၅.၆.၃.၁။ ပွံက်ဟသဓမ္မသိက္ခာပိုဒ်

337) ပွမဝေၚ်ဂြိုၚ်ကတိုၚ်ကမှ် ပ္ဍဲဍာ် မ္ဂးဂှ် ခမဳဂှ် ပ္ဍဲဍာ်မဇြိုဟ်လတူမတ်စိၚ်ဇိုၚ် မိက်ဝေၚ်ဂြိုၚ်ကတိုၚ်ကမှ်ဒှ်တုဲ ဗၠိုပ်လေဝ်ဗၠိုပ်မ္ဂး၊ မံက်လေဝ်မံက်တိုန်မ္ဂး၊ ၜိၚ်လေဝ်ၜိၚ်အာမ္ဂး၊ ဒးအာပတ်ပဲါစိုတ်ရ။

338) ပ္ဍဲပွမဝေၚ်ဂြိုၚ်ကတိုၚ်ကမှ် ပ္ဍဲဍာ် မၞုံကဵုစၟတ်သမ္တီဝေၚ်ဂြိုၚ်ကတိုၚ်ကမှ်မ္ဂး၊ ဒးအာပတ်ပဲါစိုတ်ရ။ ပ္ဍဲပွမဝေၚ်ဂြိုၚ်ကတိုၚ်ကမှ် ပ္ဍဲဍာ် မၞုံကဵုသၠေဟ်ပၟာမ္ဂး၊ ဒးအာပတ်ပဲါစိုတ်ရ။ ပ္ဍဲပွမဝေၚ်ဂြိုၚ်ကတိုၚ်ကမှ် ပ္ဍဲဍာ် မၞုံကဵုစၟတ်သမ္တီဝေၚ်ဂြိုၚ်ကတိုၚ်ကမှ်မ္ဂး၊ ဒးအာပတ်ပဲါစိုတ်ရ။ ပ္ဍဲဍာ်မဍာသၟဝ်မတ်စိၚ်ဇိုၚ် မိက်ဝေၚ်ဂြိုၚ်ကတိုၚ်ကမှ်မ္ဂး၊ ဒးအာပတ်ဒုက္ကဋ်ရ။ ဝေၚ်ပ္ဍဲဍာ်နကဵုဂၠုၚ်မ္ဂး၊ ဒအာပတ်ဒုက္ကဋ်ရ။ ပေါဟ်တက်ဍာ် နကဵုတဲကီု နကဵုဇိုၚ်ကီု နကဵုအှော် (ကောန်လေံ) ကီု နကဵုကဝေက်ကီုမ္ဂး၊ ဒးအာပတ်ဒုက္ကဋ်ရ။ ဝေၚ်ဂြိုၚ်ကတိုၚ်ကမှ် ဍာ်ကီု ဍာ်သမ်ကီု ဍာ်တှ်ကီု ဍာ်တက်ကီု ဍာ်လွံက်ကီု ဍာ်ပဿဴကီု ဍာ်လၟက်ကီု မၞုံပ္ဍဲနုၚ်ထၟာဲမ္ဂး၊ ဒးအာပတ်ဒုက္ကဋ်ရ။ ပ္ဍဲပွမဟွံဝေၚ်ဂြိုၚ်ကတိုၚ်ကမှ် ပ္ဍဲဍာ် မၞုံကဵုစၟတ်သမ္တီဂြိုၚ်ဝေၚ်ကတိုၚ်ကမှ်မ္ဂး၊ ဒးအာပတ်ဒုက္ကဋ်ရ။ ပ္ဍဲပွမဟွံဝေၚ်ဂြိုၚ်ကတိုၚ်ကမှ် ပ္ဍဲဍာ် မၞုံကဵုသၠေဟ်ပၟာမ္ဂး၊ ဒးအာပတ်ဒုက္ကဋ်ရ။ ပ္ဍဲပွမဟွံဝေၚ်ဂြိုၚ်ကတိုၚ်ကမှ် ပ္ဍဲဍာ် မၞုံကဵုစၟတ်သမ္တီဟွံဝေၚ်ဂြိုၚ်ကတိုၚ်ကမှ်မ္ဂး၊ ဟွံဒးအာပတ်ရ။

339) နသဘဴဟွံမိက်ဝေၚ်ဂြိုၚ်ကတိုၚ်ကမှ်ကီု ဟိုတ်ကိစ္စနွံမ္ဂးကီု တၞီစှေ်ဍာ်တုဲ ဗၠိုပ်လေဝ်ဗၠိုပ်မ္ဂး၊ မံက်လေဝ်မံက်တိုန်မ္ဂး၊ ၜိၚ်လေဝ်ၜိၚ်အာမ္ဂး၊ ဟွံဒးအာပတ်ရ။ ဟိုတ်မမိက်တတ်ကၠောံအာသြၚ်မွဲလပါ် ဗၠိုပ်လေဝ်ဗၠိုပ်မ္ဂး၊ မံက်လေဝ်မံက်တိုန်မ္ဂး၊ ၜိၚ်လေဝ်ၜိၚ်အာမ္ဂး၊ ဟွံဒးအာပတ်ရ၊ ဟိုတ်နူပရိုက်ဘဲမ္ဂး ဟွံဒးအာပတ်ရ၊ ကုခမဳကြအ်ဥမ္မတ် ခမဳကလိလောန်ကၠာတဲဂှ် ဟွံဒးအာပတ်ရ။ ဟသဓမ္မသိက္ခာပိုဒ် တတိယတုဲရ။