၅.၆.၆.၁။ ပွံက်ဇောတိသိက္ခာပိုဒ်

354) ယြဴ မ္ဂးဂှ် ယြဴဍေံမၞုံမဖှ်သာ်လဵု ။ ပ ။ ခမဳ မ္ဂးဂှ် ။ ပ ။ ပ္ဍဲအရာဝွံ ညးမအာစိုပ်ဒဒှ်ခမဳ နဉတ္တိစတုတ္ထကမ်ဝွံ ဂပ်ဝ်နွံပၟိက်ရဴဝွံမ္ဂး ခမဳရ။ ညးဟွံဂိယဲ မ္ဂးဂှ် စာ်စ္ဍးကေုာံပၟတ်တုဲ ပူဂိုလ်မဒှ်တသိုခ်ရောၚ်။ မိက်ၜံၚ်ဒှ်တုဲ မ္ဂးဂှ် မိက်ကဵုဂမ္တဴတုဲ။ ပၟတ် မ္ဂးဂှ် ဂပ်ဝ်ကဵုသ္ဂးပၟတ်ဟေၚ်ရ။ စံၚ်ဗဂဵုမ္ဂး မ္ဂးဂှ် အလဵုဇကု စံၚ်ဗဂဵုမ္ဂး၊ ဒးအာပတ်ပဲါစိုတ်ရ။ ဖအောဝ်ကဵုစံၚ်ဗဂဵုမ္ဂး မ္ဂးဂှ် ဖအောဝ်ကဵုညးသအာၚ်မ္ဂး၊ ဒးအာပတ်ပဲါစိုတ်ရ။ သီုကဵုဖအောဝ်စကာ မွဲအလန်ဟေၚ်ဂှ် စံၚ်ဗဂဵုဗွဲမဂၠိုၚ်ကဵုအလန်မ္ဂး၊ ဒးအာပတ်ပဲါစိုတ်ရ။ ဝေၚ်ကၠေံ ဟိုတ်မပ္တံပွမဍေန်ပၟတ် မၞုံသဘဴမဖှ်သာ်ဂှ်တုဲ မ္ဂးဂှ် ပဲါကၠေံ ဟိုတ်မပ္တံပွမဍေန်ပၟတ် မၞုံသဘဴမဖှ်သာ်ဂှ်တုဲ။

355) သီုကဵုဟွံဂိယဲ မၞုံကဵုစၟတ်သမ္တီဟွံဂိယဲဒှ်တုဲ ဟိုတ်မမိက်ၜံၚ်ဂှ်ရ ဝေၚ်ကၠေံဟိုတ်မပ္တံပွမဍေန်ပၟတ် မၞုံသဘဴမဖှ်သာ်ဂှ်တုဲ စံၚ်ဗဂဵုလေဝ်စံၚ်ဗဂဵုမ္ဂး၊ ဖအောဝ်လေဝ်ဖအောဝ်ကဵုစံၚ်ဗဂဵုမ္ဂး၊ ဒးအာပတ်ပဲါစိုတ်ရ။ သီုကဵုဟွံဂိယဲ မၞုံကဵုသၠေဟ်ပၟာဒှ်တုဲ ဟိုတ်မမိက်ၜံၚ်ဂှ်ရ ဝေၚ်ကၠေံ ဟိုတ်မပ္တံပွမဍေန်ပၟတ် မၞုံသဘဴမဖှ်သာ်ဂှ်တုဲ စံၚ်ဗဂဵုလေဝ်စံၚ်ဗဂဵုမ္ဂး၊ ဖအောဝ်လေဝ်ဖအောဝ်ကဵုစံၚ်ဗဂဵုမ္ဂး၊ ဒးအာပတ်ပဲါစိုတ်ရ။ သီုကဵုဟွံဂိယဲ မၞုံကဵုစၟတ်သမ္တီဂိယဲဒှ်တုဲ ဟိုတ်မမိက်ၜံၚ်ဂှ်ရ ဝေၚ်ကၠေံ ဟိုတ်မပ္တံပွမဍေန်ပၟတ် မၞုံသဘဴမဖှ်သာ်ဂှ်တုဲ စံၚ်ဗဂဵုလေဝ်စံၚ်ဗဂဵုမ္ဂး၊ ဖအောဝ်လေဝ်ဖအောဝ်ကဵုစံၚ်ဗဂဵုမ္ဂး၊ ဒးအာပတ်ပဲါစိုတ်ရ။ ယာပတိုန် ထၞိက်ပၟတ်မ္ဂး၊ ဒးအာပတ်ဒုက္ကဋ်ရ။ ဂိယဲဒၟံၚ်ဂှ် မၞုံကဵုစၟတ်သမ္တီဟွံဂိယဲမ္ဂး၊ ဒးအာပတ်ဒုက္ကဋ်ရ။ ဂိယဲဒၟံၚ်ဂှ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ဂိယဲဒၟံၚ်ဂှ် မၞုံကဵုစၟတ်သမ္တီဂိယဲမ္ဂး၊ ဟွံဒးအာပတ်ရ။

356) ကုမဂိယဲ ဟွံဒးအာပတ်ရ၊ ၜံၚ်ပၟတ် ညးသအာၚ်သ္ပလဝ်ကဵုမ္ဂး၊ ၜံၚ်လ္ၚပၟတ် မစာ်စ္ဍးနူသၞပၟတ်မ္ဂး၊ ဟွံဒးအာပတ်ရ၊ ပ္ဍဲအရာစံၚ်ဗဂဵုပၟတ်ကၠေၚ်သ္ဍဴကီု ပ္ဍဲအရာစံၚ်ဗဂဵုပၟတ် (တၞဟ်နမပ္တံသွက်ဂွံစံၚ်ဗဗေၚ်) ကီု ပ္ဍဲသ္ၚိဇရုၚ်ပၟတ်ကီု ဟိုတ်နူဟိုတ်မၞုံသဘဴမဖှ်သာ်ဂှ်ကီု ဟိုတ်နူပရိုက်ဘဲဂမၠိုၚ်ကီု စံၚ်ဗဂဵုလေဝ်စံၚ်ဗဂဵုမ္ဂး၊ ဖအောဝ်လေဝ်ဖအောဝ်ကဵုစံၚ်ဗဂဵုမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဇောတိကသိက္ခာပိုဒ် ဆဋ္ဌမတုဲရ။