၅.၆.၇။ နဟာနသိက္ခာပိုဒ်
357) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဝေဠုဝန် မဒှ်ဒၞဲါကဵုစၞ ကုယန်လမ္စံက်ဂမၠိုၚ် ဇရေၚ်ဍုၚ်ရာဇဂြိုဟ်ဂှ် ခမဳဂမၠိုၚ် ဟုမ်ဒၟံၚ်ဍာ် ပ္ဍဲကြုၚ်တပေါဒအိုတ်ရ။ ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး “ကြက်ဟုမ်မွဲဟာန်ကေုာံက္ဍိုပ်ရ “ကြက်သ္ပမ္ၚဵုကြာတ်က္ဍိုပ်ရ” ရဴဝွံ အာကြုၚ်တပေါဒတုဲ “တဳလပိုဉ်ဂမၠိုၚ် ဟုမ်ဒၟံၚ်ဍာ်ဟွံတုဲအိုတ်ဏီရ” ရဴဝွံ မၚ်မံၚ်တုဲ မဒတဴဒၟံၚ်ပ္ဍဲဒၞဲါမွဲရ။ ခမဳဂမၠိုၚ် စဵုကဵုတ္ၚဲပၠိုတ် ဟုမ်ဒၟံၚ်ဍာ်အိုတ်ရ။ ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး ပ္ဍဲဟွံသေၚ်ကဵုအခိၚ် ‘တ္ၚဲဂၠုမှ’ ဟုမ်ဍာ်မွဲဟာန်ကေုာံက္ဍိုပ် ‘သ္ပမ္ၚဵုကြာတ်က္ဍိုပ်’ တုဲမ္ဂး ဟိုတ်နူကၟာတ်ဒဝ်ထောံတြၚ်ဍုၚ်ဂှ်ရ ပဒတဴပ္ဍဲမ္ၚးဍုၚ်တုဲ သီုကြကောတ်လံက်ဗဗိုဟ် ဟွံလီုလာ်ဏီ ပ္ဍဲအခိၚ်နူဂယးပြဟ်ဟေၚ် ပြာပ်အာဇရေၚ် တဳလမၞုံပိုဉ်ကျာ်တြဲတုဲ လ္ၚောဝ်သ္ပဝတ်တုဲမ္ဂး ဃောမဂဇအ်ဒၟံၚ်ပ္ဍဲဒၞဲါမွဲဂှ်— “ယွံသၟိၚ်ဇၞော် တၠအဲ မုဟိုတ် သီုကြကောတ်လံက်ဗဗိုဟ် ဟွံလီုလာ်ဏီ ပ္ဍဲအခိၚ် နူဂယးပြဟ်ဟေၚ် ကၠုၚ်တဴရော?” ရဴဝွံ တဳလမၞုံပိုဉ်ကျာ်တြဲ သ္ဂးရ။ ပ္ဍဲအခိၚ်ဂှ် သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲရ။ ပ္ဍဲအခိၚ်ဂှ် နကဵုဂလာန်ဓရ် တဳလမၞုံပိုဉ်ကျာ်တြဲ ကဵုသၟိၚ်ဗိမ္ဗိသာရ မၞုံယၟုသေနိယ တၠညးမဂဓရး တီညာတ်ကေတ် (ဒတုဲဖဵုမြမောဝ်) ကဵုဒဂိုန်ဂိုၚ်ကေတ် (ဓရ်) (သွက်ဂွံဒ္ဂေတ်ဓရ်) ကဵုသကေက်သကာ ကဵုမြဟ်မြာတုဲမ္ဂး သၟိၚ်ဗိမ္ဗိသာရ မၞုံယၟုသေနိယ တၠညးမဂဓရး ဒၠိုက်ကတဵုနူဒၞဲါတုဲ လ္ၚောဝ်သ္ပဝတ် တဳလမၞုံပိုဉ်ကျာ်တြဲတုဲမ္ဂး သ္ပရှေ်သှေ်ရဴဂဴကၠာ ပဲါစ္ဍးအာရ။ ပ္ဍဲအခိၚ်ဂှ် ဟိုတ်နူဟိုတ်အရာဝွံ တဳလမၞုံပိုဉ်ကျာ်တြဲ ကဵုခမဳသၚ် ကောံဓရီုတုဲ— “ယွံခမဳတအ် သီုကဵုညာတ်တဴသၟိၚ်လေဝ် ဟွံတီဗၞတ်ဗ္ၜတ်တုဲ ခမဳဂမၠိုၚ် ဟုမ်ဍာ်အိုတ်ရဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ် သီုကဵုညာတ်တဴသၟိၚ်လေဝ် ဟွံတီဗၞတ်ဗ္ၜတ်တုဲ ဟုမ်ဍာ်အိုတ်ရော? ယွံခမဳတအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုၚ်ဂမၠိုၚ်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ ပ္ဍဲအပ္ဍဲလပါ်ဂိတု ‘စှ်သုန်တ္ၚဲ’ ဟုမ်ဍာ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
358) ပ္ဍဲအခိၚ်ဂှ် ခမဳဂမၠိုၚ် ပ္ဍဲအခိၚ်ဂမ္တဴ အခိၚ်ဒတူတၠာဲ (အခိၚ်ဥ) မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်ဒှ်တုဲ ဟွံဟုမ်ဍာ်အိုတ်ရ။ ဟိုတ်မတိက် နကဵုဇကုပဠက်ဇွောဝ်ဂှ်ရ သ္ၚာကေုာံသၞာသတိက်ဒၟံၚ်ဂမၠိုၚ် လီုလာ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ပ္ဍဲအခိၚ်ဂမ္တဴ အခိၚ်ဒတူတၠာဲ (အခိၚ်ဥ) တၞဟ်နဟုမ်ဍာ် ပ္ဍဲအပ္ဍဲလပါ်ဂိတု ‘စှ်သုန်တ္ၚဲ’ ဂှ် ကဵုအခေါၚ်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ ဝေၚ်ကၠေံအခိၚ်အခါတုဲ ပ္ဍဲအပ္ဍဲလပါ်ဂိတု ‘စှ်သုန်တ္ၚဲ’ ဟုမ်ဍာ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ။ ပ္ဍဲအရာဟုမ်ဍာ်ဂှ် ကြက်သ္ဂးဂတဝွံတုန် အခိၚ်အခါရောၚ်၊ ဂိတုက္ညၚ်ဂမၠိုၚ် မသှေ်သၟေဟ်မွဲဂိတုလပါ် ဥတုဗြဲမဒှ်ကိုပ်ကၠာမွဲဂိတု ၜါဂိတုလပါ်ဂမၠိုၚ်ဝွံ အခိၚ်ဂမ္တဴအခိၚ်ဒတူတၠာဲရ၊ ဣဝွံတုန် ပ္ဍဲအရာဟုမ်ဍာ်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
359) ပ္ဍဲအခိၚ်ဂှ် ခမဳဂမၠိုၚ် ဂိယဲဒၟံၚ်အိုတ်ရ၊ ခမဳမသၟာန်ယဲဂမၠိုၚ် “ယွံကောန်တၠတအ် ဒုၚ်စရၚ်ဒၟံၚ်ဟာ ယိုပ်ယာဒၟံၚ်ဟာ” ရဴဝွံ သၟာန်ခမဳဂိယဲဂမၠိုၚ်အိုတ်ရ။ ယွံကောန်တၠတအ် ပိုဲညးဂမၠိုၚ် ပ္ဍဲကိုပ်ကၠာတေံ ပ္ဍဲအပ္ဍဲလပါ်ဂိတု ဂွံဟုမ်ဍာ်အိုတ်ရ၊ ဟိုတ်ဂှ်ရ ဒှ်တသိုခ်ကုပိုဲညးဂမၠိုၚ်ရ၊ ပ္ဍဲအခိၚ်လၟုဟ်တုန် “ဟိုတ်နူတဳလမၞုံပိုဉ်ကျာ်တြဲ ပဲါကၠေံပွမဟုမ်ဍာ်ဂှ်ရ ဟွံဂပ်ဝ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဒှ်တုဲ ဟွံဟုမ်ဍာ်အိုတ်ရ၊ ဟိုတ်ဂှ်ရ ဟွံဒှ်တသိုခ်ကုပိုဲညးဂမၠိုၚ်ရ ရဴဝွံ (ဂရၚ်ပတီအိုတ်ရ)။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ကုခမဳဂိယဲ တၞဟ်နပွမဟုမ်ဍာ် ပ္ဍဲအပ္ဍဲလပါ်ဂိတု ‘စှ်သုန်တ္ၚဲ’ ဂှ် ကဵုအခေါၚ်ရ” ရဴဝွံ သ္ဂးရ။ ယွံခခမဳတအ် ရဴဝွံဟေၚ် ဩဝ်စၞောန်ထ္ၜးသိက္ခာပိုဒ်ဝွံအိုတ်ညိ။ “ယြဴခမဳမွဲ ဝေၚ်ကၠေံအခိၚ်အခါတုဲ ပ္ဍဲအပ္ဍဲလပါ်ဂိတု ‘စှ်သုန်တ္ၚဲ’ ဟုမ်ဍာ်မ္ဂး (ကုခမဳဂှ်) ဒးအာပတ်ပဲါစိုတ်ရ။ ပ္ဍဲအရာဟုမ်ဍာ်ဂှ် ကြက်သ္ဂးဂတဝွံတုန် အခိၚ်အခါရောၚ်၊ ဂိတုက္ညၚ်ဂမၠိုၚ် မသှေ်သၟေဟ်မွဲဂိတုလပါ် ဥတုဗြဲမဒှ်ကိုပ်ကၠာမွဲဂိတု ၜါဂိတုလပါ်ဂမၠိုၚ်ဝွံ အခိၚ်ဂမ္တဴအခိၚ်ဒတူတၠာဲ၊ အခိၚ်ဂိယဲရ၊ ဣဝွံတုန် ပ္ဍဲအရာဟုမ်ဍာ်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
360) ပ္ဍဲအခိၚ်ဂှ် ခမဳဂမၠိုၚ် ကၠောန်သ္ပကမၠောန်ကေၚ်ကာတၟိတုဲပ္ဍဲကြဴ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်ဒှ်တုဲ ဟွံဟုမ်ဍာ်အိုတ်ရ။ ခမဳဂမၠိုၚ်ဂှ် ဟိုတ်မတိက် နကဵုဇကုပဠက်ဇၞော်ဂှ်ရ သ္ၚာကေုာံသၞာသတိက်သၞာဒၟံၚ်ဂမၠိုၚ် လီုလာ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ပ္ဍဲအခိၚ်ကၠောန်ကမၠောန်ကေၚ်ကာ တၞဟ်နဟုမ်ဍာ် ပ္ဍဲအပ္ဍဲလပါ်ဂိတု ‘စှ်သုန်တ္ၚဲ’ ဂှ် ကဵုအခေါၚ်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ ဝေၚ်ကၠေံအခိၚ်အခါတုဲ ပ္ဍဲအပ္ဍဲလပါ်ဂိတု ‘စှ်သုန်တ္ၚဲ’ ဟုမ်ဍာ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ။ ပ္ဍဲအရာဟုမ်ဍာ်ဂှ် ကြက်သ္ဂးဂတဝွံတုန် အခိၚ်အခါရောၚ်၊ ဂိတုက္ညၚ်ဂမၠိုၚ် မသှေ်သၟေဟ်မွဲဂိတုလပါ် ဥတုဗြဲမဒှ်ကိုပ်ကၠာမွဲဂိတု ၜါဂိတုလပါ်ဂမၠိုၚ်ဝွံ အခိၚ်ဂမ္တဴအခိၚ်ဒတူကၠာဲ၊ အခိၚ်ဂိယဲ၊ အခိၚ်ကၠောန်ကမၠောန်ကေၚ်ကာရ၊ ဣဝွံတုန် ပ္ဍဲအရာဟုမ်ဍာ်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
361) ပ္ဍဲအခိၚ်ဂှ် ခမဳဂမၠိုၚ် ကွာ်တရဴအဓာန်မဂၠိၚ်သ္ၚောဲတုဲပ္ဍဲကြဴ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်ဒှ်တုဲ ဟွံဟုမ်ဍာ်အိုတ်ရ။ ခမဳဂမၠိုၚ်ဂှ် ဟိုတ်မတိက် နကဵုဇကုပဠက်ဇွောဝ်ဂှ်ရ သ္ၚာကေုာံသၞာသတိက်သၞာဒၟံၚ်ဂမၠိုၚ် လီုလာ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ပ္ဍဲအခိၚ်အာတရဴအဓာန်မဂၠိၚ်သ္ၚောဲ တၞဟ်နဟုံဍာ် ပ္ဍဲအပ္ဍဲလပါ်ဂိတု ‘စှ်သုန်တ္ၚဲ’ ဂှ် ကဵုအခေါၚ်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ ဝေၚ်ကၠေံအခိၚ်အခါတုဲ ပ္ဍဲအပ္ဍဲလပါ်ဂိတု ‘စှ်သုန်တ္ၚဲ’ ဟုမ်ဍာ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ။ ပ္ဍဲအရာဟုမ်ဍာ်ဂှ် ကြက်သ္ဂးဂတဝွံတုန် အခိၚ်အခါရောၚ်၊ ဂိတုက္ညၚ်ဂမၠိုၚ် မသှေ်သၟေဟ်မွဲဂိတုလပါ် ဥတုဗြဲဂမဒှ်ကိုပ်ကၠာမွဲဂိတု ၜါဂိတုလပါ်ဂမၠိုၚ်ဝွံ အခိၚ်ဂမ္တဴ အခိၚ်ဒတူတၠာဲ၊ အခိၚ်ဂိယဲ၊ အခိၚ်ကၠောန်ကမၠောန်ကေၚ်ကာ၊ အခိၚ်ကွာ်တရဴအဓာန်မဂၠိၚ်သ္ၚောဲရ၊ ဣဝွံတုန် ပ္ဍဲအရာဟုမ်ဍာ်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
362) ပ္ဍဲအခိၚ်ဂှ် ခမဳမဂမၠိုၚ်ဗွဲမဂၠိုၚ် ဇိၚ်တဴသ္ၚာ ပ္ဍဲအမှဲအကးအိုတ်မ္ဂး တ္ၜန်တ္ၜောဲနှဴရဴတဴ နကဵုကျာ်မဒှ်မွဲဟာန်ကေုာံလက်ကၠိုက်အိုတ်ရ၊ ဗြဲလေဝ် ဗၞတ်ညိနာၚ်ဗၞတ်ညိနာၚ်ရ။ ခမဳဂမၠိုၚ် မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဟွံဂပ်ဝ်ဒှ်တုဲ ဟွံဟုမ်ဍာ်အိုတ်ရ၊ ဟိုတ်မတိက်နကဵုဇကုမဍုက်ဍေက်ဂှ်ရ သ္ၚာကေုာံသၞာသတိက်သၞာဒၟံၚ်ဂမၠိုၚ် လီုလာ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ပ္ဍဲအခိၚ်ဗြဲဂူကျာပိုက် မွဲဟာန်ကေုာံလက်ကၠိုက် တၞဟ်နဟုမ်ဍာ် ပ္ဍဲအပ္ဍဲလပါ်ဂိတု ‘စှ်သုန်တ္ၚဲ’ ဂှ် ကဵုအခေါၚ်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
363) “ယြဴခမဳမွဲ ဝေၚ်ကၠေံအခိၚ်အခါတုဲ ပ္ဍဲအပ္ဍဲလပါ်ဂိတု ‘စှ်သုန်တ္ၚဲ’ ဟုမ်ဍာ်မ္ဂး၊ (ကုခမဳဂှ်) ဒးအာပတ်ပဲါစိုတ်ရ။ ပ္ဍဲအရာဟုမ်ဍာ်ဂှ် ကြက်သ္ဂးဂတဝွံတုန် အခိၚ်အခါရောၚ်၊ ဂိတုက္ညၚ်ဂမၠိုၚ် မသှေ်သၟေဟ်မွဲဂိတုလပါ် ဥတုဗြဲ မဒှ်ကိုပ်ကၠာမွဲဂိတု ၜါဂိတုလပါ်ဂမၠိုၚ်ဝွံ အခိၚ်ဂမ္တဴအခိၚ်ဒတူတၠာဲ၊ အခိၚ်ဂိယဲ၊ အခိၚ်ကၠောန်ကမၠောန်ကေၚ်ကာ၊ အခိၚ်ကွာ်တရဴအဓာန်မဂၠိၚ်သ္ၚောဲ၊ အခိၚ်ဗြဲဂူ ကျာပိုက် မွဲဟာန်ကေုာံလက်ကၠိုက်ရ၊ ဣဝွံတုန် ပ္ဍဲအရာဟုမ်ဍာ်ဂှ် အခိၚ်အခါရောၚ်” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
