၅.၆.၇.၁။ ပွံက်နဟာနသိက္ခာပိုဒ်
364) ယြဴ မ္ဂးဂှ် ယြဴဍေံမၞုံသဘဴမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ပ္ဍဲအပ္ဍဲလပါ်ဂိတု မ္ဂးဂှ် ပ္ဍဲမယုတ်ဒေက်သၟဝ်လပါ်ဂိတု။ ဟုမ်ဍာ်မ္ဂး မ္ဂးဂှ် နကဵုခၞိက်ကြကောတ်ကီု နကဵုတိကမၠေတ်ကီု ဟုမ်ဍာ်မ္ဂး၊ ဇၟာပ်သ္ပလွဳပရာ ဇၟာပ်သ္ပလွဳပရာ ဒးအာပတ်ဒုက္ကဋ်ရ။ ပ္ဍဲလအိတ်မဟုမ်ဍာ်တုဲဂှ် ဒးအာပတ်ပဲါစိုတ်ရ။ ဝေၚ်ကၠေံအခိၚ်အခါတုဲ မ္ဂးဂှ် ပဲါကၠေံအခိၚ်အခါတုဲ။ အခိၚ်ဂမ္တဴ မ္ဂးဂှ် ဂိတုက္ညၚ်ဂမၠိုၚ် မသှေ်သၟေဟ်မွဲဂိတုလပါ်ရောၚ်။ အခိၚ်ဒတူတၠာဲ မ္ဂးဂှ် ဥတုဗြဲကိုပ်ကၠာမွဲဂိတုရောၚ်။ ၜါဂိတုလပါ်ဂမၠိုၚ်ဝွံ “အခိၚ်ဂမ္တဴ အခိၚ်ဒတူတၠာဲ မ္ဂးရ” ရဴဝွံ (ပၠုပ်စိုတ်တုဲ) ဂပ်ဝ်ဟုမ်ဍာ်ရ။ အခိၚ်ဂိယဲ မ္ဂးဂှ် ယြဴကုခမဳမွဲ စာ်စ္ဍးကေုာံပွမဟုမ်ဍာ်တုဲ ကြက်ဟွံဒှ်တသိုခ်ရ၊ “အခိၚ်ဂိယဲရ” ရဴဝွံ (ပၠုပ်စိုတ်တုဲ) ဂပ်ဝ်ဟုမ်ဍာ်ရ။ အခိၚ်ကၠောန်ကမၠောန်ကေၚ်ကာ မ္ဂးဂှ် ဗွဲတွဵုမယုတ် ပြဝိုဏ်လေဝ် ကွဟ်ကၟဟ်မ္ဂး၊ “အခိၚ်ကၠောန်ကမၠောန်ကေၚ်ကာရ” ရဴဝွံ (ပၠုပ်စိုတ်တုဲ) ဂပ်ဝ်ဟုမ်ဍာ်ရ။ အခိၚ်ကွာ်တရဴအဓာန်မဂၠိၚ်သ္ၚောဲ မ္ဂးဂှ် ကြက်ကွာ်တရဴ ကဝက်ယောဇနာရ ရဴဝွံ (ပၠုပ်စိုတ်တုဲ) ဂပ်ဝ်ဟုမ်ဍာ်ရ ခမဳဃောကွာ်တရဴ ခမဳကွာ်တရဴတုဲ ဂပ်ဝ်ဟုမ်ဍာ်ရ။ အခိၚ်ဗြဲဂူကျာပိုက် မွဲဟာန်ကေုာံလက်ကၠိုက် မ္ဂးဂှ် ခမဳဂမၠိုၚ် တ္ၜန်တ္ၜောဲနှဴရဴတဴနကဵုကျာမဒှ်မွဲဟာန်ကေုာံလက်ကၠိုက်အိုတ်မ္ဂး၊ ထၞဟ်ဗြဲဂမၠိုၚ်ၜါထၞဟ်ပိထၞဟ်လေဝ် ဒတုံစှေ်ပ္ဍဲဇကုအိုတ်မ္ဂး၊ “အခိၚ်ဗြဲဂူကျာပိုက် မွဲဟာန်ကေုာံလက်ကၠိုက်ရ” ရဴဝွံ (ပၠုပ်စိုတ်တုဲ) ဂပ်ဝ်ဟုမ်ဍာ်ရ။
365) ပ္ဍဲမယုတ်ဒေက်သၟဝ်လပါ်ဂိတု မၞုံကဵုစၟတ်သမ္တီယုတ်ဒေက်သၟတ်လပါ်ဂိတုဒှ်တုဲ ဝေၚ်ကၠေံအခိၚ်အခါတုဲ ဟုမ်ဍာ်မ္ဂး၊ ဒးအာပတ်ပဲါစိုတ်ရ။ ပ္ဍဲမယုတ်ဒေက်သၟဝ်လပါ်ဂိတု မၞုံကဵုသၠေဟ်ပၟာဒှ်တုဲ ဝေၚ်ကၠေံအခိၚ်အခါတုဲ ဟုမ်ဍာ်မ္ဂး၊ ဒးအာပတ်ပဲါစိုတ်ရ။ ပ္ဍဲမယုတ်ဒေက်သၟဝ်လပါ်ဂိတု မၞုံကဵုစၟတ်သမ္တီလောန်ဒှ်တုဲ ဝေၚ်ကၠေံအခိၚ်အခါတုဲ ဟုမ်ဍာ်မ္ဂး၊ ဒးအာပတ်ပဲါစိုတ်ရ။ ပ္ဍဲမလောန်လတူလပါ်ဂိတု မၞုံကဵုစၟတ်သမ္တီယုတ်ဒေက်မ္ဂး၊ ဒးအာပတ်ဒုက္ကဋ်ရ။ ပ္ဍဲမလောန်လတူလပါ်ဂိတု မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲမလောန်လတူလပါ်ဂိတု မၞုံကဵုစၟတ်သမ္တီလောန်မ္ဂး၊ ဟွံဒးအာပတ်ရ။
366) ဟုံဍာ် ပ္ဍဲအခိၚ်အခါမ္ဂး၊ ဟုမ်ဍာ်ပ္ဍဲလပါ်ဂိတုမ္ဂး၊ ဟုမ်ဍာ်လောန်နူလပါ်ဂိတုမ္ဂး၊ ဟုမ်ဍာ် ဟိုတ်မကၠောံအာသြၚ်ကြုၚ်မွဲလပါ်မ္ဂး၊ ဟုမ်ဍာ်ပ္ဍဲဇနပိုဒ်ပစ္စန္တရးဂမၠိုၚ်အိုတ်သီုမ္ဂး၊ ဟုမ်ဍာ် ဟိုတ်နူပရိုက်ဘဲမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလောန်ကၠာတဲဂှ် ဟွံဒးအာပတ်ရ။ နဟာနသိက္ခာပိုဒ် သတ္တမတုဲရ။
