၅.၇.၁။ သဥ္စိစ္စသိက္ခာပိုဒ်

382) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန်မဒှ်အရှာမ် အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ဥဒါယဳ မကေၚ်ဒှ်ကၠုၚ်သၟာတ္ၚဂှ် ဟိုတ်မဟွံသ္ဍိုက်မၠိုက်ခ္ဍာ်ဂမၠိုၚ်ဂှ်ရ ပန်ပေါဟ်တုဲ ကုတ်ကၠေံက္ဍိုပ်တုဲမ္ဂး၊ ကၞောတ်ဇန်လဝ် ပ္ဍဲကၞောတ် အတိုၚ်လၟေၚ်လၟေၚ်တုဲ စွံပတန်လဝ်ရ။ ခမဳဂမၠိုၚ် “ယွံကောန်တၠတအ် မုရဴညးမွဲ ပြိုက်ဂစိုတ်ခ္ဍာ်ဂမၠိုၚ်ဝွံရော? ရဴဝွံ သၟာန်အိုတ်ရ။ ယွံကောန်တၠတအ် အဲဍိက် ပြိုက်ဂစိုတ်လဝ်ရ၊ အဲဍိက် ဟွံသ္ဍိုက်မၠိုက်ခ္ဍာ်ဂမၠိုၚ်ရ ရဴဝွံ သ္ဂးရ။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်ဥဒါယဳ မၞုံကဵုစေတနာမမိက်ကဵုချိုတ်ဒှ်တုဲ ပြိုက်ဂစိုတ်သတ်ရော? ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံဥဒါယဳ တၠအဲ မၞုံကဵုစိုတ်စေတနာမမိက်ကဵုချိုတ်ဒှ်တုဲ ပြိုက်ဂစိုတ်သတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။

383) “ယြဴခမဳမွဲ မၞုံကဵုစေတနာမမိက်ကဵုချိုတ်ဒှ်တုဲ ပြိုက်ဂစိုတ်သတ်မ္ဂး (ကုခမဳဂှ်) ဒးအာပတ်ပါဲစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။