုတ်ဂှ် အတိုၚ်တွံလဝ်ဂှ် အဲတီကေတ်ရ၊ ဓရ်ဂမၠိုၚ်ဂှ် ဟွံသၟဟ်အစောံ တၞဟ်နသ္ပကဵုအန္တရာယ် (ၛာန်မဂ်ဖိုလ်) ကုညးသိပ်ဂၠိပ်ရ’ ဂှ် ဍာံပြဒၟံၚ်ဟာ” ရဴဝွံ သၟာန်တဴ သာမဏဳမၞုံယၟုကဏ္ဋကအိုတ်ရ။ ယွံတဳလပိုဉ်တအ် အတိုၚ်မိၚ်လဝ်ဂှ် ဍာံပြရ၊ ဓရ်ဂမၠိုၚ် တဳလမၞုံပိုဉ်ကျာ်တြဲ မတွံလဝ်ရဴဝွံမ္ဂး လေပ်သ္ပကဵုအန္တရာယ် (ၛာန်မဂ်ဖိုလ်) အိုတ်ဂှ် အတိုၚ်တွံလဝ်ဂှ် အဲဍိက်တီကေတ်ရ၊ ဓရ်ဂမၠိုၚ်ဂှ် တၞဟ်နသ္ပကဵုအန္တရာယ် (ၛာန်မဂ်ဖိုလ်) ကုညးသိပ်ဂၠိပ်ဂှ် ဟွံသၟဟ်အစောံရ” ရဴဝွံ (ဟီုသ္ဂးရ)။ ယွံကောန်တၠကဏ္ဋက လ္ပဟီုရဴဝွံညိ၊ လ္ပစောတ်စောဲ တဳလမၞုံပိုဉ်ကျာ်တြဲညိ၊ ပွမစောတ်စောဲ တဳလမၞုံပိုဉ်ကျာ်တြဲဂှ် ဟွံဆာဲသန်ရ၊ တဳလမၞုံပိုဉ်ကျာ်တြဲ ဟွံတွံရဴဝွံရ၊ ယွံကောန်တၠကဏ္ဋက နကဵုဟိုတ်မဂၠိုၚ်ဂၠၚ် တဳလမၞုံပိုဉ်ကျာ်တြဲဂှ် ဓရ်မလေပ်သ္ပကဵုအန္တရာယ် (ၛာန်မဂ်ဖိုလ်) ဂမၠိုၚ်ဂှ် လေပ်သ္ပကဵုအန္တရာယ် (ၛာန်မဂ်ဖိုလ်) အိုတ်ရ ရဴဝွံ တွံလဝ်ရ။ ဓရ်ဂမၠိုၚ်ဂှ် သၟဟ်အစောံ တၞဟ်နသ္ပကဵုအန္တရာယ် (ၛာန်မဂ်ဖိုလ်) အိုတ်ရ ရဴဝွံ တွံလဝ်ရ။ ဓရ်ဂမၠိုၚ်ဂှ် သၟဟ်အစောံတၞဟ်နသ္ပကဵုအန္တရာယ် (ၛာန်မဂ်ဖိုလ်) ကုညးသိပ်ဂၠိပ်ဟေၚ်ရ။ ကာမဂုဏ်ဂမၠိုၚ် အရာသာယျေန်အောန်အိုတ်ရ၊ ဒဒိုခ်ဂၠိုၚ်အိုတ်ရ၊ ပွမဂွိၚ်စံၚ်တူဂၠိုၚ်အိုတ်ရ။ ပ္ဍဲကာမဂုဏ်ဂမၠိုၚ်ဝွံ ဒုဟ်ဂၠိုၚ်ဂၠၚ်ရ ရဴဝွံ တဳလမၞုံပိုဉ်ကျာ်တြဲ တွံလဝ်ရ ။ ပ ။ သာမဏဳကဏ္ဋကဂှ် ၜိုန်ခမဳဂမၠိုၚ်ဂှ် ဟီုသ္ဂးရဴဝွံလေဝ် “ယွံတဳလပိုဉ်တအ် အတိုၚ်မိၚ်လဝ်ဂှ် ဍာံပြရ၊ ဓရ်ဂမၠိုၚ် တဳလမၞုံပိုဉ်ကျာ်တြဲ မတွံလဝ်ရဴဝွံမ္ဂး လေပ်သ္ပကဵုအန္တရာယ် (ၛာန်မဂ်ဖိုလ်) အိုတ်ဂှ် အတိုၚ်ဝွံလဝ်ဂှ် အဲဍိက်တီကေတ်ရ၊ ဓရ်ဂမၠိုၚ်ဂှ် တၞဟ်နသ္ပကဵုအန္တရာယ် (ၛာန်မဂ်ဖိုလ်) ကုညးသိပ်ဂၠိပ်ဂှ် ဟွံသၟဟ်စောံရ” ရဴဝွံ တုပ်သၟဟ်ကိုပ်ကၠာတေံဟေၚ် ၜိုတ်အစောံနွံ ဇွိတ်သပေါတ်ကွေတ်မိစ္ဆာမယုတ်သဝ် ဗွဲမမှာရာတုဲ ဟီုသ္ဂးဗိုန်ဗိုန်ဗတ်ဗတ်ရ။ ခမဳဂမၠိုၚ်ဂှ်လေဝ် ပ္ဍဲအခိၚ်မတွံသၟဟ်အစောံ တၞဟ်နကဵုသာမဏဳကဏ္ဋက ဗၠးတိတ်နူကွေတ်မိစ္ဆာမယုတ်သဝ်ဂှ် ပြာပ်အာဇရေၚ်တဳလမၞုံပိုဉ်ကျာ်တြဲတုဲ ဂရၚ်ပတီတိုန် ဟိုတ်ပရူပရာဝွံအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုဂကောံခမဳ ကောံဓရီုတုဲ- “ယွံကဏ္ဋက ဓရ်ဂမၠိုၚ် တဳလမၞုံပိုဉ်ကျာ်တြဲ မတွံလဝ်ရဴဝွံမ္ဂး လေပ်သ္ပကဵုအန္တရာယ် (ၛာန်မဂ်ဖိုလ်) အိုတ်ဂှ် အတိုၚ်တွံလဝ်ဂှ် အဲဍိက်တီကေတ်ရ။ ဓရ်ဂမၠိုၚ်ဂှ် ဟွံသၟဟ်အစောံ တၞဟ်နသ္ပကဵုအန္တရာယ် (ၛာန်မဂ်ဖိုလ်) ကုညးသိပ်ဂၠိပ်ရ” ရဴဝွံ ကွေတ်မိစ္ဆာမယုတ်သဝ် ကတဵုဒှ်ကၠုၚ်ကုတၠအဲရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက် သာမဏဳကဏ္ဋကရ။ ယွံကျာ်မၞုံပိုဉ်အတိုၚ်မိၚ်လဝ်ဂှ် ဍာံပြရ။ ဓရ်ဂမၠိုၚ် တဳလမၞုံပိုဉ်ကျာ်တြဲ မတွံလဝ်ရဴဝွံမ္ဂး လေပ်သ္ပကဵုအန္တရာယ် (ၛာန်မဂ်ဖိုလ်) အိုတ်ဂှ် အတိုၚ်တွံလဝ်ဂှ် အဲဍိက်ဂွံတီကေတ်ရ၊ ဓရ်ဂမၠိုၚ်ဂှ် တၞဟ်နသ္ပကဵုအန္တရာယ် (ၛာန်မဂ်ဖိုလ်) ကုညးသိပ်ဂၠိပ်ဂှ် ဟွံသၟဟ်အစောံရ” ရဴဝွံ (ဂရၚ်ပတီရ)။ ယွံတြုံမဒှ်လ္ၚုသၟး (နူမဂ်ဖိုလ်) အဲကျာ် ကေၚ်တွံလဝ်ဓရ်ရဴဝွံ ကုညးလဵုဂှ် တၠအဲတီရော? ယွံတြုံမဒှ်လ္ၚုသၟး (နူမဂ်ဖိုလ်) နကဵုဟိုတ်မဂၠိုၚ်ဂၠၚ် ဓရ်မလေပ်သ္ပကဵုအန္တရာယ်ဂမၠိုၚ်ဂှ် လေပ်သ္ပကဵုအန္တရာယ် (ၛာန်မဂ်ဖိုလ်) အိုတ်ရ ရဴဝွံ အဲတွံလဝ်ရ ဟွံသေၚ်ဟာ၊ ဓရ်ဂမၠိုၚ်ဂှ် သၟဟ်အစောံတၞဟ်နသ္ပကဵုအန္တရာယ် ကုညးမသိပ်ဂၠိပ်ဟေၚ်ရ ရဴဝွံ တွံလဝ်ရ ဟွံသေၚ်ဟာ။ ကာမဂုဏ်ဂမၠိုၚ်ဂှ် အရာသာယျေန်အောန်အိုတ်ရ၊ ဒဒိုခ်ဂၠိုၚ်အိုတ်ရ၊ ပွမဂွိၚ်စံၚ်တူ ဂၠိုၚ်အိုတ်ရ၊ ပ္ဍဲကာမဂုဏ်ဂမၠိုၚ်ဝွံ ဒုဟ်ဂၠိုၚ်ဂၠၚ်ရ ရဴဝွံ အဲကျာ်တွံလဝ်ရ ဟွံသေၚ်ရ။ ကာမဂုဏ်ဂမၠိုၚ် တုပ်သၟဟ်ကဵုဇုတ်ဟၟဲကဵုဖျုန်အိုတ်ရ ရဴဝွံ အဲကျာ်တွံလဝ်ရ ဟွံသေၚ်ဟာ ။ ပ ။ ကာမဂုဏ်ဂမၠိုၚ်ဂှ် တုပ်သၟဟ်ကဵုက္ဍိုပ်ဇြုံအိုတ်ရ ရဴဝွံ တွံလဝ်ရ ဟွံသေၚ်ဟာ။ ကာမဂုဏ်ဂမၠိုၚ်ဂှ် အရာသာယျေန်အောန်အိုတ်ရ၊ ဒဒိုခ်ဂၠိုၚ်အိုတ်ရ၊ ပွမဂွိၚ်စံၚ်တူဂၠိုၚ်အိုတ်ရ၊ ပ္ဍဲကာမဂုဏ်ဂမၠိုၚ်ဝွံ ဒုဟ်ဂၠိုၚ်ဂၠၚ်ရ ရဴဝွံ အဲကျာ်တွံလဝ်ရ ဟွံသေၚ်ဟာ။ ယွံတြုံမဒှ်လ္ၚုသၟး (နူမဂ်ဖိုလ်) သီုကဵုအဲတွံလဝ်သာ်ဂှ် နမဇကုစောဲလာံဂိုၚ်ကေတ်ဟွံဒးရးဂှ် ပိုဲညးဂမၠိုၚ်ဂှ်လေဝ် တၠအဲ စောတ်စောဲရသွံ၊ အလဵုဇကုဇကုလေဝ် ခါဲပၠာ်ပလီုပလာ်ရသွံ၊ ဓရ်အကုသိုလ်လေဝ် ကဵုဇၞော်မောဝ်ဗွဲမဂၠိုၚ်ရသွံ။ ယွံတြုံမဒှ်လ္ၚုသၟး (နူမဂ်ဖိုလ်) ကွေတ်မိစ္ဆာမယုတ်သဝ်ဂှ် ကြက်ဒှ်တဴ တၞဟ်နမသက္ကုဒတုဲမြမောဝ် တၞဟ်နဒှ်ဒဒိုခ် ကုတၠအဲ ဗွဲမလအ်လကာဖာရ။ ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွကဵုလျုၚ်ဇြုၚ်သ္ဍိုက်ကီု ။ ပ ။ ကုညးလျုၚ်ဇြုၚ်သ္ဍိုက်တုဲဂမၠိုၚ်လ္ၚဵုလေဝ် တၞဟ်နကဵုလျုၚ်ဇြုၚ်သ္ဍိုက်လီုကီု ဒှ်ရ ရဴဝွံ ဟီုဂရိုဟ်တုဲ ။ ပ ။ ဟီုတွံကဵုဂလာန်ဓရ်တုဲမ္ဂး— “ယွံခမဳတအ် ဒှ်သာ်ဂှ်မ္ဂး သၚ် ဩဝ်ပလီုပလာ် (ပြာမ်ထောံ) သာမဏဳမၞုံယၟုကဏ္ဋကညိ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံ သ္ဒးပလီုပလာ်ပြာမ်ထောံရ။ “ယွံကောန်တၠကဏ္ဋက သ္ပတမ်နူတ္ၚဲဝွံတုဲ တဳလမၞုံပိုဉ်ကျာ်တြဲဂှ် အ္စာရ ရဴဝွံလေဝ် တၠအဲ လ္ပစၞောန်ထ္ၜးရ၊ သာမဏဳဂမၠိုၚ် မသအာၚ်နူတၠအဲဂှ် လုကဴၜါဗ္တံပိဗ္တံ ပွမတိတ်မွဲစွံ ကေုာံခမဳဂမၠိုၚ်လေဝ် ကလိဂွံအိုတ်ရ၊ တုပ်သၟဟ်သာ်ဂှ် ပွမတိက်မွဲစွံလေဝ် ဟွံမွဲကုတၠအဲရ၊ ဟာဲသာမဏဳ မဟဂပ်ဝ်သ္ဍိက်မၠိုက် ဩဝ်ဗှေ်စ္ဍးအာထောံညိ၊ ဩဝ်ဗှေ်အာလေၚ်ထောံညိ” ရဴဝွံ (သ္ဂးတုဲ သ္ဒးပြာမ်ထောံရ)။ ပ္ဍဲအခိၚ်ဂှ် သၚ် ပလီုပလာ်ပြာမ်ထောံ သာမဏဳကဏ္ဋကရ။ ပ္ဍဲအခိၚ်ဂှ် ခမဳဆဗ္ဗဂ္ဂဳဂမၠိုၚ် သီုကဵုမတီတဴ သာမဏဳကဏ္ဋက မပလီုပလာ်ပြာမ်ထောံသာ်ဂှ် လှေံလှန်လေဝ်လှေံလှန်အိုတ်ရ၊ ကၠောန်ၜိုတ်လေဝ် ကဵုကၠောန်ၜိုတ်အိုတ်ရ၊ မွဲစွံလေဝ် ပြဘိုဂ်အိုတ်ရ၊ မွဲစွံလေဝ်တိက်အိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဆဗ္ဗဂ္ဂဳဂမၠိုၚ် သီုကဵုမတီတဴ သာမဏဳကဏ္ဋက မပလီုပလာ်ပြာမ်ထောံတုဲသာ်ဂှ် လှေံလှန်လေဝ် လှေံလှန်အိုတ်ရော? ကၠောန်ၜိုတ်လေဝ်ကဵုကၠောန်ၜိုတ်အိုတ်ရော? မွဲစွံလေဝ်ပြဘိုဂ်အိုတ်ရော? မွဲစွံလေဝ်တိက်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ်သီုကဵုမတီတဴ သာမဏဳကဏ္ဋက မပလီုပလာ်ပြာမ်ထောံတုဲသာ်ဂှ် လှေံလှန်လေဝ် လှေံလှန်အိုတ်ရ၊ ကၠောန်ၜိုတ်လေဝ် ကဵုကၠောန်ၜိုတ်အိုတ်ရ၊ မွဲစွံလေဝ် ပြဘိုဂ်အိုတ်ရ၊ မွဲစွံလေဝ်တိက်အိုတ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ်သီုကဵုမတီတဴ သာမဏဳကဏ္ဋက မပလီုပလာ်ပြာမ်ထောံတုဲသာ်ဂှ် လှေံလှန်လေဝ်လှေံလှန်အိုတ်ရော? ကၠောန်ၜိုတ်ၜိုတ်လေဝ် ကဵုကၠောန်ၜိုတ်အိုတ်ရော? မွဲစွံလေဝ် ပြဘိုဂ်အိုတ်ရော? မွဲစွံလေဝ်တိက်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။
