၅.၆.၈။ ဒုဗ္ဗဏ္ဏကရဏသိက္ခာပိုဒ်
367) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳဂမၠိုၚ်မဂၠိုၚ်ဂၠၚ်ကီု ပြဘာဇ်ဂမၠိုၚ်ကီု နူဍုၚ်သာကေတ သွိုန်ဗပိုန်တရဴအဓာန်မဂၠိၚ်သ္ၚောဲ ဍုၚ်သာရဝှ်အိုတ်ရ။ ပ္ဍဲအကြာဂၠံၚ်တရဴ ဒမၠမတာဂမၠိုၚ် တိတ်ကၠုၚ်တုဲ ပၠံက်ဗတိုက် ခမဳကေုာံပြဘာဇ်ဂမၠိုၚ်ဂှ်အိုတ်ရ။ တြုံသကအ်သၟိၚ်ဂမၠိုၚ် တိတ်ကၠုၚ်နူဍုၚ်သာရဝှ်ဂှ်တုဲ ရပ်ဂွံဒမၠမတာဂမၠိုၚ်ဂှ် မွဲဟာန်ကေုာံဂြပ်တုဲမ္ဂး၊ “တဳလပိုဉ်ဂမၠိုၚ် ဩဝ်က္ညကၠုၚ်အိုတ်ညိ၊ သမ္တီကေတ် သ္ၚာဇကုဇကုဂမၠိုၚ်တုဲ (ရုဲကေတ်ညံၚ်ဟွံဗၠေတ်တုဲ) ဩဝ်ဂိုၚ်ကေတ်အိုတ်ညိ” ရဴဝွံ ဖအောဝ်ဗလးဏာကလုတ် ဇရေၚ်ခမဳဂမၠိုၚ်အိုတ်ရ။ ခမဳဂမၠိုၚ်တုန် (သွက်ဂွံရုဲစှ်) သမ္တီဟွံဒး ဗွဲမဒးရးအိုတ်ရ။ ညးဂမၠိုၚ် “မုဟိုတ် တဳလပိုဉ်ဂမၠိုၚ် ဟွံတီတဴ သ္ၚာဇကုဇကုတအ်ဂမၠိုၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ။ ခမဳဂမၠိုၚ် သ္ဂောံမိၚ်ကေတ်ဂလာန်မၞိဟ်ဂမၠိုၚ်ဂှ် မဟီုဂရိုဟ်ပျုတ်ဗ္ဒေက် ဟီုထ္ၜးဒုဟ်အိုတ်ဟေၚ်ရ။ ပ္ဍဲအခိၚ်ဂှ် ခမဳဂမၠိုၚ်ဂှ် ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ်ကောံဓရီုတုဲ ဟီုတွံတဴဂလာန်ဓရ် မဗဗွဲကဵုပွဂှ် မညဳသၟဟ်ကဵုပွဂှ် ကုခမဳဂမၠိုၚ်ဂှ်တုဲ— “ယွံခမဳတအ် ဒှ်သာ်ဂှ်မ္ဂး သ္ပဟိုတ်ကဵု ဖဵုတၟေၚ်ဂမၠိုၚ်စှ်ပြကာမတွံဂး (၁) သွက်သ္ဂောံ ဒ္ဂေတ်လ္ၚတ်ဒုၚ်ဝန်မ္ဂး ဒးရးသန်ရ ဒဒက်တဴကဵုသၚ် (၂) သွက်ဂွံကဵုဒှ်သၚ်ဂမၠိုၚ်ဒှ်တသိုခ် ။ ပ ။ (၉) သွက်ဓရ်ညးသပ္ပုရိုဟ် ‘သာသနာပိပြကာ’ ဂွံတန်တဴအာ (၁၀) သွက်ဂွံယိုက်ဒိုက် ‘ဝိနယ်’ စေဝ်ပၞောန်တုဲ ပညပ်တဴသိက္ခာပိုဒ် ကုခမဳဂမၠိုၚ်ရ” ရဴဝွံ သ္ဂးကဵုခမဳဂမၠိုၚ်ရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
368) “ခမဳမကလိဂွံသ္ၚာတၟိဂှ် ပၞောဝ်ကဵုပွမသ္ပညံၚ်သာ်ဂွံလီုလာ် ပိသာ်ဂမၠိုၚ်မတွံဂး သာ်လမ္စံက်ကီု သာ်လှိုက်သရီုကီု သာ်ဒမျိုၚ်ကီုဂှ် ဂပ်ဝ်သ္ဒးဂိုၚ်ကေတ် ပွမသ္ပညံၚ်သာ်ဂွံလီုလာ် (ပလီုကၠေံသာ်) မွဲမွဲသာ်ရ၊ ခမဳဂှ် ပၞောဝ်ကဵုပွမသ္ပညံၚ်သာ်ဂွံလီုလာ်ပိသာ်ဂမၠိုၚ်ဂှ် ဟွံဂိုၚ်ကေတ် ပွမသ္ပညံၚ်သာ်ဂွံလီုလာ် (ပလီုကၠေံသာ်) မွဲမွဲသာ်တုဲ ယဝ်ရသ္ပပြဘိုဂ်ရုၚ်လတက်သ္ၚာတၟိမ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
