၅.၆.၉။ ဝိကပ္ပနသိက္ခာပိုဒ်

372) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် တဳလပိုဉ်ဥပနန္ဒ ကောန်သၟိၚ်သာကျဝၚ် အလဵုဇကု သ္ပဝိကပ္ပန ‘သ္ပညံၚ်ဂွံစာ်စ္ဍးအာနူဒဒှ်ဂြပ်ဇကု’ သ္ၚာ ကုခမဳမဒှ်ကွးပဒတဴမွဲစွံ ကောဇကုတုဲ သီုဟွံသ္ပပစ္စုဒ္ဓိုရ် ‘ပွမအပ်ပြာပ်မွဲလှေ်ပၠန်’ သ္ပပြဘိုဂ်ရ။ ပ္ဍဲအခိၚ်ဂှ် ခမဳဂှ် “ယွံကောန်တၠတအ် တဳလပိုဉ်ဥပနန္ဒ ကောန်သၟိၚ်သာ်ကျဝၚ်ဝွံ အလဵုဇကု သ္ပဝိကပ္ပနသ္ၚာ ကုအဲတုဲ သီုဟွံသ္ပပစ္စုဒ္ဓိုရ် သ္ပပြဘိုဂ်ရ” ရဴဝွံ ဟီုလဴဗ္စ ကုခမဳဂမၠိုၚ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် တဳလပိုဉ်ဥပနန္ဒ ကောန်သၟိၚ်သာကျဝၚ် အလဵုဇကု သ္ပဝိကပ္ပနသ္ၚာ ကုခမဳတုဲ သီုဟွံသ္ပပစ္စုဒ္ဓိုရ်ဂှ် သ္ပပြဘိုဂ်ရော?” ရဴဝွံ ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံဥပနန္ဒ တၠအဲ အလဵုဇကု သ္ပဝိကပ္ပနသ္ၚာကုခမဳတုဲ သီုဟွံသ္ပပစ္စုဒ္ဓိုရ်ဂှ် သ္ပပြဘိုဂ်ရ ဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) (ပွတၠအဲသ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။

373) “ယြဴခမဳမွဲ ကုခမဳတြုံကီု ကုခမဳဗြဴကီု ကုသိက္ခမာန်ကီု ကုသာမဏီတြုံကီု ကုသာမဏီဗြဴကီု အလဵုဇကု သ္ပဝိကပ္ပနသ္ၚာတုဲ သီုဟွံသ္ပပစ္စုဒ္ဓိုရ်ဂှ် သ္ပပြဘိုဂ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။