429) “သာမဏဳလေဝ် ‘ဓရ်ဂမၠိုၚ် တဳလမၞုံပိုဉ်ကျာ်တြဲ မတွံလဝ်ရဴဝွံမ္ဂး လေပ်သ္ပကဵုအန္တရာယ် (ၛာန်မဂ်ဖိုလ်) အိုတ်ဂှ် အတိုၚ်တွံလဝ်ဂှ် အဲဍိက်တီကေတ်ရ၊ ဓရ်ဂမၠိုၚ်ဂှ်တၞဟ်န သ္ပကဵုအန္တရာယ် (ၛာန်မဂ်ဖိုလ်) ကုညးသိပ်ဂၠိပ်ဂှ် ဟွံသၟဟ်အစောံရ’ ရဴဝွံ ယဝ်ဟီုသ္ဂးမ္ဂး။ ခမဳ ဂမၠိုၚ် ‘ယွံကောန်တၠသာမဏဳ လ္ပဟီုရဴဝွံညိ၊ လ္ပစောတ်စောဲ တဳလမၞုံပိုဉ်ကျာ်တြဲညိ၊ ပွမစောတ်စောဲ တဳလမၞုံပိုဉ်ကျာ်တြဲဂှ် ဟွံဆာဲသန်ရ၊ တဳလမၞုံပိုဉ်ကျာ်တြဲဟွံတွံရဴဝွံရ၊ ယွံကောန်တၠသာမဏဳ နကဵုဟိုတ်မဂၠိုၚ်ဂၠၚ် ဓရ်မလေပ်သ္ပကဵုအန္တရာယ် (ၛာန်မဂ်ဖိုလ်) ဂမၠိုၚ်ဂှ် လေပ်သ္ပကဵုအန္တရာယ် (ၛာန်မဂ်ဖိုလ်) အိုတ်ရ ရဴဝွံ တဳလမၞုံပိုဉ်ကျာ်တြဲတွံလဝ်ရ၊ ဓရ်ဂမၠိုၚ်ဂှ် သၟဟ်အစောံတၞဟ်နသ္ပကဵုအန္တရာယ် (ၛာန်မဂ်ဖိုလ်) ကုညးသိပ်ဂၠိပ်ဟေၚ်ရ’ ရဴဝွံ သ္ဒးဟီုဒၠောံဗတောန်သာမဏဳဂှ်ရ၊ ရဴဝွံဟေၚ် ခမဳဂမၠိုၚ် သီုဂပ်ဝ် ဟီုသ္ဂးဒၠောံဗတောန်တဴသာမဏဳဂှ် တုပ်နဲကိုပ်ကၠာဟေၚ် ယိုက်ဒိုက်ဂိုၚ်ကေတ်မ္ဂး၊ ခမဳဂမၠိုၚ် ‘ယွံကောန်တၠသာမဏဳ သ္ပတမ်နူတ္ၚဲဝွံတုဲ တဳလမၞုံပိုဉ်ကျာ်တြဲဂှ် အ္စာရ ရဴဝွံလေဝ် တၠအဲလ္ပစၞောန်ထ္ၜးရ။ သာမဏဳဂမၠိုၚ် မသအာၚ်နူတၠအဲဂှ် လုကဴၜါဗ္တံပိဗ္တံ ပွမတိတ်မွဲစွံ ကေုာံခမဳဂမၠိုၚ်လေဝ် ကလိဂွံအိုတ်ရ၊ တုပ်သၟဟ်သာ်ဂှ် ပွမတိက်မွဲစွံလေဝ် ဟွံမွဲကုတၠအဲရ၊ ဟာဲသာမဏဳ မဟဂပ်ဝ်သ္ဍိုက်မၠိုက် ဩဝ်ဗှေ်စ္ဍးအာထောံညိ၊ ဩဝ်ဗှေ်အာလေၚ်ထောံညိ’ ရဴဝွံ သ္ဒးဟီုဒၠောံဗတောန်သာမဏဳဂှ်ရ။ ယြဴခမဳ သီုကဵုမတီတဴ သာမဏဳ မပလီုပလာ်ပြာမ်ထောံတုဲသာ်ဂှ် လှေံလှန်လေဝ်လှေံလှန်မ္ဂး၊ ကၠောန်ၜိုတ်လေဝ် ကဵုကၠောန်ၜိုတ်မ္ဂး၊ မွဲစွံလေဝ် ပြဘိုဂ်မ္ဂး၊ မွဲစွံလေဝ်တိက်မ္ဂး (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
