၅.၆.၃။ ဟသဓမ္မသိက္ခာပိုဒ်

335) ပ္ဍဲအခိၚ်တဳလပိုဉ်ကျာ်တြဲ မပတၠပိုဉ်တြဴပြကာ သ္ပဒတဴတန်ဒၟံၚ် ပ္ဍဲဘာဇေတဝန် မဒှ်အာရှာမ်အနာထပိဏ္ဍိကသေဌဳ ဇရေၚ်ဍုၚ်သာရဝှ်ဂှ် ခမဳသတ္တရသဝဂ္ဂဳဂမၠိုၚ် ဝေၚ်ဂြိုၚ်ကတိုၚ်ကမှ် ပ္ဍဲဍာ်ကြုၚ်အစိရဝတဳအိုတ်ရ။ ပ္ဍဲအခိၚ်သၟိၚ်ဇၞော် ပသေနဒဳကောသလ ကေုာံဂၞကျာ်မလ္လိကာ ပဒတဴဒၟံၚ်ပ္ဍဲလတူပြာသာဒ်မပြဲရ။ သၟိၚ်ဇၞော် ပသေနဒဳကောသလ ညာတ်ဒး ခမဳသတ္တရသဝဂ္ဂဳဂမၠိုၚ် ဝေၚ်ဂြိုၚ်ကတိုၚ်ကမှ်ပ္ဍဲဍာ်ကြုၚ်အစိရဝတဳတုဲ “ယွံမလ္လိကာ တၠအရှန်တၠအဲဂမၠိုၚ်ဝွံ ဝေၚ်ဂြိုၚ်ကတိုၚ်ကမှ် ပ္ဍဲဍာ်အိုတ်ရ” ရဴဝွံ ဟီုသ္ဂးကဵုဂၞကျာ်မလ္လိကာရ။ ယွံသၟိၚ်ဇၞော် ဗွဲစၟတ် တဳလမၞုံပိုဉ်ကျာ်တြဲ ဟဂွံပညပ်သိက္ခာပိုဒ်ဏီတုဲလေဝ် ဒှ်ဂွံရ၊ ခမဳဂမၠိုၚ်ဂှ် ဟွံတီ (သိက္ခာပိုဒ်) ဏီတုဲလေဝ် ဒှ်ဂွံအိုတ်ရ ရဴဝွံ (ဟီုသ္ဂးရ)။ ပ္ဍဲအခိၚ်ဂှ် “အဲဂှ်လေဝ် သီုဟွံဒးဂရၚ်ပတီ ကုတဳလမၞုံပိုဉ်ကျာ်တြဲတိုက်ရိုက် တဳလမၞုံပိုဉ်ကျာ်တြဲလေဝ် ခမဳဂမၠိုၚ်ဝွံ ဝေၚ်ဂြိုၚ်ကတိုၚ်ကမှ် ပ္ဍဲဍာ်အိုတ်ရ ရဴဝွံ မုရဴနဲလဵုမွဲ သ္ဂောံတီကေတ်ညိရော?” ကသပ်ဒှ်ကုသၟိၚ်ဇၞော်ပသေနဒဳကောသလရ။ ပ္ဍဲအခိၚ်သၟိၚ်ဇၞော်ပသေနဒဳကောသလ ကဵုနိမန်ခမဳသတ္တရသဝဂ္ဂဳဂမၠိုၚ်တုဲ ကဵုဏာဒါန်ကဠောံတၚ်လာဲမဇၞော်တုဲ “ယွံတဳလပိုဉ်တအ် ကဠောံတၚ်လာဲဝွံ ဩဝ်ဗဂိန်ကဵုဒါန် ကုတဳလမၞုံပိုဉ်ကျာ်တြဲအိုတ်ညိ” ရဴဝွံ (ဂရၚ်ပတီရ)။ ခမဳသတ္တရသဝဂ္ဂဳဂမၠိုၚ် ဂိုၚ်ကေတ်ကဠောံတၚ်လာဲတုဲ ပြာပ်အာဇရေၚ်တဳလမၞုံပိုဉ်ကျာ်တြဲတုဲမ္ဂး “ယွံတဳလမၞုံပိုဉ် သၟိၚ်ဇၞော်ပသေနဒဳကောသလ ကဵုနၚ်ဒါန်ကဠောံတၚ်လာဲဝွံ ကုတဳလမၞုံပိုဉ်ကျာ်တြဲ” ရဴဝွံ (ဂရၚ်ပတီအိုတ်ရ)။ ယွံခမဳတအ် သၟိၚ်ဇၞော်ပသေနဒဳကောသလ ညာတ်ကေတ် မၞးတအ်ညးဂမၠိုၚ် မုရဴပ္ဍဲဌာန်မွဲရော? ရဴဝွံ (သၟာန်တိုန်ဂှ်)— ယွံတဳလမၞုံပိုဉ် ဃောဝေၚ်ဂြိုၚ်ကတိုၚ်ကမှ် ပ္ဍဲဍာ်ကြုၚ်အစိရဝတဳဂှ် ညာတ်ဒးရ ရဴဝွံ (ဂရၚ်ပတီအိုတ်ရ)။ တဳလမၞုံပိုဉ်ကျာ်တြဲ မပတၠပိုဉ်တြဴပြကာ ဟီုဂရိုဟ်ရ ။ ပ ။ ယွံတြုံမလ္ၚုသၟး (နူမဂ်ဖိုလ်) တအ် မၞးတအ်ညးဂမၠိုၚ် မုဟိုတ် ဝေၚ်ဂြိုၚ်ကတိုၚ်ကမှ် ပ္ဍဲဍာ်အိုတ်ရော? ယွံတြုံမလ္ၚုသၟး (နူမဂ်ဖိုလ်) တအ် (ပွမၞးတအ်ညးဂမၠိုၚ် သ္ပဒး) ဝွံ ကုညးဟွံလျုၚ်ဇြုၚ်သ္ဍိုက်ဏီ တၞဟ်နပွမကဵုလျုၚ်ဇြုၚ်သ္ဍိုက်ကီု ။ ပ ။ ယွံခမဳတအ် ရဴဝွံဟေၚ် ဩဝ်စၞောန်ထ္ၜး သိက္ခာပိုဒ်ဝွံအိုတ်ညိ။

336) “ဟိုတ်နူပွမဝေၚ်ဂြိုၚ်ကတိုၚ်ကမှ် ပ္ဍဲဍာ် ဒးအာပတ်ပဲါစိုတ်ရ” ရဴဝွံ (ဩဝ်စၞောန်ထ္ၜးအိုတ်ညိ ရဴဝွံ သ္ဂးရ)။