၅.၇.၁.၁။ ပွံက်သဥ္စိစ္စသိက္ခာပိုဒ်

384) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ မၞုံကဵုစေတနာမမိက်ကဵုချိုတ်ဒှ်တုဲ မ္ဂးဂှ် သီုကဵုမတီတဴ သီုကဵုမတီတဴဗွဲမဒးရး သ္ပလွဳတုဲ ဓလီုဍိုက်တုဲ ပွမကလိလောန်ရောၚ်။ သတ် မ္ဂးဂှ် သ္ဂးတဴသတ်မဒှ်တိရစ္ဆာန်ရောၚ်။ ပြိုက်ဂစိုတ်မ္ဂး မ္ဂးဂှ် ကကုတ်ကၠေံ ‘ဇဳဝိတိန္ဒြဳ’ လမျီုမ္ဂး၊ ကဵုစာ်စ္ဍးအာမ္ဂး၊ ကဵုတၞောဝ်လီုလာ်မ္ဂး၊ ဒးအာပတ်ပါဲစိုတ်ရ။

385) ပ္ဍဲသတ်မၞုံကဵုစၟတ်သမ္တီသတ်ဒှ်တုဲ ပြိုက်ဂစိုတ်မ္ဂး၊ ဒးအာပတ်ပါဲစိုတ်ရ။ ပ္ဍဲသတ်မၞုံကဵုသၠေဟ်ပၟာဒှ်တုဲ ပြိုက်ဂစိုတ်မ္ဂး ဒးအာပတ်ပါဲစိုတ်ရ။ ပ္ဍဲသတ် မၞုံကဵုစၟတ်သမ္တီသတ်ဟွံသေၚ်ဒှ်တုဲ ပြိုက်ဂစိုတ်မ္ဂး ဒးအာပတ်ပါဲစိုတ်ရ။ ပ္ဍဲညးဟွံသေၚ်ကဵုသတ် မၞုံကဵုစၟတ်သမ္တီသတ်မ္ဂး ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵု သတ်မၞုံကဵုသၠေဟ်ပၟာမ္ဂး ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုသတ် မၞုံကဵုစၟတ်သမ္တီ ညးဟွံသေၚ်ကဵုသတ်မ္ဂး ဒးအာပတ်ဒုက္ကဋ်ရ။

386) ကုခမဳဟွံမွဲကဵုစေတနာ မမိက်ကဵုချိုတ် ခမဳဟွံစွံဒးသတိ ခမဳဟွံတီ ခမဳဟွံမွဲကဵုသဘဴမမိက်ကဵုချိုတ် ခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ သဉ္စိစ္စသိက္ခာပိုဒ် ပဌမတုဲရ။