၅.၆.၄.၁။ ပွံက်အနာဒရိယသိက္ခာပိုဒ်
342) ပွမဟွံရှ်ေသှ်ေရဴဂဴ မ္ဂးဂှ် ခမဳဂှ် ပွမဟွံရှ်ေသှ်ေရဴဂဴ ပ္ဍဲပူဂိုလ် ပွမဟွံရှ်ေသှ်ေရဴဂဴပ္ဍဲဓရ် ရဴဝွံ ပွမဟွံရှ်ေသှ်ေရဴဂဴ နွံၜါဂကူရ။ ပွမဟွံရှ်ေသှ်ေရဴဂဴ ပ္ဍဲပူဂိုလ် မ္ဂးဂှ် ခမဳမွဲဇကုဂှ် ဟီုသ္ဂးကၠုၚ် နကဵုပညပ်သိက္ခာပိုဒ်မ္ဂး (ခမဳဒးဒုၚ်ဟီုဂှ်) “ညး (မဟီုသ္ဂးကၠုၚ်) ဝွံ ညးခမဳမဂပ်ဝ်ဗက်ဗ္ဒဴရောၚ်၊ ညးဂပ်ဝ်ပျုတ်ဗ္ဒေက်ရောၚ်၊ ညးမဂပ်ဝ်ဂရိုဟ်ရောၚ်၊ ဂလာန်ခမဳ (ညးမဟီုသ္ဂးကၠုၚ်) ဝွံ ကြက်ဒ္ဂေတ်ဗက်ဟွံသေၚ်ရ” ရဴဝွံ သ္ပပွမဟွံရှေ်သှေ်ရဴဂဴမ္ဂး၊ ဒးအာပတ်ပဲါစိုတ်ရ။
ပွမဟွံရှ်ေသှ်ေရဴဂဴ ပ္ဍဲဓရ် မ္ဂးဂှ် ခမဳမွဲဇကုဂှ် ဟီုသ္ဂးကၠုၚ် နကဵုပညပ်သိက္ခာပိုဒ်မ္ဂး၊ ဓရ်ဝွံ မုရဴသာ်လဵု ကၠေံလေဝ်သ္ဂောံကၠေံအာရော? လီုလာ်လေဝ်သ္ဂောံလီုလာ်အာရော? ဗ္ဒန်လေဝ်သ္ဂောံကၠေံဗ္ဒန်အာရော? ရဴဝွံကီု ဟွံမိက်ဒ္ဂေတ်ပညပ်သိက္ခာပိုဒ်ဂှ်တုဲကီု သ္ပပွမဟွံရှ်ေသှ်ေရဴဂဴမ္ဂး၊ ဒးအာပတ်ပဲါစိုတ်ရ။
343) ပ္ဍဲခမဳ မၞုံကဵုစၟတ်သမ္တီခမဳဒှ်တုဲ သ္ပပွမဟွံရှေ်သှေ်ရဴဂဴမ္ဂး၊ ဒးအာပတ်ပဲါစိုတ်ရ။ ပ္ဍဲခမဳ မၞုံကဵုသၠေဟ်ပၟာဒှ်တုဲ သ္ပပွမဟွံရှ်ေသှ်ေရဴဂဴမ္ဂး၊ ဒးအာပတ်ပဲါစိုတ်ရ။ ပ္ဍဲခမဳ မၞုံကဵုစၟတ်သမ္တီခမဳဟွံသေၚ်ဒှ်တုဲ သ္ပပွမဟွံရှ်ေသှ်ေမ္ဂး၊ ဒးအာပတ်ပဲါစိုတ်ရ။ ဟီုသ္ဂးကၠုၚ် နကဵုဂလာန်ပညပ်သိက္ခာပိုဒ် ဟွံသေၚ်မ္ဂး “ဂလာန်ဝွံ ဟွံဒှ်တဴတၞဟ်နအေၚ်သတှ်ေရ၊ ဟွံဒှ်တဴ တၞဟ်နခါလယှ်ကၠေံကိလေသရ၊ ဟွံဒှ်တဴ တၞဟ်နပွမရၚ်တၠုၚ်ကဵုလျုၚ်ဇြုၚ်သ္ဍိုက်ရ၊ ဟွံဒှ်တဴ တၞဟ်နပွမလီုပလာ်ကိလေသရ၊ ဟွံဒှ်တဴ တၞဟ်နပွမပတိတ်ဇြဟတ်လွဳပရာရ” ရဴဝွံ သ္ပပွမဟွံရှ်ေသှ်ေရဴဂဴမ္ဂး၊ ဒးအာပတ်ဒုက္ကဋ်ရ။ ညးဟွံသေၚ်ကဵုခမဳဂှ် ဟီုသ္ဂးကၠုၚ်နကဵုပညပ်သိက္ခာပိုဒ်ကီု နဂလာန်ပညပ်သိက္ခာပိုဒ် ဟွံသေၚ်ကီုမ္ဂး “ဂလာန်ဝွံ ဟွံဒှ်တဴ တၞဟ်နအေၚ်သတှ်ေရ၊ ဟွံဒှ်တဴ တၞဟ်နခါလယှ်ကၠေံကိလေသရ၊ ဟွံဒှ်တဴ တၞဟ်နပွမရၚ်တၠုၚ်ကဵုလျုၚ်ဇြုၚ်သ္ဍိုက်ရ၊ ဟွံဒှ်တဴ တၞဟ်နပွမလီုပလာ်ကိလေသရ၊ ဟွံဒှ်တဴ တၞဟ်နပွမပတိတ်ဇြဟတ်လွဳပရာရ” ရဴဝွံ သ္ပပွမဟွံရှေ်သှေ်ရဴဂဴမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုစၟတ်သမ္တီခမဳမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲညးဟွံသေၚ်ကဵုခမဳ မၞုံကဵုစၟတ်သမ္တီ ညးဟွံသေၚ်ကဵုခမဳမ္ဂး၊ ဒးအာပတ်ဒုက္ကဋ်ရ။
344) “ပွမကတ်ဗတောန်ပါဠိ အ္စာပိုဲညးဂမၠိုၚ် ဒှ်ရဴဝွံရ၊ ပွမကတ်ဗတောန်အဋ္ဌကထာ ဒှ်ရဴဝွံရ” ရဴဝွံ ဟီုသ္ဂးမ္ဂး၊ ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ အနာဒရိယသိက္ခာပိုဒ် စတုတ္ထတုဲရ။
