၅.၆.၆။ ဇောတိသိက္ခာပိုဒ်
350) ပ္ဍဲအခိၚ်တဳလမၞုံပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဂြိုပ်ၜဲလပေါၚ် ဒှ်ဒၞဲါကဵုမသက္ကုဘဲကဵုသတ်ဂမၠိုၚ် မပ္တံဒြာဲ ဇရေၚ်ဍုၚ်သုသုမာရဂိရိ လုပ်လၟိၚ်ဘဂ္ဂရးဂှ် ခမဳဂမၠိုၚ် ပ္ဍဲဥတုသကတ် (မုဟ်ကျာ) စံၚ်ဗဂဵုပၟတ် ဆုဒကုတ်မၞုံကဵုခၟော်မဇၞော်တုဲ ၜံၚ်အိုတ်ရ။ ဇြုံဇာတ်မွဲပ္ဍဲခၟော်ဆုဂှ် ဟိုတ်မဂမ္တဴပၟတ်ဂှ်ရ တိတ်ကၠုၚ်မ္ၚးတုဲ ဗက်ထ္ဍေၚ်ခမဳဂမၠိုၚ်ရ။ ခမဳဂမၠိုၚ်ဂှ် သ္ဒးဂြိပ်အာဌာန်ဂမၠိုၚ်ဂှ်ဂှ်အိုတ်ရ။ ခမဳပၟိက်အောန်ဂမၠိုၚ်ဂှ် “မုဟိုတ် ခမဳဂမၠိုၚ် စံၚ်ဗဂဵုပၟတ်တုဲ ၜံၚ်အိုတ်ရော?” ရဴဝွံ ဟီုဂရိုဟ်အိုတ်ရ၊ ပျုတ်ဗ္ဒေက်အိုတ်ရ၊ ဟီုထ္ၜးဒုဟ်အိုတ်ရ ။ ပ ။ “ယွံခမဳတအ် မၞးတအ်ညးဂမၠိုၚ် စံၚ်ဗဂဵုပၟတ်တုဲ ၜံၚ်အိုတ်ရဟီုဂှ် ဍာံပြဟာ” ရဴဝွံ စၟဳစၟတ်သၟာန်သၟုက်ရ။ ဍာံပြရ ယွံကျာ်မၞုံပိုဉ် ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံခမဳတအ် တြုံမလ္ၚုသၟး (နူမဂ်ဖိုလ်) ဂမၠိုၚ်ဂှ် မုဟိုတ်စံၚ်ဗဂဵုပၟတ်တုဲ ၜံၚ်အိုတ်ရော? ယွံခမဳတအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဂမၠိုၚ်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ မမိက်ၜံၚ်ဒှ်တုဲ စံၚ်ဗဂဵုလေဝ်စံၚ်ဗဂဵုပၟတ်မ္ဂး၊ ဖအောဝ်လေဝ်ဖအောဝ်ကဵုစံၚ်ဗဂဵုမ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴ သိက္ခာပိုဒ်ဝွံ ကုခမဳဂမၠိုၚ်ရ။
351) ပ္ဍဲအခိၚ်ဂှ် ခမဳဂမၠိုၚ် ဂိယဲဒၟံၚ်အိုတ်ရ၊ ခမဳ မသၟာန်ယဲဂမၠိုၚ် “ယွံကောန်တၠတအ် ဒုၚ်စရၚ်ဒၟံၚ်ဟာ ယိုပ်ယာပ်ဒၟံၚ်ဟာ” ရဴဝွံ သၟာန် ခမဳဂိယဲဂမၠိုၚ်အိုတ်ရ။ ယွံကောန်တၠတအ် ပိုဲညးဂမၠိုၚ် ပ္ဍဲကိုပ်ကၠာတေံ စံၚ်ဗဂဵုပၟတ်တုဲၜံၚ်အိုတ်ရ၊ နပွမၜံၚ်ပၟတ်ဂှ် ဒှ်တသိုခ်ကုပိုဲညးဂမၠိုၚ်ရ၊ ပ္ဍဲလၟုဟ်တုန် “ဟိုတ်နူတဳလမၞုံပိုဉ်ကျာ်တြဲ ပဲါကၠေံဂှ်ရ ဟွံဂပ်ဝ်ရ” ရဴဝွံ မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာဒှ်တုဲ ဟဂွံၜံၚ်ပၟတ်အိုတ်ရ၊ ဟိုတ်ဂှ်ရ ဟွံဒှ်တသိုခ်ကုပိုဲညးဂမၠိုၚ်ရ ရဴဝွံ (ဟီုသ္ဂးအိုတ်ရ)။ ဂရၚ်ပတီ ဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ။ ပ ။ “ယွံခမဳတအ် ခမဳဂိယဲဂှ် စံၚ်ဗဂဵုပၟတ်တုဲကီု ဖအောဝ်ကဵုစံၚ်ဗဂဵုပၟတ်တုဲကီု တၞဟ်နၜံၚ်ဂှ် ကဵုအခေါၚ်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။ “ယြဴခမဳမွဲ သီုဟွံဂိယဲ မမိက်ၜံၚ်ဒှ်တုဲ စံၚ်ဗဂဵုလေဝ်စံၚ်ဗဂဵုပၟတ်မ္ဂး၊ ဖအောဝ်လေဝ်ဖအောဝ်ကဵုစံၚ်ဗဂဵုမ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။ ရဴဝွံဟေၚ် တဳလမၞုံပိုဉ်ကျာ်တြဲ ပညပ်တဴသိက္ခာပိုဒ်ဝွံ ကုခမဳဂမၠိုၚ်ရ။
352) ပ္ဍဲအခိၚ်ဂှ် ခမဳဂမၠိုၚ် ပ္ဍဲအရာစံၚ်ဗဂဵုပၟတ်ကၠေၚ်လ္ၚဴကီု ပ္ဍဲအရာစံၚ်ဗဂဵုပၟတ် (တၞဟ်နမပ္တံသွက်ဂွံစံၚ်ဗဗေၚ်) ကီု ပ္ဍဲသ္ၚိဇရုၚ်ပၟတ်ကီု မၞုံကဵု ‘သံသယကုက္ကုစ္စ’ ပွမချပ်သၠေဟ်ပၟာ ဟွံဂပ်ဝ်အိုတ်ရ။ ဂရၚ်ပတီဟိုတ်ပရူပရာဝွံ ကုတဳလမၞုံပိုဉ်ကျာ်တြဲအိုတ်ရ ။ ပ ။ “ယွံခမဳတအ် ဟိုတ်နူဟိုတ်မပ္တံပွမဍေန်ပၟတ် မၞုံသဘဴမဖှ်သာ်ဂှ် တၞဟ်နစံၚ်ဗဂဵုပၟတ်ကီု တၞဟ်နပွမဖအောဝ်ကဵုစံၚ်ဗဂဵုပၟတ်ကီုဂှ် ကဵုအခေါၚ်ရ” ရဴဝွံ သ္ဂးရ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။
353) “ယြဴခမဳမွဲ ဝေၚ်ကၠေံဟိုတ်မပ္တံပွမဍေန်ပၟတ် မၞုံသဘဴမဖှ်သာ်ဂှ်တုဲ သီုဟွံဂိယဲမမိက်ၜံၚ်ဒှ်တုဲ စံၚ်ဗဂဵုလေဝ်စံၚ်ဗဂဵုပၟတ်မ္ဂး၊ ဖအောဝ်လေဝ်ဖအောဝ်ကဵုစံၚ်ဗဂဵုမ္ဂး၊ (ကုခမဳဂှ်) ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။
